Джамбэчые нартым итыжьын
Урысыем ия ХI-рэ Гъэмэфэ Спартакиадэ атлетикэ онтэгъумкIэ Анапэ щыкIуагъ.
Адыгэ Республикэм ихэшыпыкIыгъэ командэ хэтхэу пэшIорыгъэшъ зэнэкъокъухэм текIоныгъэр къащыдэзыхыгъэхэр кIэух зэIукIэгъухэм ахэлэжьагъэх.
ЩашIэ Рустам, кг 73-рэ, тIоштэгъукIэ кг 278-рэ къыIэтыгъ (125+153), ятIонэрэ чIыпIэр къыдихыгъ. Спартакиадэм дышъэ медалыр къыщызыхьыгъэр зы килограммкIэ ыпэ ишъыгъ.
Адыгэ къэралыгъо университетым и Мыекъопэ къэралыгъо гуманитарнэ техническэ колледж ЩашIэ Рустам щеджэ, тренерхэу Чэмбэхъу Анзор ыкIи Сихъу Аслъан ипащэх. Нарт шъаор Джамбэчые щапIугъ.
ПчыхьэкIэ Амир, кг 67-рэ, тIоштэгъукIэ кг 234-рэ къыIэтыгъ (109+125), яплIэнэрэ чIыпIэр Спартакиадэм къыщыфагъэшъошагъ. Мыекъопэ къэралыгъо технологическэ университетым иколледж А. ПчыхьакIэр щеджэ, тренерхэр Чэмбэхъу Анзор, Сихъу Аслъан.
Бгъуашэ Асхьад, кг 55-рэ, Арсен Мнацаканян, кг 61-рэ, Адыгеим ыцIэкIэ Спартакиадэм хэлэжьагъэх. ТиныбжьыкIэхэм медальхэр къамыхьыгъэми, зэнэкъокъур ушэтыпIэшIу афэхъугъ.
— ТиныбжьыкIэхэм хэпшIыкIэу яIэпэIэсэныгъэ хагъахъо. Къоджэ спортым щапIугъэхэм гугъэшIухэр тагъэшIых. Джамбэчые щыщ кIалэхэр зыгъэсэрэ тренерэу Чэмбэхъу Анзор лъэшэу тыфэраз. Къуаджэмрэ къалэмрэ язэпхыныгъэхэр спортым щытэгъэпытэх. Мыекъуапэ имэфэкI мафэ тикIэлэеджакIохэр хэлэжьэщтых, — къытиIуагъ Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан.
Сурэтым итыр: ЩашIэ Рустам зэнэкъокъум хэлажьэ.