«АГУ-Адыиф» Мыекъуапэ – «Луч» Москва – 20:25 (11:14). Iоныгъом и 12-м Кобл Якъубэ ыцIэ зыхьырэ спорт Унэшхом щызэдешIагъэх.

«Адыиф»: къэлэпчъэIутхэр: Якупова, Баскакова; ешIакIохэр, къэлапчъэм Iэгуаор зэрэдадзагъэр: Краснокутская – 2, Никулина – 2, Кириллова, Колодяжная – 1, Морозова – 3, Мещерякова – 3, Куцевалова – 2, Казиханова, Поршина, Голунова – 4, Краснова, Кожубекова – 2, Сиднина – 1.

Урысыем гандболымкIэ изэнэкъокъу хэлэжьэрэ бзылъфыгъэ гандбол клубхэм 2022 – 2023-рэ илъэс ешIэгъур аублагъ. «Адыифым» иапэрэ зэIукIэгъу Мыекъуапэ щы­кIуагъ. ЕшIэгъур заублэм къэлапчъэм Iэгуаор анахьыбэрэ дэзыдзэрэмэ ащыщыгъ Юлия Баевар. Мыекъуапэ щапIугъэ пшъашъэр Москва рагъэблэгъагъ, иIэпэIэсэныгъэ хегъа­хъо.

Пчъагъэр зэрэлъыкIуатэщтыгъэм тигъэ­рэхьатыщтыгъэп. Я 12-рэ такъикъым 6:5-у «Адыифым» къыхьыщтыгъ, ау текIоныгъэр зыIэкIигъэкIыгъ. Я 21-рэ такъикъым 9:9, я 30-рэ такъикъым 11:14 пчъагъэр хъугъэ. Ащ ыуж 13:17, 16:22, 19:23-рэ. Я 60-рэ такъи­къым 20:24, 20:25.

«Адыифыр» бэрэ ыпэкIэ илъыщтыгъэми, хъагъэм Iэгуаор ридзэным фэшI амалэу ыгъэ­федэщтыгъэр макIэ. ТиешIакIохэр, анахь макIэмэ, гъогогъуи 5 язакъоу къэлэпчъэIутым екIугъэх, ау къэлапчъэм Iэгуаор дадзэн алъэ­кIыгъэп. Екатерина Голуновам хъагъэм Iэгуа­ор ридзэнымкIэ щысэшIу къыгъэлъагъо­щтыгъ. Арэу щытми, хьакIэхэр текIоныгъэм нахь фэхьазырхэу къэлъэгъуагъэх.

Ю. Баевам гъогогъуи 6, Т. Захаровам 5, Е. Махатадзе 5 «Адыифым» икъэлапчъэ Iэгуаор дадзагъ. «Лучыр» нахь псынкIэу, шъуам­бгъоу ешIэщтыгъ. «Адыифыр» ошIэ-дэмышIэу ыпэкIэ илъыным фэбэнагъэп. Ухъумэн Iофхэр зэригъэцакIэхэрэм тимыгъэразэу къыхэкIыгъ. А. Куцеваловам, Ю. Кожубековам, Е. Краснокутскаям, А. Красновам, нэмыкIхэм нахьыбэкIэ тагъэгугъэ. Д. Никулинар, А. Казанджян, Д. Казихановар, фэшъхьафхэр къэлапчъэм благъэу зэрекIухэрэм дакIоу, хъагъэм Iэгуа­ор радзэнымкIэ шIыкIэшIухэр къагъэлъэгъон­хэу афэтэIо.

Пресс-зэIукIэр

— Гуетыныгъэ ахэлъэу типшъашъэхэр ешIагъэх, ау къэлапчъэм Iэгуаор дадзэнымкIэ гъэхъагъэу яIэр макIэ. ЩыкIагъэхэм ядэгъэзыжьын Iоф дэтшIэщт, — къыти­Iуагъ «Адыифым» итренер шъхьа­Iэу Александр Реввэ.

ЕшIэгъухэр

«Динамо» — «Феникс» — 29:29, «Университет» — «Лада» — 26:23, «Балтийская заря» — «Ростов-Дон» — 25:30, «Кубань» — «Звезда» — 31:36. Тыгъуасэ «Адыифыр» «Звездам» Мые­къуапэ щыIукIагъ.