Аскэр идышъэ Iошъхьибл лъэпкъым иIошъхьэмаф
Филологие шIэныгъэхэмкIэ докторэу, АМАН-м иакадемикэу, нартоведэу ХьэдэгъэлIэ Аскэр къызыхъугъэр Iоныгъом и 20-м илъэси 100 зэрэхъугъэр республикэм игъэкIотыгъэу щыхагъэунэфыкIыщт.
Ащ ипэгъокIэу Дунэе шIэныгъэ симпозиумыр Къэралыгъо филармонием Iоныгъом и 15-м щырагъэкIокIыщт. Симпозиумым хьакIэу къырагъэблэгъагъэхэм ащыщ Сирием щыпсэурэ академикэу, профессорэу, географие шIэныгъэхэмкIэ докторэу Адыл Абдулсалам Лащэр. Ау Адыгеим къэкIон амал ащ зэримыIэм къыхэкIэу симпозиумым хэлажьэхэрэм афакIоу мы тхыгъэр къыгъэхьыгъ.
Шъуимафэ шIух, силъэпкъэгъухэр, синыбджэгъухэр!
Сэлам шъосэхы ХьэдэгъэлIэ Аскэр зыщымыгъупшэу, илэжьыгъэ кIэн тегущыIэн, гукъэкIыжь дахэкIэ къадэгощэн гухэлъ зиIэу непэ зэхахьэм (симпозиумым) хэлажьэхэрэм!
Сэлам ясэхы сэщ фэдэу гукIэ, псэкIэ къышъухэтэу, гъогууанэр зэпызымычышъугъэхэм!
Нартхэм яхьылIэгъэ къэбархэр, пщыналъэхэр тхылъибл хъоу къыздэкIыхэм, дышъэ Iошъхьиблым фэзгъадэхэу аущтэу тесIогъагъ. А цIэр Аскэр лъэшэу ыгу рихьи, тхылъым димыгъахьэзэ, къысэупчIыгъагъ: «Адыл, мы цIэ дахэр тыдэ къипхыгъа, cыдыми угу къыгъэкIыгъа?» — «Сызэрэгеографыр пщыгъупшэжьыгъа, Аскэр?» — есIожьыгъагъ ыкIи ар сыдми телъэдэгъэ гукъэкIэу зэрэщымытыри гурызгъэIогъагъ. Ащ лъапсэу фэхъугъагъэм шъори непэ шъущызгъэгъозэжьын.
А уахътэм шIэныгъэ зэфэшъхьаф заулэ тегъэонэу згъэIорышIэщтыгъэ: географиер, геологиер, адыгэ мифологиер, нарт шIэныгъэр, сянэ къимылъфыгъэ шынахьыжъэу а лъэхъаным, шъыпкъэр пIощтмэ, 1958-рэ илъэсым къыщегъэжьагъэу сиIэ хъущтми сшIэныеп Аскэр. Илъэс пшIыкIубгъурэ Аскэррэ сэрырэ тызэфэтхагъ. Зы тхьамафэ блэкIыныеп нартмэ янурэ пстэумкIи титхыгъэхэр зэблэмыкIхэу...
1967-рэ илъэсым, араб-израиль заом, тилъэпкъэгъу адыгэхэу Сирием и Джолан кIэи щыпсэущтыгъэхэр якъуаджэхэм егъэзыгъэкIэ къыдафыхи шъхьэхьыжъэу къызэнэхэм, къытлъыплъэнэу, къытфэгумэкIэу апэдэдэ къытфэкIогъэ адыгэр ХьэдэгъэлIэ Аскэр арыгъэ... 1969-рэ илъэсым мэзаем и 19-м апэрэу Дамаскэ (Шам) тыщызэрэлъэгъугъ.
