Урысыем и Къэралыгъо академическэ театрэу Евгений Вахтанговым ыцIэ зыхьырэм икъэгъэлъэгъонхэр апэрэу Адыгэ Республикэм чъэпыогъум и 11 – 14-м щыкIощтых.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэу театрэм ирепертуар щыщ къэгъэлъэгъонитIу республикэм щызэхащэщт. А. С. Пушкиным ироманэу «Евгений Онегиным» къыхэхыгъэ едзыгъуитIур ыкIи Тадеуш Слободзянек ытхы­гъэм техыгъэу «Наш класс» зыфиIорэр Мыекъуапэ щыкIощтых.

Чъэпыогъум и 11 — 12-м Адыгэ Рес­публикэм и Къэралыгъо филармоние спектаклэу «Евгений Онегиныр» къыщагъэлъэгъощт, зыгъэуцугъэр режиссер цIэрыIоу Римас Туминас.

Евгений Вахтанговыр къызыхъугъэ мафэм тефэу 2013-рэ илъэсым мэзаем и 13-м спектаклыр апэрэу къагъэлъэ­гъуагъ. Литературнэ Iофыгъохэр зэзыгъэфагъэр, спектаклыр зыгъэуцугъэр театрэм ихудожественнэ пащэу Римас Туминас.

Чъэпыогъум и 13 — 14-м Адыгэ Рес­публикэм и Лъэпкъ театрэу Цэй Ибрахьимэ ыцIэ зыхьырэм спектаклэу «Наш класс» зыфиIорэр къыщагъэлъэгъощт.

Польшэм идраматургэу Тадеуш Слободзянек тарихъым фэгъэхьыгъэу 2008-рэ илъэсым пьесэр ытхыгъ, режиссерэу Наталья Ковалевам ыгъэуцугъ.

Театрэм ыбзэкIэ тарихъыр цIыфхэм къафэпIотэныр Iоф къызэрыкIоп. БлэкIыгъэ лъэхъаныр, непэрэ щыIакIэр, къэ­кIощт уахътэр — ахэр драматургым зэрегъапшэх. Рольхэр къэзышIыхэрэ артистхэм щыIэныгъэм куоу цIыфыр гукIэ хащэ, рагъэгупшысэ. Хъугъэ-шIагъэхэм къахахыгъэ едзыгъохэр спек­таклым еплъыхэрэм зэфахьысыжьых.

Артистхэу Дарья Щербаковам, Полина Чернышовам, Евгения Ивашовам, Эльдар Трамовым, Юрий Поляк, Федор Воронцовым, Владимир Логвиновым, Алексей Гиммельрейх, Денис Самойловым, Максим Севриновскэм рольхэр къашIых.

КIэщакIохэр

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэ къэгъэлъэгъонхэр Мые­къуапэ щыкIонхэм фэшI Адыгэ Респуб­ликэм и ЛIышъхьэу КъумпIыл Мурат, культурэм икIэщакIохэм я Президентскэ фонд зэхэщэн IофхэмкIэ IэпыIэгъу къа­фэхъугъэх.

АР-м культурэмкIэ иминистрэу Аулъэ Юрэ зэрэхигъэунэфыкIыгъэу, театрэ цIэрыIохэм язэнэкъокъухэм щытхъуцIэхэр къащыдэзыхыгъэу Евгений Вахтанговым ыцIэ зыхьырэр Адыгеим къы­зэрэкIуагъэм тикультурнэ щыIакIэ къыгъэбаищт. Театральнэ искусствэм хэхъоныгъэ тишъолъыр щишIыным фэшI ащ фэдэ къэгъэлъэгъонхэр тищыкIагъэх. ЦIыфыр щыIэныгъэм фэзыпIурэ театрэм икъэгъэлъэгъонхэм яплъы зышIоигъохэм япчъагъэ зэрэхахъорэм тегъэгушIо.

ШъунаIэ тешъудз: филармонием, Лъэпкъ театрэу И. Цэим ыцIэ зыхьырэм ащыкIощт къэгъэлъэгъонхэм яплъы зышIоигъохэр мэкъэгъэIухэм защыжъугъэгъуаз.

ЕмтIылъ Нурбый.