Дышъэм гугъэр егъэлъэшы
Европэм иныбжьыкIэхэм самбэмкIэ язэнэкъокъу Сербием икъалэу Новый Сад щыкIуагъ. Адыгеим щыщ кIалэхэу Кобл Рэмэзанрэ Наш Расулрэ Урысыем ихэшыпыкIыгъэ командэ хэтхэу алырэгъум щыбэнагъэх, Европэм идышъэ медальхэр къыдахыгъэх.
Кобл Рэмэзан кг 53-рэ къэзыщэчыхэрэм якуп иIэпэIэсэныгъэ къыщигъэлъэгъуагъ. ПэшIорыгъэшъ зэIукIэгъухэм текIоныгъэр къащыдихи, дышъэм фэгъэхьыгъэ зэнэкъокъум Армением ибэнакIо щыIукIагъ. Р. Коблым 2:0-у текIоныгъэр къыфагъэшъошагъ.
Наш Расул, кг 64-рэ, апэрэ зэIукIэгъухэм къащыублагъэу иухьазырыныгъэ дэгъоу къыгъэлъэгъуагъ. КIэух бэнэгъум Азербайджан къикIыгъэ бэнакIом щытекIуи, апэрэ чIыпIэр къыдихыгъ.
Нарт шъаохэу Кобл Рэмэзанрэ Наш Расулрэ Тэхъутэмыкъуае щапIугъэх. Адыгэ Республикэм изаслуженнэ тренерэу Джарымэкъо Рустамрэ тренерэу Джарымэкъо Азмэтрэ япащэхэу самбэм зыфагъасэ.
Тэхъутэмыкъуае ибэнэпIэ еджапIэ яIэпэIэсэныгъэ щыхагъахъозэ спортым илъэоянэхэм Кобл Рэмэзанрэ Наш Расулрэ арэкIох. Адыгэ Республикэм самбэмкIэ испорт еджапIэ ипащэу Делэкъо Адам къытиIуагъ бэнэкIо ныбжьыкIэхэм ясэнаущыгъэ къызэIуахынымкIэ амалышIухэр зэряIэхэр. Илъэс 21-м нэс зыныбжьхэм язэнэкъокъу хэлэжьэнхэм зыфагъэхьазырын ямурад.
— Сербием гъэхъагъэу щытшIыгъэр къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэтэгъэхьы, — игупшысэхэм тащигъэгъозагъ Адыгэ Республикэм изаслуженнэ тренерэу Джарымэкъо Рустам. Тинарт шъаохэм гъэзетеджэхэм ацIэкIэ тафэгушIо, ягъэхъагъэхэм ахагъэхъонэу тафэлъаIо.
ЕмтIылъ Нурбый.