«Ростов-Дон» Ростов-на-Дону — «АГУ-Адыиф» Мыекъуапэ — 37:29 (21:10). Iоныгъом и 23-м Ростов-на-Дону щызэдешIагъэх.

«Адыиф»: къэлэпчъэIутхэр: Якупова, Баскакова; ешIакIохэр: Краснокутская — 2, Никулина — 2, Кириллова — 1, Колодяжная — 4, Морозова — 1, Мещерякова, Куцевалова – 1, Казиханова — 2, Поршина — 4, Голунова — 2, Краснова — 4, Кожубекова — 3, Сиднина — 3.

Урысыем, блэкIыгъэ илъэс зэнэкъокъум, дышъэр къыщыдэзыхыгъэ гандбол командэу «Рос­тов-Доным» «Адыифыр» IукIагъ. Олимпиадэ джэгунхэм апэрэ чIыпIэр къащызыхьыгъэ ешIэкIуи 5 бысымхэм якомандэ щешIагъ. Мыекъуапэ щапIугъэ Виктория Калининар «Ростов-Доным» джырэ уахътэ хэт, иIэпэIэсэныгъэкIэ къахэщы.

«Адыифыр» «Ростов-Доным» щымыщынэу дэгъоу ешIагъ. Къэ­лапчъэм Iэгуаор гъогогъу 29-рэ дидзагъ. Арэу щытми, бысымхэр апэкIэ псынкIэу илъыхэзэ къэлапчъэм Iэгуаор дадзэным фэшI опытэу яIэр нахьышIоу агъэфедагъ. Нахь ныбжьыкIаIоу командэм хэтхэри зэнэкъокъум хагъэ­лэжьагъэх.

Пресс-зэIукIэр

— ТекIоныгъэр «Адыифым» къыдимыхыгъэми, ешIэкIэшIу къыгъэлъэ­гъуагъ, — къытиIуагъ клубым итренер шъхьаIэу Александр Реввэ. — Зыпкъ итэу типшъашъэхэр хэ­гъэгум изэнэкъокъу хэлэ­жьэнхэм фэхьазырхэп. ГущыIэм пае, Ангелина Куцеваловам Ставрополь икомандэ икъэлапчъэ гъогогъуи 7 Iэгуаор дидзагъ, «Ростов-Доным» зэ ныIэп. ТиешIакIохэр нахь зэгурыIохэзэ опыт яIэ хъущтэу тэгугъэ.

Е. Зеленскаяр «Ростов-Доным» нахь къыхэщыгъ, гъогогъуи 9 «Аыдифым» икъэлапчъэ Iэгуаор дидзагъ.

Суперлигэм хэт гандбол командэхэм зичэзыу ешIэгъухэр зэраухыгъэхэр зэтэгъапшэх.

«Звезда» — «Балтийская заря» — 41:31, «Лада» — «Астраханочкая» — 21:23, «Ставрополье» — «Кубань» — 27:26, «Университет» — «Динамо» — 22:28, «Феникс» — ЦСКА — 22:38, «Университет» — «Астраханочка» — 27:41, «Лада» — «Динамо» — 19:15.

Чъэпыогъум и 6-м «Адыифыр» Ижевскэ икомандэу «Университетым» Мыекъуапэ щыIукIэщт.