Урысыем и Гъэмэфэ а 1-рэ Спартакиадэ атлетикэ онтэгъумкIэ Москва щыкIуагъ.

Хэгъэгум ишъолъыр 30 фэдизмэ ябатыри 150-рэ щылычым ебэныгъ. Адыгэ Респуб­ликэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм зыщызыгъэсэрэ Дзэсэжъ Аслъан кг 75-м нэс къэзыщэчыхэрэм якуп хэтэу зэнэкъокъум зыщиушэтыгъ.

— Бзылъфыгъэхэри, хъулъфыгъэхэри ­

купи 5-мэ ащызэнэкъокъугъэх. Олимпиадэ джэгунхэм ахэхьэрэ онтэгъугъэхэр арых зыщызэнэкъокъугъэхэр, — къытиIуагъ рес­публикэм атлетикэ онтэгъумкIэ испорт ­еджапIэ ипащэу, спортымкIэ дунэе класс зиIэ мастерэу Сихъу Рэмэзан. — Ащ къы­хэкIэу кг 67-м нэс къэзыщэчыхэрэм якуп хэтыгъэ Дзэсэжъ Аслъан кг 75-рэ къэзыщэчыхэрэм ахагъэхьагъ.

Дзэсэжъ Аслъан шIыкIэу рывокым килограмми 125-рэ, толчокым кг 160-рэ къащиIэтыгъ, я 7-рэ чIыпIэр хэгъэгум къыщыдихыгъ.

— Спартакиадэм хагъэхьагъэхэр Урысыем испортсмен анахь лъэшхэр арых. Я 7-рэ чIыпIэр Кощхьаблэ щапIугъэ батырым къызэрихьыгъэр гъэхъагъэкIэ фэплъэгъу хъущт, — къыIуагъ Дзэсэжъ Аслъан зыгъасэу, Адыгэ Республикэм изаслуженнэ тренерэу, спортымкIэ дунэе класс зиIэ мастерэу Сихъу Аслъан.