ХэкIодэщт пчъагъэм мэхьанэ ратырэп
«США-р ыкIи НАТО-р ыгъэгумэкIыхэрэп украинцэ пчъагъэу хэкIодэщтым ибагъэ: граждан цIыфхэр, бзылъфыгъэхэр, кIэлэцIыкIухэр, дзэкIолIхэр — тэркIэ ащ мэхьанэ иIэп».
США-м иэкс-сенаторэу Ричард Блэк ыпэкIэ фэдэу джыри къыIуагъ «цивилизованнэ» къэралыгъохэм ямурад къадэхъунымкIэ шIыкIэу агъэфедэхэрэр. IущхыпцIыкIызэ, Украинэм щыхъухэрэм пае «футбол бэлахьэу ешIэх, Iэгуаор талъэныкъо щыI», — къыIуагъ ащ.
Уехъырэхъышэжьынэу щытэп Зеленскэр ыкIи икъотэгъухэр мыщ фэдэ екIолIакIэм зэрэщыгъуазэхэм ыкIи а гупшысэм зэрэдырагъаштэрэм. Граждан цIыфхэр, бзылъфыгъэхэр, кIэлэцIыкIухэр ыкIи дзэкIолIхэр зэрэхэкIуадэхэрэм мэхьанэ ратырэп.
ПкIэкIэ аубытыгъэхэу Донбасс щагъэмысэхэрэр Женевскэ конвенцием щыгугъынхэ алъэкIыщтэп.
ПкIэкIэ аубытыгъэ IэкIыбым щыщ нэбгыритфэу Хорватием, Швейцарием ыкIи Великобританием ащыщхэм Донецкэ Народнэ Республикэм ясуд ыIуагъ. ЫпэкIэ ДНР-м и Апшъэрэ хьыкум англичанхэу Шон Пиннер ыкIи Эйден Аслин, джащ фэдэу марокканцэу Саадун Брагима лажьэ яIэу ыгъэунэфыгъ ыкIи ашъхьэ палъэнэу хьыкумым унашъо ышIыгъ.
Мыщ бырсыр къыпагъэкIыгъ британием икъэбарлъыгъэIэс амалхэм.
ПкIэкIэ аубытыгъэхэр дзэм къулыкъу щахьызэ гъэрэу аштагъэхэм ащыщынхэ фаеу хыгъэхъунэм къыщаIуагъ. Ау ащ фэдэу унашъо аштэнымкIэ юридическэ лъапсэ щыIэп. IэкIыб къэралхэм къарыкIхэу «урысхэм яшэкIон» гухэлъ зиIэхэм зэкIэми ашIэн фае ахэм дзэ бзэджэшIагъэ зэрахьагъэу зэраумысыщтхэр.