«Iошъхьэмафэрэ Аскэррэ сыдым зэфихьырэ?» шъуIоу упчIэ къысэшъутымэ, хэзгъэунэфыкIы сшIоигъу: дунаим анахь къушъхьэ лъагэхэр зыпштэкIэ, я 10-р Iошъхьэмафэ ыубытэу шIэныгъэлэжьмэ алъытэ, ышъхьэшыгу метрэ 5642-м нэсэу ошъогум хэпыджэ. Улъыплъэныр зебгъажьэкIэ, ыпшъэкIэ (темырым), Псыфэбэ (Пятигорскэ) лъэныкъом ипхъыхьэгъэ чэпитфым ибын-унагъо фэдэу ынаIэ къатетэу къалъеплъыхэу къыпщэхъу. Сэри Iошъхьэмафэ Аскэр тетэу, Псыфэбэ Iошъхьитфым IошъхьитIу ахигъэхъожьыгъэу, гупсэфэу инартхэм къалъеплъыхэу къысщэхъу.
Геологием тыхэкIэу мифологиемкIэ зыдгъазэмэ, мышъэмрэ баджэмрэ язэнэкъокъоу IорIуатэмэ къахафэрэмэ афэдэу, Псыфабэ иIуашъхьэхэр адыгэм ичIыналъэ къызэрэтехьэгъэхэ шIыкIэр къытфеIуатэ.
Адыгэ мифологием, шIэныгъэлэжьхэр зэреплъырэмкIэ, дунаир пасэм къатищэу зэтетыгъэу ары: уашъор, чIыр, хьадрыхэр. Ащ фэдэ екIолIакIэм укъыпкъырыкIмэ, ХьэдэгъэлIэ Аскэр зыдигъэзагъэр рэхьатыпIэ фэхъунэу Тхьэшхом селъэIу.
Геологиемрэ мифологиемрэ къызэтынэкIэу сыгу къинэжьыгъэмэ къафэдгъэзэжьымэ, Аскэр дэслъэгъугъэмэ, къытфишIагъэмэ ащыщ мыр. 1977-рэ илъэсым Шам и Адыгэ ШIушIэ Хасэ ыгъэпсыгъэ гъогууанэм елъытыгъэу хэкужъым туристэу тыкъызэкIом, хэбзэ Iэшъхьэтетхэм Адыгеим тыкъырагъэхьан адэгъагъэп...
«Мыхэр туристхэп, адыгэ националистых нахь» аIоу, бзэгухьэмэ тхыгъэ шIукIае къытпатхыхьэгъагъ, ар имыкъоу турист гъуазэхэу нэбгырищи гъусэ къытфашIыгъагъ. «Cири- ем жъугъэзэжьымэ шъоркIэ нахьышIу» къытэзыIонхэри къахэкIыгъагъ.
Аскэр ащ ипэгъокIэу ышIагъэр шIошъгъэхъугъуаеу щытыгъ. ТелефонкIэ тиадыгэ турист куп яунэгъуацIэхэм къакIэупчIи, ытхыгъагъэх. ЕтIанэ шышъхьэIу мазэм и 6-м Адыгеим щыщэу нэбгырэ 50 фэдиз игъусэхэу тигъэпсэфыпIэу Псыфабэ къытфищэгъагъэх.
ШIуфэс зэтхи, зэпэгъокIын Iофхэр зызэшIокIым, Аскэррэ сэррэ хымэ хэгъэгу щыпсэухэрэмрэ хэкум исхэмрэ нэIуасэ зэфэтшIыгъагъэх. Зэунэкъощхэр нэку-нэпс хъугъэхэу IаплI зэращэкIэу, куп-купэу зэхэтыгъэх егъашIэм зэрэшIэщтыгъэхэм фэдэу. А теплъэм тэри тыгухэр цIыкIу къышIыгъэу, ау тигуапэу зэхэсыгъэх. Чэщ-зымафэм тызэхэтыгъ, тхьаумэфэ мафэу, мазэм и 7-м, егъашIэм зэрэмылъэгъужьынхэм тещыныхьэхэзэ Мыекъуапэ игъогу техьэжьыгъагъэх, тызэфалIэу тызэхэкIыжьыгъагъ.
