Елизаветэ фэгушIуагъэх
Кушъхьэфэчъэ спортымкIэ Дунэе зэIукIэгъоу «Адыгеим инарт» зыфиIоу тиреспубликэ щыкIуагъэм Елизавета Ошурковам ятIонэрэ чIыпIэр къыщыдихыгъ.
Адыгэ Республикэм кушъхьэфэчъэ спортымкIэ иеджапIэ зыщызыгъэсэрэ Елизавета Ошурковар купым хэтэу километрэ 24-рэ къызекIум тыжьын медалыр къыфагъэшъошагъ.
Адыгэ Республикэм кушъхьэфэчъэ спортымкIэ и Федерацие ипрезидентэу Анатолий Лелюк зэхахьэм къыщиIуагъ Елизавета Ошурковар хэгъэгум испортсменкэ анахь лъэшхэм ащыщ зэрэхъугъэр. Гуетыныгъэ ин хэлъэу зэнэкъокъухэм сыдигъуи зафегъэхьазыры. Адыгеим изаслуженнэ тренерэу Алексей Войновыр ипащэу иIэпэIэсэныгъэ хегъахъо.
Елизавета Ошурковам спортым гъэхъагъэу щишIыгъэр макIэп. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэ Дунэе зэнэкъокъоу «Адыгеим инарт» зыфиIорэм зэрэхэлэжьагъэр, ятIонэрэ чIыпIэр къызэрэщыдихыгъэр щыгъупшэжьыщтэп.
ИIофшIэгъухэр, спортыр зыгу рихьыхэрэр Елизавета Ошурковам фэгушIуагъэх, нэпэеплъ сурэтхэр атырахыгъэх. Сахьидэкъо Нурбый.
Сурэтым итхэр: Елизавета Ошурковам фэгушIох — ящэнэрэу ар щыт.