Iоныгъом и 15-м Адыгэ Республикэм и Къэралыгъо фи­лармоние щыкIощт пчыхьэзэхахьэр лъэпкъ искусствэр зыгу рихьыхэрэм ашIогъэшIэгъон хъущт.

Красноярскэ и Къэралыгъо академическэ къэшъокIо ансамблэу Михаил Годенкэм ыцIэ зыхьырэм­рэ Адыгэ Республикэм иорэдыIо-къэшъокIо ансамблэу «Ислъамыемрэ» зэгъусэхэу концерт къа­тыщт.

«Вместе мы — Россия!» зыфиIорэ хэгъэгу Iофтхьабзэр щыIэныгъэм щыпхыращызэ, творческэ купхэм концертхэр, пчыхьэзэха­хьэхэр зэхащэх. Лъэпкъ искусствэм ибаиныгъэ цIыф­хэм нахь куоу алъагъэIэсыным пылъых.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэу дунаим щызэлъашIэхэрэ ансамблэхэр Мыекъуапэ щызэIукIэщтых. Михаил Годенкэм ыцIэ зыхьырэ творческэ купэу Сыбыр къикIыгъэм икъа­шъохэмкIэ тигъэгушIощт.

Концертым пэсэрэ ­адыгэ орэдхэр, фольклорыр лъапсэ зыфэхъугъэ произведениехэу компо­зиторэу Нэхэе Аслъан ан­самблэм пае зэригъэфагъэхэр щыIущтых.

— Тызэгъусэу апэрэу концертыр Мыекъуапэ къы­щыттыщт, — къытиIуагъ Адыгэ Республикэм и Къэралыгъо орэдыIо­-къэ­шъокIо ансамблэу «Ислъамыем» ихудожест­веннэ пащэу, Урысыем, Адыгеим, Къэбэртэе-Бэлъ­къарым, Къэрэщэе­-Щэр­джэсым яна­роднэ арти­стэу, композиторэу Дмит­рий Шостакович ыцIэкIэ агъэнэфэгъэ шIу­хьаф­ты­ныр къызыфа­гъэ­шъоша­гъэу Нэхэе Ас­лъан. — Ис­кусствэм лъэпкъхэр зэ­фещэх. Адыгэ музыкальнэ искусствэр Европэм икультурэ щашIэ. «Ислъамыер» Тыркуем, Италием, Польшэм, Израиль, Абхъазым, нэмыкIхэм ащыIагъ, Урысыем ишъолъырхэм шIукIэ тащашIэ.

Лъэпкъ искусствэр зы­шIо­гъэшIэгъонхэр пчыхьэзэхахьэм рагъэбла­гъэх.