Адыгэ щагур дахэ
Узыщыщ лъэпкъым ыцIэ дахэу зыщыраIорэ зэхахьэм ухэлажьэ зыхъукIэ, апэу узэгупшысэрэр цIыфхэм яIофшIагъ.
Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэу адыгэ къуаем ия XI-рэ фестиваль-зэнэкъокъу Мыекъопэ районым ипсэупIэу Дахъо игъэхъунэ зэрэщыкIуагъэр дунэе къэбар хъугъэ. Москва, Казахстан, Бурятием, Къалмыкъым, Кавказ шъолъырым къарыкIыгъэхэм зэхахьэм щалъэгъугъэр лъэшэу агу рихьыгъ.
Республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан фестиваль-зэнэкъокъум иосэшI куп хэтхэу Ольга Гавшинам, Мэт Иринэ, Джарымэ Бэлэ ягъусэу адыгэ къуаем идэгъугъэ къешIэкIыгъэ Iофыгъохэм къатегущыIагъ.
— Тятэжъ пIашъэхэм япсэукIагъэр, адыгэ щагухэм гъэпсыкIэу яIагъэр фестивалым тыгу къегъэкIыжьых, — къеIуатэ ЛIымыщэкъо Рэмэзан. — Зэнэкъокъум хэлэжьагъэхэм тарихъыр, лъэпкъ шэн-хабзэхэр дэгъоу зэрагъэшIагъэхэу тэлъытэ. Къалэхэм, районхэм хэушъхьафыкIыгъэ щагухэр зэнэкъокъум къыщызэIуахыгъэх. Тэ, осэшIхэм, зэгъэпшэнхэр зытэшIыхэм, Тэхъутэмыкъое районым апэрэ чIыпIэр фэдгъэшъошагъ.
Щагум узэрэдахьэу адыгэ псэукIэр нэгум къыкIэуцо. Мэкъумэщ унагъом ищыIакIэ бысымхэм къыпфаIотэным фэхьазырых. ПщэрыхьапIэр, хьакур лъэгъупхъэх. Бзылъфыгъэхэр нэгушIох, зэкIужьэу фэпагъэх. ЗэгурыIоныгъэм къыпкъырыкIырэ Iофыр псынкIэу лъагъэкIуатэ. Бысымхэм гущыIэр агъэлъапIэ, Iанэм икъызэIухын дэгуIэх. ХьакIэм тIысыпIэ хэхыгъэр фагъэшъуашэ. Пщынаор, джэгуакIохэр къэшъоным фэхьазырых, гур зыфащэу мэуджых. Майкэ гъожьхэр ащыгъхэу Тэхъутэмыкъое районым щыщхэр зэIукIэгъухэм ахэлажьэх.
— Типщынаохэм, жъыум фэгъэзагъэхэм мэфэкI зэхахьэр къагъэдахэ, — тизэдэгущыIэгъу лъегъэкIуатэ Адыгэ Республикэм изаслуженнэ артистэу, Тэхъутэмыкъое районым ипщынэо цIэрыIоу Къэлэкъутэкъо Инвер. — Адыгэмэ яискусствэ зэрэбаир зэхахьэм къыщагъэлъагъо.
Адыгэ орэдышъом дырагъаштэзэ, урысхэр, нэмыкI лъэпкъхэр адыгэ щагум ыпашъхьэ щыуджыхэу тлъэгъугъэ.
— Илъэс къэс фестивалыр нахь гъэшIэгъон мэхъу. Ти ЛIышъхьэу КъумпIыл Мурат щагухэм адахьэзэ пщэрыхьакIохэм, зэхэщакIохэм адэгущыIэ, Iофым фегъэчэфых, — къытиIуагъ Тэхъутэмыкъое районым иадминистрацие культурэмкIэ игъэIорышIапIэ ипащэу, Адыгэ Республикэм искусствэхэмкIэ изаслуженнэ IофышIэшхоу Ацумыжъ Рустам. — Тыркуем тыкIуагъэми, Урысыем ишъолъырхэм тащыIэми, адыгэ къуаем икъэбар къаIуатэу бэрэ зэхэтэхы.
Фестивалым Тэхъутэмыкъое районым культурэмкIэ иIофышIэхэм IэпэIэсэныгъэшхо къыщагъэлъэгъуагъ. Лъэцэр Римэ къыIогъэ орэдхэр, ансамблэхэм агъэжъынчыгъэ адыгэ мэкъамэхэр гум рихьыгъэх.