Адыгэ Республикэм футболымкIэ испорт еджапIэ зыщызыгъэсэгъэ Натхъо Амир Хабаровскэ икомандэу СКА-м щешIэнэу ригъэжьагъ.

Натхъо Амир Мыекъуапэ къыщыхъугъ, спорт унагъом щапIугъ, ятэу Адам спортышхом щыцIэрыIу. «Кубань» Краснодар хэтэу СССР-м изэнэкъо­къоу апшъэрэ купым щыкIорэм щешIагъ. Мыекъопэ «Зэкъошныгъэм» илъэсыбэрэ IэпэIэсэныгъэ ин къыщигъэлъэгъуагъ. Клубым ипащэу, тренер шъхьа­Iэу щытыгъ. Израиль ит адыгэ къуаджэу Кфар-Камэ икомандэ итренерэу Iоф ышIагъ. Адыгэ­хэмкIэ «ФутболымкIэ спортым имастер» зыфиIорэ щытхъуцIэр апэу къызыфаусыгъэр Натхъо Адам.

Дунаим щыцIэрыIо футбол клубэу «Барселонэм» иныб­жьыкIэ командэ Натхъо Амир щешIагъ, клубым изыгъэсапIэ иIэпэIэсэныгъэ щыхигъэхъуагъ. Урысыем къызегъэзэжьым ЦСКА-м, «Краснодар», «Локомотив», нэмыкIхэм ащешIагъ. Мыекъопэ «Зэкъошныгъэм» зэрэхэтыгъэр шIукIэ ыгу къе­гъэкIыжьы. Аужырэ илъэсхэм Эстонием щыIагъ.

СКА Хабаровск Урысыем изэнэкъокъоу апэрэ купым щыкIорэм хэлажьэ, апшъэрэ лигэм хэхьаным фэбанэ. Тренерэу Р. Шароновыр япащэу ешIакIохэр ямурадхэм афэкIох.

Натхъо Амир иапэрэ трене­рэу, Адыгэ Республикэм изаслуженнэ тренерэу Александр Пахомкиным, футболым фэзыгъэсагъэхэм лъэшэу афэраз. Спортышхом нахь цIэрыIо щыхъунэу нарт шъаом фэтэIо.

Сурэтым итхэр: Натхъохэу Адам ыкIи Амир.