Расул Гамзатовым и Кубок
ЗэлъашIэрэ тхакIоу Расул Гамзатовым ыцIэкIэ агъэнэфэгъэ Кубокым икъыдэхын фэгъэхьыгъэ шIэжь зэнэкъокъур волейболымкIэ Махачкала щыкIуагъ.
Урысыем волейболымкIэ иапшъэрэ купэу «Б-м» хэт командэхэр зэIукIэгъум хэлэжьагъэх. Къалэхэу Воронеж, Грозный, Ростов-на-Дону, Ставрополь, Мыекъуапэ, Махачкала яспортсменхэр Кубокым фэбэнагъэх.
— Зэнэкъокъум икъызэIухын, изэфэшIыжьын афэгъэхьыгъэ зэхахьэхэм Дагъыстан ихэбзэ къулыкъушIэхэр, спортым щыцIэрыIохэр къащыгущыIагъэх. Расул Гамзатовым ехьылIэгъэ гущыIэ фабэхэр къаIуагъэх. ХагъэунэфыкIырэ чIыпIэхэр къыдэзыхыгъэхэм афэгушIуагъэх, медальхэмрэ шIухьафтынхэмрэ аратыжьыгъэх, — къытиIуагъ Мыекъопэ волейбол командэу «Динамо-МГТУ-м» итренер шъхьаIэу, Адыгэ Республикэм изаслуженнэ тренерэу Павел Зборовскэм.
«Динамо-МГТУ-м» ешIэгъуи 5-м щыщэу 3-р къыхьыгъ, ящэнэрэ чIыпIэр къыдихыгъ. Махачкала апэрэ чIыпIэр ыхьыгъ, Воронеж ятIонэрэ хъугъэ.
ХэушъхьафыкIыгъэ шIухьафтынхэр ешIакIохэм афагъэшъошагъэх. «Динамо-МГТУ-м» икапитанэу Къошк Руслъан Iэгуаор аритынымкIэ къахэщыгъ, шIухьафтын къыфашIыгъ.