Президентым и Кубок
Урысыем тхэквондомкIэ и Союз ипрезидент и Кубок къыдэхыгъэным фэгъэхьыгъэ зэIукIэгъухэр шышъхьэIум и 26 — 28-м Щэрджэскъалэ щыкIуагъэх.
Адыгэ Республикэм испорт еджапIэу N 2-м зыщызыгъэсэрэ ныбжьыкIэхэр зэIукIэгъухэм чанэу ахэлэжьагъэх, хагъэунэфыкIырэ чIыпIэхэр къыдахыгъэх.
Даур Къадырбэч, кг 74-рэ, апэрэ чIыпIэр къызэрэдихыгъэм дакIоу, IэпэIэсэныгъэ ин зэнэкъокъум къыщигъэлъэгъуагъ.
Кристина Левичевам, кг 67-рэ, ятIонэрэ чIыпIэр къыхьыгъ. ТибэнакIохэр Адыгэ Республикэм изаслуженнэ тренерэу Василий Есиным егъасэх.
Ристэ Аминэ, кг 63-рэ, ящэнэрэ чIыпIэр къыфагъэшъошагъ, пшъашъэм итренерыр Олег Тыщенко.
Урысыем, Адыгеим язаслуженнэ тренерэу, Адыгэ Республикэм испорт еджапIэу N 2-м ипащэу Хъот Юныс тибэнакIохэр яIэпэIэсэныгъэкIэ къахэщыгъэхэу ылъытагъ. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм ямедальхэр фагъэхьых.