Урысыем и Къыблэ шъолъыр, Темыр Кавказым ащыпсэурэ лъэпкъхэм спортымкIэ ыкIи культурэмкIэ яфестиваль къалэу Грознэм щыкIуагъ.

— Командэ 17 фестивалым щызэIукIагъ, — къытиIуагъ Адыгэ Республикэм испорт еджапIэу N 2-м ипащэу Хъот Юныс. — Абхъазым, Донецкэ ыкIи Луганскэ народнэ республикэхэм, Къыблэм ыкIи Темыр Кавказым къарыкIыгъэхэм яIэпэIэсэныгъэ къагъэ­лъэгъуагъ.

ФутболымкIэ, хьылъэр Iэтыгъэ­нымкIэ, атлетикэ псынкIэмкIэ, шахматхэмкIэ, кIапсэр зэпэкъудыигъэнымкIэ, лъэпкъ бэнакIэхэмкIэ, фэшъхьафхэмкIэ зэнэкъокъу­гъэх. Бгым ишIэгъэ бгырыпххэр аIыгъэу зэбэныгъэхэм къахэ­щыгъ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм зыщызыгъэсэрэ Бэгъ Аслъан. Килограмм 90-м нэс къэзыщэчыхэрэм якуп щыбани, ящэнэрэ чIыпIэр къыди­хыгъ. Адыгэ Республикэм изаслуженнэ тренерэу Биданыкъо Рэмэзан батырыр егъасэ.

Лъэпкъ бэнакIэмкIэ Адыгеим ихэшыпыкIыгъэ командэ зэнэкъо­къум фэзыгъэхьазырыгъэр Урысыем, Адыгеим язаслуженнэ тренерэу Хъот Юныс. ЛъэпцIэ­рышэ Айдэмыр ыкIи ЛIыбзыу Аскэр медальхэр къыдамыхыгъэ­ми, ухьазырныгъэ дэгъу къагъэлъэгъуагъ. ТибэнакIохэм илъэс 18 аныбжь. Ежьхэм бэкIэ ана­хьыжъхэм янэкъокъугъэх.

Фестивалым лъэпкъ зэфэшъхьафхэм ащыщхэр щызэIукIагъэх, нэIуасэ щызэфэхъугъэх. Культурэм, спортым мамыр псэукIэр зэрагъэпытэрэм атегущыIагъэх, шэн-хабзэхэр щыIэныгъэм зэрэщыпхыращыхэрэр, нэмыкIхэр къызэфаIотагъэх.

Сурэтым итхэр: Адыгеим лъэпкъ бэнакIэмкIэ ихэшыпыкIыгъэ командэ хэтхэр.