Тыгъэр тшъхьащытэу тылъэкIуатэ
Адыгеир, Къэбэртэе-Бэлъкъарыр, Къэрэщэе-Щэрджэсыр зызэхащагъэхэр илъэси 100 зэрэхъурэм фэгъэхьыгъэ концертэу Къэралыгъо Кремлевскэ Дворецым щыкIуагъэм Урысыем и Президентэу Владимир Путиныр къыщыгущыIагъ. Ащ зэхахьэм зэрэщыхигъэунэфыкIыгъэу, статусыкIэм ишIуагъэ къэкIуагъ. Экономикэмрэ социальнэ лъэныкъомрэ нахь зыкъаIэтынымкIэ, лъэпкъ шэн-хабзэхэр, культурнэ ыкIи гушъхьэлэжь кIэныр къэухъумэгъэнымкIэ, цIыфхэм гъэсэныгъэ зэрагъэгъотынымкIэ, сэнэхьатэу къыхахыгъэм рылэжьэнхэмкIэ амалышIухэр къаритыгъэх.
Театрэр
Адыгэ къэралыгъо драматическэ театрэр 1937-рэ илъэсым, жъоныгъуакIэм и 26-м, зэхащагъ. Театральнэ училищэу Краснодар дэтыр къэзыухыгъэхэр театрэм иартистхэу аштагъэх. А лъэхъаным еджапIэм ипэщагъ Щынджые щапIугъэ Цэй Ибрахьим. Адыгэ театрэм лъапсэ ышIыным И. Цэир чанэу хэлэжьагъ. Лъэпкъ драматургием кIэщакIо фэхъугъ. Ж.-Б. Мольер испектаклэу «Скупой» зыфиIорэр, И. Цэим ипьесэу «КъокIасэ» театрэм апэрэу къыщагъэлъэгъуагъэх.
Артист, режиссер сэнэхьатхэм афагъэсэщтхэр Москва, Ленинград ащырагъэджагъэх.
Хэгъэгу зэошхом илъэхъан театрэм иIофшIэн зэпигъэугъ. Артистхэм лIыхъужъныгъэ зэрахьэзэ фашистхэм язэхэкъутэн пхъашэу хэлэжьагъэх. 1958-рэ илъэсым театрэм иIофшIэн ригъэжьэжьыгъ.
Адыгеим итеатральнэ искусствэ зиушъомбгъугъ. Театрэр фестивальхэм, зэнэкъокъухэм ахэлажьэзэ цIэрыIо хъугъэ. Тилъэпкъэгъухэр зыщыпсэурэ Тыркуем, Москва, нэмыкIхэм спектаклэхэр къащигъэлъэгъуагъэх. Орденэу «Щытхъум и Тамыгъ» зыфиIорэр 1986-рэ илъэсым къыфагъэшъошагъ. РСФСР-м изаслуженнэ артисткэу Цэй Унае къызэриIогъагъэу, театрэм Адыгеим ищытхъу искусствэм лъагэу щиIэтыгъ.
Непэ Адыгэ Республикэм и Лъэпкъ театрэу Цэй Ибрахьим ыцIэ зыхьырэм классикэм хэхьэгъэ произведениехэр, Адыгеим идраматургхэу Къуекъо Налбый, Хъунэго Саидэ, Мурэтэ Чапай, Дэрбэ Тимур, Мамый Ерэджыб, Нэгъой Инвер, нэмыкIхэм атхыгъэхэм атехыгъэ спектаклэхэр къыщагъэлъагъох.
Артист цIэрыIохэу Зыхьэ Заурбый, Зыхьэ Мэлайчэт, Уджыхъу Мариет, Кукэнэ Мурат, нэмыкIхэм дунаим щыхахыгъэ сценэхэм рольхэр къащашIынхэм фэхьазырых.
«Налмэсыр» къэшъо
АР-м и Къэралыгъо академическэ къэшъокIо ансамблэу «Налмэсыр» 1936-рэ илъэсым Адыгэ автоном хэкум щызэхащагъ.
Ижъырэ лъэхъаным къыщегъэжьагъэу адыгэ къашъохэр тилъэпкъ ишэн-хабзэхэм адиштэхэу гъэпсыгъэх. Пэсэрэ адыгэ искусствэр къаухъумэзэ, лъэхъаным диштэу «Налмэсыр» лъыкIотэныр ипшъэрылъ шъхьаIэу щыт.
«Налмэсым» ихудожественнэ пащэу, Урысыем, Абхъазым, Пшызэ язаслуженнэ артистэу, Адыгеим инароднэ артистэу Хъоджэе Аслъан къытиIуагъ гупшысагъэ хэлъэу ансамблэм имурадхэр зэригъэпсыхэрэр. Къашъо пэпчъ екIолIэкIэ шъхьаф фашIызэ, лъэпкъ искусствэм ибаиныгъэхэр къегъэлъагъох.