ХьэдэгъэлIэ Аскэр нарт шэн къодыеп хэлъыгъэр, нарт гу пытэкIэ игъашIэ ихьыгъ. Хэбзэ дахэкIэ, бзэ шъабэкIэ, цIыкIуи ини ыгъашIоу адэпсэущтыгъ, сэмэркъэу-щхэн тIэкIуи гуадзэ хэубэнэу афишIыщтыгъ... Ащ годзэжьыпхъэу, хэбгъэхъожьэу къэIогъэн фаеу слъэгъурэр самбырыгъэмрэ щэIагъэу хэлъыгъэмрэ ары. Аужырэу Аскэр дэслъэгъугъэр шIурышIукIэ cщыгъупшэжьынэу щытэп: 1995-рэ илъэсым Мыекъуапэ, шIэныгъэхэмкIэ Дунэе Адыгэ Академием изэфэс сызырагъэблагъэм, ХьэдэгъэлIэ Аскэр, имыхабзэу, «укъэкIон фай» ыIуи бэрэ къысфигъэпытагъ. Сыкъэси, апэрэ зэхахьэм тыкIонэу зыдгъэхьазырызэ, ошIэ-дэмышIэу, къыщышIыгъэр сымышIэу Аскэр къызэIэхьагъ. Телефоным лъыIэси зыгорэм урысыбзэкIэ дэгущыIагъ. ТIэкIу сыкъэгумэкIи хъурэмкIэ сызеупчIым сигъэIасэу къысиIуагъ: «УмыгумэкI ыкIи умыгуI, Адыл, сыгу зэрихабзэу, загъорэ тIэкIу къызэIэхьэ».
Аскэр пIэкIорым хэлъэу, ыIэ сIотэу сыщысызэ пчъэм иодыджын къытеуагъ, сызщыпкIи зыIусэхым, бзылъфыгъитIу фыжьыбзэкIэ фэпагъэхэу Iутхэу слъэгъугъэ, къысэмыупчIыхэу гузэжъогъур ямафэу Аскэр екIуалIэхи, урысыбзэкIэ зыгорэхэр раIуагъ. РашIэфыщтыри аухи, Аскэр къызэкIэкIыжьыфэкIэ паплъэхэу щытыгъэх. ТинасыпкIэ Аскэр къызэкIэкIыжьи, дэхэкIаеу къэгущыIэу къэтIысыжьыгъ. ЕтIани бзылъфыгъитIум уцхэр Аскэр къырати, зэригъэфедэщтхэри къыфагъэнафи, садэкIуатэзэ, икIыжьыгъэх. Пчъэм дэжь адыгэ бзылъфыгъэм мэкъэ шъабэкIэ «унаIэ Аскэр тегъэт, мэфэ заулэкIэ зерэмыгъэулэужь» къысиIуагъ.
Аскэр къеутэкIыгъэм къыхэкIэу, зэфэсым тымыкIожьынэу зесэIом, губж тIэкIу хэлъэу къысфидагъэп. «НекIо, Аулъэр къытэжэ» ыIуи, зытымыгъэгужъоу талъыдэкIыгъ. Аулъэ Малыч урам гъунэм къытажэу Iутыгъ, къытэгыизэ машинэм тыдитIысхьи, зэфэсым тыкIуагъ.
Апэрэ мафэм Академием иблэкIыгъэ илъэс игъэхъагъэхэм атегущыIагъэх, ятIонэрэ мафэм Академием аштагъэу, къыхагъэхьащт шIэныгъэлэжьхэр къырагъэблэгъагъэу ацIэхэр Нэфышъэ Адам къыIохэзэ, ядипломхэр аритыщтыгъ. Сэ сцIэ къызеIом, сыщыгъуазэу щытыгъэпти, хъурэр къызгурыIуагъэп, ау Аскэррэ МэщбэшIэ Исхьакърэ къысэтIыргухи, сшIошъ мыхъоу, дипломыр къысатыгъ. Ащыгъум къызгурыIуагъ Аскэр Сирием сыкъикIэу Мыекъуапэ сыкъэкIоным зыкIыфэгуIэщтыгъэр. Ежьым Iофыр зэкIэ зэригъэфагъэу къычIэкIыгъ. СиIэ дипломхэм непэ анахь згъэлъапIэу сиIэр а дипломыр ары.
