Узбекскэ апшъэрэ еджапIэм рагъэблэгъагъ
Адыгэ къэралыгъо университетым иестественнэ-хьисап кафедрэ идоцентэу Любовь Бурковар Самаркандскэ къэралыгъо университетым педагогикэмкIэ ыкIи предпринимательствэмкIэ и Денаускэ институт истудентхэм хьисапыр аригъэшIэщт.
Любовь Бурковар хьисапым изэгъэшIэнкIэ специалист, шIэныгъэ тхыгъэ 40-мэ яавтор ыкIи ясоавтор. Ахэм учебно-методическэ пособие 15 ахэт. 1994-рэ илъэсым Москва кандидатскэ диссертациер къыщигъэшъыпкъэжьыгъ ыкIи УФ-м гъэсэныгъэмрэ шIэныгъэмрэкIэ и Министерствэ ищытхъу тхылъ къыфагъэшъошагъ.
2022 — 2023-рэ еджэгъу илъэсхэм Любовь Бурковам узбекскэ апшъэрэ еджапIэм хьисапымкIэ щыригъэджэщтых, джащ фэдэу лекциехэм къафеджэщт.
2021-рэ илъэсым Адыгэ къэралыгъо университетымрэ Денаускэ институтымрэ зэзэгъыныгъэу зэдашIыгъагъэм къыдыхэлъытагъэу кIэлэегъаджэм Iоф щишIэщт.
Шъугу къэдгъэкIыжьын, Адыгэ къэралыгъо университетым Узбекистан иапшъэрэ еджапIэхэм зэзэгъыныгъэ адыриIэу зэрадэлажьэрэр. Непэрэ мафэм ехъулIэу, Денаускэ институтым нэмыкIэу Самаркандскэ къэралыгъо университетым, Узбекскэ къэралыгъо университетым Iоф адешIэ.
2019 — 2020-рэ еджэгъу илъэсым къыщегъэжьагъэу АКъУ-м Узбекскэ къэралыгъо университетыр игъусэу бакалавриатхэм ягъэхьазырын фэгъэхьыгъэ программэр щыIэныгъэм щыпхыращы. Узбекистан къикIыгъэ студент 200 фэдиз мы программэмкIэ апшъэрэ еджапIэм щеджэ.