ЩыIэныгъэм къыпкъырэкIы
Дунэе фестиваль-зэнэкъокъоу «Адыгэ пшъашъ» зыфиIорэм, адыгэ шъуашэм афэгъэхьыгъэ зэхэхьэ гъэшIэгъон Мыекъуапэ щыкIуагъ.
КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр Кавказ къутамэ щызэхащэгъэ пчыхьэзэхахьэм къэралыгъо зэфэшъхьафхэм ащыпсэурэ лъэпкъхэр зэфищагъэх.
Тыркуем щэпсэу
Джымыкъо Тамбый нарт шъаохэм ащыщ. Сирием къыщыхъугъ. Хэгъэгум икъэлэ шъхьаIэу Дамаскэ дэсэу граждан заор къежьагъ. Яунагъо Тыркуем кIожьын фаеу хъугъэ. Музыкэр зыгу рихьырэ адыгэ кIалэм Бурсэ имузыкальнэ еджапIэ зыщигъасэу ригъэжьагъ. Фортепианэм нахь пыщагъэу искусствэм ишъэфхэм защигъэгъуазэщтыгъ.
КIэлэегъаджэу Елена Юдинар ипащэу музыкэм зыфигъасэзэ, псынкIэу исэнаущыгъэ къызэIуихыгъ. Дунэе фестиваль-зэнэкъокъухэм ахэлажьэу ригъэжьагъ. С. И. Савшинскэм ыцIэкIэ зэхащэгъэ я VI-рэ Дунэе зэнэкъокъум Щытхъу тхылъыр къыщыфагъэшъошагъ.
Сирием щыпсэу зэхъум лъэкъуацIэу ыхьыщтыгъэр Асад. Тыркуем зэкощыжьым, лIакъом нахьыпэкIэ ыхьыщтыгъэ адыгэ лъэкъуацIэр ыштэжьыгъ. Зичэзыу фестивалым зырагъэблагъэм, IэкIыб къэрал кIоным фэшI зы чэщым къыкIоцI Тыркуем игражданствэ къыратыгъ. Iо- фыр арэущтэу зэрэлъыкIуатэрэм Тыркуем и Президентэу Реджеп Эрдоган щыгъозагъ.
Мыекъуапэ къызэкIом
Фестивалым апэрэ чIыпIэр къыщыдэзыхыгъэ Джымыкъо Тамбый цIыф шъырыт, упчIабэ зептыкIэ къэгущыIэ, ищыIэкIэ-псэукIэ, гъашIэм еплъыкIэу фыриIэр къеIуатэ.
Видеозэнэкъокъоу США-м щыкIуагъэм Т. Джымыкъом апэрэ чIыпIэр къыщыдихыгъ. Санкт-Петербург щызэхащэгъэ Дунэе зэIукIэгъум Тыркуем ыцIэкIэ хэлэжьагъ.
— НахьыпэкIэ Адыгэ Рес-публикэм, Къэбэртэе-Бэлъкъарым сащыIагъ, — игупшысэхэм тащегъэгъуазэ Джымыкъо Тамбый. — Слъэгъурэр, зэхэсхырэр сыгу исыубытэнхэм сиIахьылхэм, кIэлэегъаджэхэм сыфагъэсагъ. Мыекъуапэ нахь дахэ зэрэхъурэм, зэхъокIыныгъэхэр зэрэфэхъухэрэм сегъэгушIо.
Т. Джымыкъом фортепианэмкIэ, пщынэмкIэ произведениехэр къыригъэIуагъэх. ЕдэIугъэхэр Iэгу зэрэфытеуагъэхэм дакIоу, упчIабэ ратыгъ.
Фортепианэр, пщынэр
Дунэе зэнэкъокъоу «Адыгэ пшъашъэм» хэлажьэхэрэм яупчIэхэр тшIогъэшIэгъоныгъэх. Къэбэртэе-Бэлъкъарым къикIыгъэ ЖакIэмыхъо Даринэ, Тэхъутэмыкъуае щыщэу ШъэуапцIэкъо Динарэ, Блащэпсынэ щапIугъэ БрантIэ Данэ, нэмыкIхэм яупчIэхэр щыIэныгъэм, искусствэм яхьылIагъэх.
Фортепианэмрэ пщынэмрэ
Т. Джымыкъом лъэшэу ыгу рехьых. ТIумэ язэу нахь къыхихыщтымкIи еупчIыгъэх. «Фортепианэр шъхьэгъусэм, пщынэр сянэм фэсэгъадэх», — къы-Iуагъ Тамбый. Залым чIэсхэр ыгъэщхыгъэх. Музыкэр ищыIэныгъэ щыщ зэрэхъугъэр игупшысэхэм къащыхигъэщыгъ.
Шъуашэхэм якъэгъэлъэгъон
Адыгэ Республикэм культурэмкIэ и Министерствэ, АР-м лъэпкъ культурэмкIэ и Гупчэ, Адыгеим лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет кIэщакIо фэхъухи, адыгэ шъуашэм фэгъэхьыгъэ къэгъэлъэгъонхэр музеим щызэхащагъэх.
Фестивалэу «Адыгэ пшъашъэм» ехьылIагъэри зэхахьэм щыхагъэунэфыкIыгъ. МэфэкIымрэ зэнэкъокъумрэ язэпхыныгъэхэр зэхэщакIохэм шIукIэ афэтэлъэгъу.