Аскэр игугъу непэ къызашIыкIэ, къытфиугъоижьыгъэ нарт IорIотэ тхылъиблыр гъусэ фэтэшIы зэпыт, Iошъхьэмафэ Псыфэбэ Iуашъхьэхэм къызэрахаплъэрэм фэдэу непэ адыгэ ябынкIи Аскэр къытхаплъэу къысщэхъу.
ХьэдэгъэлIэ Аскэр нартхэм ялIыхъужъ хъугъэ-шIагъэхэр къытфиугъоижьхи, адыгэм итхыдэжъ къытфиухъумэжьыгъэ къодыеп. Адыгэм ифольклор, ибзэшIэныгъэ, ипсэукIэ-ха- бзэ зэрэдунаеу къыфигъэнагъ. Адыгэ Iофым ыпсэ емыблэжьэу, шъхьэузэу къыфихьыщтыми ымыгъэщынэу, нартыгукIэ пылъыгъ. Арын фай непэ адыгэ ябынкIэ нарт лIыхъужъэу Аскэр зыкIэтлъытэрэр.
Лащ Адыль Абдулсалам.
Академик, профессор, географие шIэныгъэхэмкIэ доктор.
Сириер.
Адыгеим и ЛIышъхьэ шIуфэс гущыIэхэмкIэ зафигъэзагъ
Филологие шIэныгъэхэмкIэ докторэу, АМАН-м иакадемикэу, нартоведэу ХьэдэгъэлIэ Аскэр къызыхъугъэр илъэси 100 зэрэхъурэм фэгъэхьыгъэ Дунэе шIэныгъэ симпозиумым хэлажьэхэрэм, зэхэщакIохэм шIуфэс гущыIэхэмкIэ закъыфигъэзагъ Адыгэ Республикэм и ЛIышъхьэу КъумпIыл Мурат. Iофтхьабзэм шIуагъэ къытынэу, зэдэгущыIэгъу гъэшIэгъонхэр щыIэнхэу къафэлъэIуагъ. Республикэм ипащэ къызэриIуагъэмкIэ, ХьэдэгъэлIэ Аскэр иIофшIагъэхэм къащигъэнэфагъ эпосэу «Нартхэм» адыгэ купкI зэриIэр ыкIи ар адыгэхэм якультурнэ код исаугъэт хьалэмэтэу зэрэщытыр.
А. ХьэдэгъалIэм шIэныгъэм ылъэныкъокIэ Iофышхоу ышIагъэм къыкIэлъыкIуагъэх тын лъапIэхэр, Адыгэ Республикэм и Къэралыгъо шIухьафтын, медалэу «Адыгеим и Щытхъузехь», «Урысыем культурэмкIэ изаслуженнэ IофышI» зыфиIохэрэр. Лъэпкъ эпосэу «Нартхэр» дунэе культурэм щыщ хъугъэ.— Тиэпос къэтыухъумэн, тыушэтын ыкIи ыпэкIэ лъыдгъэкIотэн фае. Гуманитар ушэтынхэмкIэ Адыгэ республикэ институтым ишIэныгъэлэжьхэм, Урысыем ыкIи дунаим янартоведхэм яIофшIагъэхэм осэшхо афэтэшIы, ахэм тапэкIи яIофшIэн зэрэлъагъэкIотэщтым тицыхьэ телъ. Адыгэ фольклорыр къэухъумэгъэным ыкIи лъыгъэкIотэгъэным зэрэтфэлъэкIэу тэри тыдэлэжьэщт, — къыхигъэщыгъ республикэм ипащэ.