Кушъхьэфэчъэ спортымкIэ я XXX-рэ зэнэкъокъоу «Темыр Кавказым илъэпкъхэм язэкъошныгъ» зыфиIорэм ия 4-рэ едзыгъо Темыр Осетием щыкIуагъ.

Владикавказ иурамхэм спортсменхэр ащы­зэнэкъокъугъэх, километрэ 75,6-рэ кушъ­хьэфачъэхэмкIэ къакIугъ. Воронеж щыщэу Антон Поповым апэрэ чIыпIэр къыдихыгъ. Самарэ хэкум щапIугъэ Роман Майкиныр ятIонэрэ хъугъэ. Белоруссием къикIыгъэ Ро­ман Тишковым ящэнэрэ чIыпIэр ыхьыгъ.

Зэнэкъокъум ия 5-рэ едзыгъо километри 117-рэ къыщакIугъ — Владикавказ къыщегъэжьагъэу псэупIэу Хазнидон нэс. Апэрэ чIыпIэр Антон Поповым фагъэшъошагъ. Тюмень хэкум щыщэу Александр Березняк ятIонэрэ, Свердлов хэкум зыщызыгъэсэрэ Артур Ершовыр ящэнэрэ хъугъэх.

Я 6-рэ едзыгъор Пятигорскэ икъушъхьэу Мэщыкъо щаухыгъ. Километри 129,5-рэ къы­закIум, Самарэ хэкум испортсменэу Артем Ныч апэрэ чIыпIэр къыдихыгъ.

Адыгэ Республикэм кушъхьэфэчъэ спортымкIэ и Федерацие ипащэу, зэхэщэкIо купым хэтэу Анатолий Лелюк къытиIуагъ Налщык къыщырагъэжьэгъэ зэнэкъокъур Iоны­­гъом и 16-м Мыекъуапэ зэрэщаухыщтыр, зэфэхьысыжьхэр зэрашIыщтхэр.