Адыгэ Республикэм физическэ культурэмрэ спортым­рэкIэ и Комитет иIэпыIэгъу хэлъэу Геническэ районым исхэр теннисым щыфэгъэсэгъэнхэмкIэ амалыкIэхэр яIэ хъугъэ.

Илъэси 5-кIэ узэкIэIэбэжьмэ Геническэ мы спорт лъэпкъым зыщиушъомбгъоу фежьагъ. Тренер IэпэIасэу Олег Петренкэм пэщэныгъэ адызэрихьэзэ а спорт лъэпкъымкIэ мастер хъунхэмкIэ кандидатхэр, апэрэ разряд зиIэ нэбгыри 10-м ехъу агъэхьазырыгъэх. Непэ кIэлэцIыкIу-ныбжьыкIэ спорт еджапIэм теннисымкIэ исекцие илъэси 7-м къыщегъэжьагъэу илъэс 17 зыныбжьхэм анэсыжьэу кIэлэцIыкIу 30-м ехъу къе­кIуалIэ.

Спорт Iэмэ-псымакIэу Адыгеим къыращыгъэхэм: ракеткэхэм, Iэгуаохэм, сеткэхэм яшIуагъэкIэ район гупчэм имызакъоу, районым инэмыкI псэупIэхэми а спорт лъэпкъым нахь защиушъомбгъун ылъэкIыщт.

Людмила Погасеева.