«Налмэсыр» пытэу ылъэ тезыгъэуцуагъэхэм ащыщэу, РСФСР-м изаслуженнэ артистэу Бэшкэкъо Мэсхьудэ ыгъэсагъэхэм къэшъокIо цIэрыIуабэ къахэкIыгъ.
НэмытIэкъо Аслъан, Къулэ Мыхьамэт, НэмытIэкъо Римэ, Къулэ Мирэ, нэмыкIхэм ацIэхэр къетIохэ зыхъукIэ, «Налмэсым» иблэкIыгъэ уахътэ, инепэрэ ыкIи инеущрэ мафэхэр нэгум къыкIэуцох. Искусствэм зэфищэхи, зэшъхьэгъусэ зэфэхъугъэхэр, ясэнэхьат фэшъыпкъэ артистхэр щысэшIу ныбжьыкIэхэм афэхъух.
Америкэм, Европэм, Китаим, Москва, Санкт-Петербург, нэмыкIхэм яконцерт къэтыпIэ хэхыгъэхэм «Налмэсыр» ащыуджыгъ, АР-м ихэхъоныгъэхэр къашъохэмкIэ къащиIотагъ.
Программи 6 хъурэ пчыхьэзэхахьэхэр «Налмэсым» джырэ уахътэ Урысыем къыщетых. «ЗэфакIу», «Тыргъэтау», «ШIуфэс къашъу», «Налмэсыр къэшъо», нэмыкI театрализованнэ къэшIыгъохэр жъы хъухэрэп.
Республикэм илэгъу
АР-м и Къэралыгъо орэдыIо- къэшъокIо ансамблэу «Ислъамыер» Тыркуем, Италием, Польшэм, Сирием, Иорданием, Израиль, Урысыем ишъолъырхэм ащыIагъ. Лъэпкъым ифольклор къыпкъырыкIызэ композиторэу, художественнэ пащэу, Урысыем, Адыгеим, Къэбэртэе-Бэлъкъарым, Къэрэщэе-Щэрджэсым янароднэ артистэу Нэхэе Аслъан зэригъэфэгъэ произведениехэр «Ислъамыем» къеIох. Европэ культурэм хэхьэгъэ «Ислъамыем» Урысыем и Правительствэ ипремие къыфагъэшъошагъ.
Ансамблэу «Ошъутенэр», Камернэ музыкальнэ театрэу А. Хьанэхъум ыцIэ зыхьырэр, симфоническэ оркестрэр, А. Шипитьком ыцIэ зыхьырэ оркестрэу «Русская удалыр», зэхэт IофшIапIэу «Ошъадэр», фэшъхьафхэри Адыгеир Краснодар краим къызыхэкIыжьым зэхащагъэх.
ТиIагъэх, тиIэх
Сэнаущыгъэ зыхэлъ композиторхэр, орэдыIохэр, къэшъуакIохэр тэ, адыгэхэм, нахьыпэкIэ тиIагъэх, непи тиIэх. Тхьабысымэ Умар, Нэхэе Аслъан, Натхъо Джанхъот, Сэмэгу Гощнагъу, Шъэожъ Роз, Анзорыкъо Чеслав, Жэнэ Нафсэт, Дэрбэ Аслъан, нэмыкIхэри тэгъэлъапIэх, щысэ атетэхы. КIыкI Зулхьаджэ «Гощэгъэгъым игъыбзэ» къызыхидзэкIэ мэкъэ Iэтыгъэм «чIыр къыгъэгущыIэу» къыпщэхъу.
Лъэхъаным диштэу
Лъэпкъ проектэу «Культурэр» ыкIи нэмыкI къэралыгъо программэу щыIэхэм яшIуагъэкIэ искусствэхэм яколледжэу Тхьабысымэ Умарэ ыцIэ зыхьырэр, АР-м илъэпкъ театрэу Цэй Ибрахьимэ ыцIэ зыхьырэр, АР-м и Лъэпкъ музей, АР-м исурэткъэгъэлъэгъуапIэ, Лъэпкъ культурэм и Гупчэ зычIэт унэр, искусствэхэм якIэлэцIыкIу еджапIэу Мыекъуапэ дэтхэр агъэкIэжьыгъэх, язытет хагъэхъуагъ. Андырхъое Хъусен имузееу Шэуджэн районым итыр, Адыгэкъалэ икраеведческэ музей зэтрагъэпсыхьажьыгъэх, культурэм иунэ 36-рэ агъэцэкIэжьыгъах. Илъэсым икIэух нэс джыри 12 агъэкIэжьыщт. Республикэм культурэм ипсэуалъэу щашIыгъэхэр ыкIи щагъэцэкIэжьыгъэхэр япчъагъэкIэ 100 мэхъух. Аужырэ илъэситфым культурэм иIофышIэхэм япчъагъи нэбгыри 100 къыхэхъуагъ. IофышIэхэм ягъэхьазырын игъэкIотыгъэу дэлажьэх.
Фестивальхэм гъунапкъэхэр зэпачых, лъэпкъхэр нахь зэпэблагъэ ашIых, шэн-хабзэхэр къаухъумэх.