МэфэкI шIухьафтын
Атлетикэ онтэгъумкIэ Дунэе зэIукIэгъухэр Белоруссием щэкIох.
Урысыем ихэшыпыкIыгъэ командэ хэтэу Кощхьаблэ щыщ батырэу Дзэсэжъ Аслъан зэнэкъокъум хэлэжьагъ.
Нарт шъаом килограмм 67-м нэс къэзыщэчыхэрэм якуп иIэпэIэсэныгъэ къыщигъэлъэгъуагъ. ШIыкIэу рывокым кг 129-рэ къыщиIэтыгъ, толчокым кг 150-рэ. ТIоштэгъум кг 279-рэ щыригъэкъуи, ятIонэрэ чIыпIэр Дунэе зэIукIэгъум къыщыдихыгъ.
Адыгэ къэралыгъо университетым физкультурэмрэ дзюдомрэкIэ и Институт Дзэсэжъ Аслъан щеджэ. Кощхьаблэ щыпсэузэ атлетикэ онтэгъум фэщагъэ хъугъэ, апэрэ тренерыр Сэнэщэкъо Адам. СпортымкIэ дунэе класс зиIэ мастерхэу Сихъу Аслъанрэ Сихъу Рэмэзанрэ ипащэхэу А. Дзэсэжъым иIэпэIэсэныгъэ хегъахъо.
— Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэр зыщыхэдгъэунэфыкIырэ мафэм Дзэсэжъ Аслъан Минскэ щыIэу иухьазырыныгъэ Дунэе зэIукIэгъум щиушэтыгъ. Апэрэ чIыпIэр къыхьыным пэблэгъагъ. Килограмми 160-рэ къыIэтынэу щылычым ебэныгъ, ау икъулай икъоу ыгъэфедэн ылъэкIыгъэп, — къытиIуагъ Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу Сихъу Рэмэзан. — Тибатыр гъэхъагъэу ышIыгъэр Адыгеим имэфэкI фегъэхьы.