— Адыгэ пшъашъэм идэхагъэ, иIушыгъэ, иIэдэбныгъэ тарихъым чIыпIэшхо щиубытыгъ, — къыIуагъ пчыхьэзэхахьэр зезыщагъэу, Адыгэ Респуб-ликэм изаслуженнэ артистэу Ацумыжъ Адам. — IэкIыб къэралыгъохэм къарыкIыхэу Адыгэ шъолъырым къихьэрэ зекIолIхэм агъэшIагъощтыгъ адыгэ пшъашъэм идэхагъэ, усакIохэм ягупшысэхэм къащараIотыкIыщтыгъ ащ иIушыгъэ, изекIокIэ-шIыкIэхэр. Сыд фэдэрэ лъэхъани диштэу пшъашъэр кIэракIэу, шъуашэр къешIэкIыгъэу дунаим щэпсэу.
Адыгэ шъуашэр дунаим тет лъэпкъ шъуашэхэм зэрафэмыдэр, гъэпсыкIэу иIэмкIэ зэратекIырэр музеим щыкIогъэ зэхахьэм къыщылъэгъуагъ.
МэфэкIым дештэх
Лъэпкъ IэпэIасэхэу Мыгу Рузанэ, КIэдэкIой Нэфсэт, Пэрэныкъо Рузанэ, Акъущэ Фатимэ яIэшIагъэхэр пшъэшъэ ищыгъэхэм зэхахьэм къыщагъэлъэгъоным фэшI музеир къызэрэхахыгъэм зыкъигъэшъыпкъэжьыгъ.
Музеим ыкIоцI идэкIояпIэхэр мыжъо пытэ фыжьым хашIыкIыгъэх, нэфынэу къатепсэрэм зэпегъэжъыух. Пшъашъэхэр шъуашэу ащыгъым къегъэкIэракIэх.
Мыгу Рузанэ ышIыгъэ шъуашэу «Гощэунай» зыфиIорэр ныбжьыкIэхэм лъэпкъ шъуашэр нахь цIэрыIо ашIыным фэгъэхьыгъ. Нысащэм къекIущт шъуашэри къыхагъэщыгъ.
КIэдэкIой Нэфсэт иIэпэIэсэныгъэкIэ Урысыем, IэкIыб хэгъэгухэм ащашIэ. «Этномода» зыфиIоу Урысыем щыкIогъэ зэнэкъокъум апэрэ чIыпIэр, Дипломыр къыщыфагъэшъошагъэх. НыбжьыкIэ IэпэIасэхэм язэнэкъокъоу Санкт-Петербург щызэхащагъэм ащытекIуагъ.
Лъэхъаным диштэу пшъашъэхэр кIэракIэу фэпэгъэнхэм фэшI КIэдэкIой Нэфсэт иIофшIагъэхэр гъэшIэгъоных. Шъуашэхэр зэрэзэфэмыдэхэм къыхэкIэу нахь гуфаплъэу уяплъы, гум къахихыщтыр къэшIэгъуае.
Пэрэныкъо Рузани, Акъущэ Фатими мэфэкI шъуашэу ашIыгъэхэр, дышъэидагъэхэр, саер, цыер, лъэхъаным диштэу шъо зэфэшъхьафхэмкIэ гъэкIэрэкIагъэхэр дахэу къагъэлъэгъонхэм фэшI шэн-хабзэхэр къыдалъытагъэх.
ЕплъыкIэхэр
Джымыкъо Тамбый итворчествэ, IэпэIасэхэм яIофшIагъэхэм къараIолIагъэхэр тшIогъэшIэгъоных. Адыгэ Республикэм культурэмкIэ иминистрэ игуадзэу Кушъу Светланэ, зэлъашIэрэ сурэтышI-модельерэу СтIашъу Юрэ, лъэпкъ IэпэIасэу КIэдэкIой Нэфсэт, Дунэе Адыгэ Хасэм ипрезидент иупчIэжьэгъоу МэщфэшIу Нэдждэт, Адыгэ Республикэм испорт еджапIэу N 2-м итхьаматэу, Урысыем, Адыгеим язаслуженнэ тренерэу Хъот Юныс, лъэпкъ общественнэ IофышIэхэу Едыдж Мэмэт, Чэтэо Ибрахьим, Тэхъутэмыкъое районым иадминистрацие культурэмкIэ и ГъэIорышIапIэ ипащэу Ацумыжъ Рустам, Адыгеим культурэмкIэ изаслуженнэ IофышIэу СтIашъу Сафыет, музеим иIофышIэу ХъокIо Ларисэ, нэмыкIхэр зэхахьэм къыщыгущыIагъэх.
ЯеплъыкIэхэр, зэфэхьысыжьхэр щыIэныгъэм къыпкъырэкIых. Уиныдэлъфыбзэ умышIэрэмэ сыдэущтэу уадыгэщта? Ащ шъхьафэу утегущыIэн фаеу зылъытэхэрэм таIукIагъ.
Адыгэ Республикэм, Къэрэщэе-Щэрджэсым язаслуженнэ артистэу ЛIыбзыу Аслъан пщынэмкIэ лъэпкъ орэдышъохэр зэхахьэм щигъэжъынчыгъэх.
— Джымыкъо Тамбый бэшIагъэу синэIуас, лъэпкъ гупшысэу иIэм итворчествэ къыгъэбаигъ, — къытиIуагъ ЛIыбзыу Аслъан.
Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэ фестиваль-зэнэкъокъоу «Адыгэ пшъашъ» зыфиIорэр тарихъым хэхьагъ. Ащ ехьылIэгъэ тхыгъэхэр къыхэтыутыщтых. Непэ къыхэдгъэщмэ тшIоигъор зэкIэ пшъашъэхэм ядэхагъэ, яIэпэIэсэныгъэ адыгэ шъуашэр ащыгъэу къызэрэщагъэлъэгъуагъэр ары. Адыгэ шъуашэр гукъабзэкIэ ашIы, идэхагъэ щыIэныгъэм щытэлъэгъу.
ЕмтIылъ Нурбый.