Музеир зэтырагъэпсыхьэ
Адыгэкъалэ краеведениемкIэ имузей лъэпкъ проектэу «Культурэм» зэрэхэлажьэрэм ишIуагъэкIэ икъэгъэлъэгъуапIэхэр нахь зэтегъэпсыхьагъэ хъугъэх.
КъэгъэлъэгъуапIэхэр лъэхъаным дештэх. Къызэрэнэфыхэрэм фэшI музеим икъэгъэлъэгъонхэр нахьышIоу цIыфхэм алъэгъух. ГъучIым хашIыкIыгъэ шкафхэм музеим иIофшIэн ехьылIэгъэ тхылъхэр, тарихъым хэхьэгъэ пкъыгъохэр къащаухъумэх.
Адыгеим итарихъ нахь куоу зыщызыгъэгъуазэ зышIоигъохэм апае лъэпкъым имылъку-культурнэ кIэн фэгъэхьыгъэ къэгъэлъэгъоныр агъэпсыгъ. КъэгъэлъэгъуапIэхэм, пкъыгъохэм ягъэтIылъыпIэхэм сплит-системэхэр ачIагъэуцуагъэх. Музеим къычIахьэхэрэмкIи ахэр Iэрыфэ— гъух.
Музеим иIофышIэхэм кIэлэцIыкIухэм, кIэлэеджакIохэм апае экскурсиехэр зэхащэх. Тарихъым, культурэм ясаугъэтхэр, чIыпIэ гъэшIэгъонхэр арагъэлъэгъух.
Лъэпкъ проектэу «Культурэм» къафитIупщыгъэ ахъщэмкIэ радио гидхэр ащэфыгъэх, лъэсрыкIо зекIохэр зэхащэх.
— Адыгэкъалэ имузей хъулъфыгъэ ыкIи бзылъфыгъэ адыгэ шъуашэхэр икъэгъэлъэгъонхэм ахигъэхъощтых, тарихъ къэбарэу аугъоигъэхэр цIыфхэм алъагъэIэсыщтых, — къыIуагъ краеведческэ музеим ипащэу З. ХьадэгъалIэм.
— Муниципальнэ музейхэм якъэгъэлъэгъонхэр лъэхъаным диштэу зэхэщэгъэнхэмкIэ модельнэ шIыкIэхэр агъэфедэх, — къеIуатэ Адыгэ Республикэм культурэмкIэ и Министерствэ икъулыкъушIэу, тарихъ шIэныгъэхэмкIэ кандидатэу Теуцожь Нуриет. — КIэлэцIыкIухэри, зыныбжь хэкIотагъэхэри къэгъэлъэгъонхэм яплъыщтых, тарихъыр, культурэр нахьышIоу зэрагъэшIэщтых. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэ зэхэхьэ гъэшIэгъонхэр зэхащэщтых.