Хьамырзэкъо Нурыет осэшIхэм ахэхьагъ
Урысые зэнэкъокъоу «Ныдэлъфыбзэм ыкIи литературэм икIэлэегъэджэ анахь дэгъу» зыфиIорэм иаужырэ едзыгъо Iоныгъом и 12-м щегъэжьагъэу и 18-м нэс Ставрополь краим щэкIо. Къэралыгъом ишъолъыр 69-мэ ялIыкIохэр ащ хэлажьэх.
ЗэхэщакIохэм къырагъэблэгъагъэу зэнэкъокъум иосэшIхэм ахэхьагъ Адыгэ къэралыгъо университетым адыгэ филологиемрэ культурэмрэкIэ ифакультет идеканэу Хьамырзэкъо Нурыет. Адыгеир зэнэкъокъум къыщызыгъэлъэгъощтыр Адыгэ къэралыгъо университетыр къэзыухыгъэу, къуаджэу Гъобэкъуае дэт гурыт еджапIэу N 6-м икIэлэегъаджэу Тхьаркъохъо Сусан.
Мыщ фэдэ зэнэкъокъу апэрэу къэралыгъом щызэхащэ. Ащ кIэщакIо фэхъугъ Урысые Федерацием просвещениемкIэ и Министерствэ, Iофтхьабзэм иоператорыр — УФ-м щыпсэурэ лъэпкъхэм яныдэлъфыбзэхэм и Федеральнэ институт.
Зэнэкъокъум пшъэрылъ шъхьаIэу иIэр ныдэлъфыбзэм рылэжьэрэ кIэлэегъаджэхэм IэпыIэгъу афэхъугъэныр, ахэм опытэу аIэкIэлъыр гъэфедэгъэныр ыкIи зегъэушъомбгъугъэныр ары.
Аужырэ федеральнэ уцугъор лъэныкъуитIоу гощыгъэ. Ащ шъолъырхэм ащатекIуагъэхэр щызэIукIэщтых, яшIэныгъэхэмкIэ заушэтыщт, нэужым зэфэхьысыжьхэр ашIыщтых, анахь дэгъур къэнэфэщт.
(Тикорр.).