Терроризмэм пэшIуекIогъэным и Мафэ ехъулIэу Мыекъуапэ игурыт еджапIэу N 10-м икIэлэеджакIохэм террористическэ нэшанэ зиIэ зэпэуцужьхэм, хэу-шъхьафыкIыгъэ къулыкъухэм яIофышIэхэу ыкIи хэбзэухъумэкIохэу зипшъэрылъхэр зыгъэцакIэхэзэ хэкIодагъэхэм яшIэжь агъэлъэпIагъ. Iофтхьабзэм къыщызэрэугъоигъэхэр зишIэжь агъэлъапIэхэрэм зы та­къикъэ афэшъыгъуагъэх, къалэу Беслан хъугъэ-шIэгъэ тхьамыкIагъоу къыщыхъугъагъэр агу къагъэ­кIыжьыгъ. Iофтхьабзэм хэлэжьа­гъэх Росгвардием и Гъэ­IорышIапIэу Адыгеим щы­Iэм ОМОН-м ихэушъхьафыкIыгъэ подразделениеу «Фыщт» зыфиIорэм хэтэу, полицием иполковникэу Шъоджэ Налбый. Ащ кIэлэцIыкIухэм къафиIотагъ цIыфыбэ зыщызэIукIэрэ чIыпIэхэм узэращызекIон, урамыр ыкIи общественнэ транспортыр щынэгъон­чъэу щытынымкIэ шапхъэу щыIэхэр, джащ фэдэу яфитыныгъэхэр зыу­къохэрэм зэрадэзекIонхэ, ошIэ-дэмышIагъэ горэм хэ­фагъэхэмэ зэрэзекIонхэ фаер. Шъугу къэдгъэкIыжьын, 2004-рэ илъэсым Iоныгъом и 1-м Темыр Осетием ит къалэу Беслан мы хъугъэ­шIэгъэ тхьамыкIагъор къы­щыхъугъ. Террористхэм нэбгырэ 1100-м ехъу, кIэлэцIыкIухэр зэрахэтэу, гъэрэу аубытыгъагъ. Террористхэм зэрахьэгъэ хьакIэ-къокIагъэм ыпкъ къикIэу нэбгырэ 333-рэ хэкIодагъ, ахэм ащыщэу 186-р кIэлэеджа­кIох, 111-р ахэм яIахьылых ыкIи яблагъэх, джащ фэдэу нэбгырэ 17-р кIэлэ­егъаджэх, 19-р къэгъэнэ­жьакIох ыкIи ошIэ-дэмышIэ IофымкIэ къулыкъум иIофышIэх.