Москва испорт Унэшхоу «Крылья Советов» зыфиIорэм шъхьафит бэнакIэмкIэ зэнэкъокъухэр щыкIуагъэх.

Спорт бэнакIэхэм якупэу «Wolnik» зыфиIорэм хэлэжьэрэ батыр­хэу зэнэкъокъу зэфэшъхьафхэм щытхъуцIэхэр къащыдэзыхыгъэхэр Москва щызэIукIагъэх. Адыгэкъалэ щыщэу Шъхьа­щэкъо Кимэ атлетикэ псынкIэм, спорт бэнакIэхэм, футболым, нэмыкI спорт лъэпкъхэм ащызэ­лъашIэ. Къыблэм, Темыр Кавказым, Урысыем ифэшъхьаф шъолъырхэм язэнэкъокъухэм щытхъуцIэхэр къащихьыгъэх, ре­кордхэр ащигъэуцугъ.

Спортым иветеранхэм язэ­IукIэгъухэу Iоныгъо мазэм ­Дагъыстан щызэхащагъэхэм Шъхьа­щэкъо Кимэ ахэлэжьагъ.Каспийскэ щыкIогъэ хэгъэгу зэнэкъокъум шъхьафит бэнакIэм иIэпэIэсэныгъэ къыщигъэлъэ­гъуагъ. Дышъэ медалым фэба­нэзэ финалым щыIукIагъ Да­гъы­стан щыщ батырым. ЗэIу­кIэгъур 3:0-у К. Шъхьащэкъом къы­хьызэ нэгъэупIэпIэгъуи 10 къэ­нагъэу Кимэ хэукъоныгъэ ышIыгъ. Дагъыстан испортсмен ар къызыфигъэфеди, текIоныгъэр къыдихыгъ. К. Шъхьащэ­къом ятIонэрэ чIыпIэр къыфагъэшъошагъ.

США-м кыщыхъугъэу Урысыем игражданствэ зиIэ бэнэкIо цIэрыIоу Джефф Монсон ММА-м ижъуагъоу алъытэ. Зэнэкъокъу­хэм бэрэ ахэлажьэ. Килограмми 110-рэ къещэчы, илъэс 51- рэ ыныбжь, Шъхьащэкъо Кимэ кг 95-м нэс къэзыщэчыхэрэм якуп щэбанэ.

Зэфэшъхьаф онтэгъугъэ зиIэ батырхэр зэхэпхъагъэхэу Моск­ва щызэIукIагъэх. Бэнэгъур та­къикъи 4 макIо, едзыгъуи 2 мэхъу. К. Шъхьащэкъом зэIукIэгъур 3:0-у къыхьи, текIоныгъэр къыфагъэшъошагъ.

— Урысыем ибатыр анахь лъэшхэм ащыщэу Шъхьащэкъо Кимэ ММА-м ижъуагъоу Джефф Монсон зэрэтекIуагъэм имыза­къоу, бэнакIэу къыгъэлъэгъуагъэр спортым хэшIыкI фызиIэ­хэм агъэшIэгъуагъ. КIуачIэр, къулаир ыгъэфедэхэзэ, Шъхьащэкъо Кимэ рекорд пчъагъэ хэгъэгум изэнэкъокъухэм ащигъэуцугъ, щытхъуцIэхэр къащи­хьыгъэх, — къыщитхыгъ телеграм-каналым Адыгэ Рес­пуб­­ликэм и ЛIышъхьэу КъумпIыл Мурат.

— ТичIыпIэгъоу Шъхьащэкъо Кимэ зичэзыу текIоныгъэр къы­зэрихьыгъэм фэшI сыфэгушIо. Тегъэгушхо. Ащ фэдэ нахьы-жъэу тиIэхэр ныбжьыкIэхэм щы­сэшIу афэхъух, — къыщеIо телеграм-каналым КъумпIыл Мурат.

Гуфэбэныгъэ хэлъэу ти ЛIы­шъхьэу КъумпIыл Мурат къызэрэсфэгушIуагъэр лъэшэу сигуапэ. Адыгеим экономикэм, медицинэм, культурэм, спортым, нэмыкIхэм афэгъэхьыгъэ хэхъо­ныгъэ инхэр ешIых. Рес­пуб­ликэм кIэу щагъэуцугъэ спорт псэуалъэхэр цIыфхэм япсауныгъэ игъэпытэн, ныбжьыкIэхэм пIуныгъэ дэгъу ятыгъэным фэлажьэх. Тренер, спорт­смен цIэрыIохэр зэрэтиIэхэм ти­гушъхьэ кIуачIэ къеIэты, — къытиIуагъ Шъхьащэкъо Кимэ.

Илъэс 58-рэ зыныбжь адыгэ батырэу Шъхьащэкъо Кимэ ыгу­кIэ ныбжьыкI. Нарт лъэпкъэу зыпIугъэм шъхьащэ фешIы, ишэн­-хабзэхэр егъэлъапIэх, щы­Iэныгъэм щызэрехьэх. Краснодар спорт еджэпIэ-зыгъэсапIэу дэтым макIо, ветеранхэм якуп хэтэу кIуачIэр, къулаир епсы­хьэх. Тренерэу Абдула Магоме­довыр ипащэу Iоф зыдешIэжьы.

К. Шъхьащэкъор зыщыпсэурэ Адыгэкъалэ испорт еджапIэ итренерэу ХьакIэгъогъу Казбек игъусэу шъхьафит бэнакIэм нахь куоу зыфегъасэ. Спортым ишъэф­хэм защыбгъэгъозэным пае тренерым, кIэлэегъаджэхэм, ныбджэгъухэм къыуаIорэмэ уядэIун фаеу Шъхьащэкъо Кимэ елъытэ.

ФутболымкIэ кIымэфэ зэнэ­къокъум зыфегъэхьазыры, физкультурэм, спортым апылъхэм япчъагъэ хэхъоным хэлажьэ. Спор­тым гъэхъагъэу мыгъэ щи­шIыгъэр къэралыгъо иIэу Адыге­ир зыпсэурэр илъэси 100 зэ­рэхъугъэм фегъэхьых.

Адыгэ лъэпкъэу узыщыщым, республикэм щытхъур къафэо­­хьы. Опсэу, Ким! Уиунагъо удат­хъэу, унасыпышIоу ущыIэнэу, Тхьэм нарт бэгъашIэ уишIы­нэу тыпфэлъаIо.

ЕмтIылъ Нурбый.