ГъукIэхэм ямашIо кIуасэрэп
ГъукIэн Iофхэм апылъ цIыф IэпэIасэхэр псэупIэу Мэзмай щызэхащэрэ фестивалэу «Пшызэ шъолъырым игъукIэхэр» зыфиIорэм къызекIуалIэхэрэр мыгъэ илъэс 14 хъугъэ.
Ахэр архитектурнэ-этнографическэ музеим щызэIокIэх, ижъырэ кIыщхэм ащашIыгъэгъэ IэшIагъэхэр зэрагъэлъэгъух, зэнэкъокъум хэлажьэхэзэ гъучI такъырыр агъэплъы, афытэ, хашIыкIыгъэ пкъыгъохэр зыгу рихьыхэрэм ермэлыкъэу зэхащэрэм щащэфых.
2008-рэ илъэсым апэрэ фестивалыр зэхэзыщэгъагъэр сурэтышI цIэрыIоу, гъукIэу, гъучIыри, тыжьыныри, дышъэри зэрэфаеу зыгъэIорышIэхэрэ Михаил Скворцовыр ары.
Ар бэрэ къалэу Краснодар дэсыгъ, Урысыем исурэтышIхэм я Союз хэт, Краснодар краим исурэтышIхэм я Совет итхьамэтагъ. ИIэшIагъэхэр Европэм, США-м анэсыгъэх, Третьяковскэ галереем, къэралыгъо музей зэфэшъхьафхэм ачIэлъых.
Михаил ренэу ыгукIэ къыздырихьакIэу, зыкIэхъопсыщтыгъэ псэукIэ-щыIакIэр мыщ щигъотыгъ. ИIэнатIэ ыгъэтIылъи, Мэзмае щыпсэунэу къэкIожьыгъ. Ишъхьэгъусэу Ольгэрэ ежьыррэ пшъэшъитIу зэдапIу.
Хабзэ зэрэфэхъугъэу, Михаил Скворцовым илъэс къэс Урысыем и Къыблэ шъолъыр щыпсэухэу, гъукIэн Iофым тегъэпсыхьагъэхэр къырегъэблагъэх. Нахь чыжьэу къикIыхэрэри ахэтых, ахэм япчъагъэ къыхэхъо. НахьыбэрэмкIэ хьакIэхэр къыздикIыхэрэр Ставрополь, Ростов, Краснодар краир, Адыгеир, Къэбэртэе-Бэлъкъарыр, Москва ыкIи Санкт-Петербург.
АщыгъупшагъэпЛъэхъанэу тызхэтым гъукIэныр хэзыжьыпагъэу, игугъи амышIыжьэу зылъытэхэрэр нахьыб. Ау лъэпкъ зэфэшъхьафхэм ятарихъ ащ чIыпIэ гъэнэфагъэ щиубытэу зэрэщытыр къыгъэнафэу кIыщхэр зыдэт псэупIэхэр джыри щыIэх.
Пэсэрэ адыгэхэри, къэзэкъхэри, дагъыстанхэри, нэмыкI лъэпкъхэу Кавказым щыпсэухэрэри гъукIэн Iофым есагъэхэу, ар ящыIэныгъэ хэтэу лIэшIэгъухэр текIыгъэх. Унагъохэм ащагъэфедэрэ хьакъу-шыкъухэр, хьап-щыпхэр ахэм аIэкIэ ашIыщтыгъэх. ГъукIэ IэпэIасэхэр къуаджэхэми къутырхэми адэсыгъэх, ахэм унэгъо хъызмэтым ищыкIэгъэ шIуанэхэр, гъупчъэхэр, къазгъырхэр, шыхэм апае налхэр, пхъэIашэхэр, нэмыкIхэри цIыфхэм афашIыщтыгъэх.
Экспонатхэм яшъэфхэр
Этнографическэ музееу Мэзмае дэтыр Михаил Скворцовым ежь ыIэкIэ ыгъэпсыгъ, экспонатэу чIэлъхэр зэкIэ экспедицие пчъагъэхэр зэхищэхэзэ къыугъоигъэх, зэрэ Кавказэу къыкIухьагъ, гъукIэным хэшIыкI фызиIэ цIыфхэм аIукIагъ, нэIуасэ зэфэхъугъэх.
ГъучIым хэшIыкIыгъэ пкъыгъо пэпчъ гъашIэм къыхэхъухьэгъэ хъугъэ-шIагъэ епхыгъ, къэбарыжъ пылъ, игуапэу ежьым ахэр хьакIэхэм къафеIуатэх. ГущыIэм пае, кIыщхэм машIом ащызэрэкIапщэщтыгъэхэ щыдыбжьэу «1903-рэ илъэс» зытедзагъэр щыплъэгъущт.
Мыжъолъ-гъэчанылъэ станокхэр чIэтых, гъучIым хэшIыкIыгъэ хьаку лъэкъуищхэр (тренога) щыолъэгъух, кавказ лъэпкъхэм, адыгэхэри зэрахэтхэу, агъэфедэщтыгъэ гъучI пшъэхъухэу джэныкъо машIом ышъхьагъ палъэщтыгъэхэр (ахэм щыуан къопсыр ашIуахадзэщтыгъ), нэмыкI пкъыгъожъхэр блэкIыгъэ зэманхэм янэпэеплъых. Экспонатхэм ахэр зышIыгъэ гъукIэхэм ятамыгъэхэр зытедзагъэхэр ахэтых.
Ахэр хэхыгъэ цIыфых
ГъукIэхэм яхьылIэгъэ къэбархэу М. Скворцовым хьакIэхэм къафиIуатэхэрэм ащызэхэпхыщт чылэхэм адэсыгъэ гъукIэхэм ядунай захъожьыкIэ цIыфхэр зэрэзекIощтыгъэхэ шIыкIэр. ЩымыIэжьым исыдж кIыщым къычIахыжьыщтыгъ. Ар гъучIыч хъагъэм е пхъэмбгъум хэшIыкIыгъэ къэмланэу шъхьэтеIубэ зиIэм дагъэуцощтыгъ. КIэу хадзыгъэ гъукIэм ар ратыщтыгъ.
Бзылъфыгъэхэр кIыщым чIагъахьэщтыгъэхэп, гъукIэм Iоф ышIэ зыхъукIэ хэти ыгъэгумэкIынэу щытыгъэп. Ежьыри щыгъын къабзэ щымыгъэу кIыщым чIахьэщтыгъэп. ГъукIэхэм пкъыгъо зэфэшъхьафхэр гъучIым зэрэхашIыкIыхэрэм цIыфхэр еплъыфэхэ апэрэу фестивалым къекIолIагъэхэм музеим гъучIым хэшIыкIыгъэу пкъыгъоу чIэтхэр зэрагъэлъэгъугъэх.
Ахэм якъэбархэу Михаил Скворцовым къафиIуатэхэрэм ашIогъэшIэгъонэу ядэIух. 1840-рэ илъэсхэм агъэфедэщтыгъэ кIыщыр лъэшэу ащ егъэлъапIэ. Мыекъуапэ щыщ гъукIэу Николай Сапельниковым икIыщ 1903-рэ илъэсым къыщегъэжьагъэу щагъэфедэщтыгъэ щыдыбжьыр, мыжъолъ станокыр, я 19-рэ лIэшIэгъум Iоф зэрашIэщтыгъэ гъучI уатэхэр къызэлъэкIох. УмыгъэшIэгъонхэ плъэкIырэп Нижегородскэ гъукIэ полкым агъэкощырэ кIыщэу чертежыжъхэмкIэ зэхагъэуцожьыгъэр, станицэу Царскэм щыщ гъукIэу Рябушенкэм исыдж, нэмыкIхэри.
Музеим ихъугъэ-шIэгъэ тхылъ дэхьэгъэ къэбархэм ащыщ я 19-рэ лIэшIэгъум Мыекъуапэ щыпсэунэу къэкощыжьыгъэгъэ Егор Жилиным фэгъэхьыгъэр. ИлIакъокIэ гъукIэн Iофыр апэу езгъэжьэгъагъэр ежьыр ары. Ащ къытекIыгъэ лIэуж 11-р гъукIэ IэпэIасэхэу къалэм щыпсэугъэх. Джащ фэдагъэх Гапошинхэри, яхъулъфыгъэхэр гъукIагъэх, яунагъокIэ лIэкъо тамыгъэ яIагъ.
ГъэшIэгъонэу кIуагъэ
Фестивалым гъукIэ нэбгырэ 40-м ехъу хэлэжьагъ. Ахэм афэшъхьафэу къошынгъажъэхэм, хэзыдыкIыхэрэм, нэмыкI IэпэIэсэныгъэ зыхэлъхэми къагъэхьазырыгъэ пкъыгъохэр къагъэлъэгъуагъэх. Ермэлыкъэу зэхащэгъагъэм ахэр щащэнхэ фитыгъэх, ащэфыгъэри макIэп. ЯтIэм хашIыкIи агъэжъэжьыгъэ хьакъу-шыкъухэр гъэшIэгъоных, нэр пIэпахы.
Зэнэкъокъухэм ащытекIогъэ IэпэIасэхэм мастер-классхэр къатыгъэх. ГъукIэныр зыгу рихьыхэрэм гъучIым Iоф зэрэдэпшIэщтыр къарагъэлъэгъугъ.
Фестивалым къекIолIагъэхэм концерт къафатыгъ, загъэпсэфыгъ, Мэзмай къэзыуцухьэрэ дунаим идэхагъэ ыумэхъыгъэхэу, джыри къызэрэкIощтхэмкIэ теубытагъэ ашIыгъэу цIыфхэр зэбгырыкIыжьыгъэх. ЗэхэщакIохэм зэрафэразэхэр ахэм къараIуагъ.
Шъаукъо Аслъангуащ.