Адыгэ къуаем ифестиваль фэгъэхьыгъэ зэхахьэхэр республикэм игъэкIотыгъэу щэкIох.

Республикэ гъэзетхэу «Адыгэ макъэм» ыкIи «Советскэ Адыгеим» яредакциехэр зычIэт унэм щызэхащэгъэ Iофтхьабзэр журналистхэм бэрэ шIукIэ агу къэкIыжьыщт.

Щытхъу тхылъхэр

Зэхахьэр пэублэ гущыIэкIэ къызэIуихыгъ Урысыем ижурналистхэм я Союз исекретарэу Р. Серебрянэм. Журналист сэнэхьатым рылажьэхэзэ яп­шъэ­рылъхэр дэгъоу зыгъэ­цакIэхэ­рэм, общественнэ Iоф­хэм чанэу ахэлажьэхэрэм афэгъэхьыгъэ гущыIэ фабэхэр Р. Серебрянэм къыIуагъэх, Урысыем ижурналистхэм я Союз ищытхъу тхылъхэр къаритыжьыгъэх.

Къэралыгъо телерадиокомпаниеу «Адыгеим» ижурналистхэу Унэрэкъо Гулэз, Наталья Шевляковар, Юрий Зеньковскэр, Нэгэрэкъо Саныет, Браукъо Вячеслав, Наталья Синицинар, Къудаикъо Алый, ХьакIэмызэ Сусаннэ щытхъу тхылъхэр зыфагъэшъошагъэхэм ащыщых.

Республикэ гъэзетэу «Адыгэ макъэм» ижурналистхэу Тхьаркъохъо Сафыет, Iэшъынэ Сусаннэ, район гъэзетхэм яредакциехэм яIофышIэхэм, гъэзетэу «Советскэ Адыгеим» илъэсыбэ хъугъэу Iоф щызышIэрэ журналистэу Валерия Ломешинам, нэмыкIхэм щытхъу тхылъхэр афагъэшъошагъэх.

ГущыIэгъу тызыфэхъугъэхэ журналистхэу Тхьаркъохъо Сафыет, Наталья Шевляковам, Унэрэкъо Гулэз, фэшъхьафхэм къытаIуагъ яIофшIэгъу журналистхэм зэрафэразэхэр.

ШIуагъэ къэзытырэ зэIукIэгъу

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр зэIукIэр зэрищагъ. Адыгэ къуаем ифестиваль Мые­къопэ районым зэрэщыкIощтым къытегущыIагъ. Дахъо игъэхъунэ щызэхащэщт Iофтхьабзэм лъэпкъ IэшIагъэхэр, мыжъом, IутIэным, дышъэ Iуданэм, пхъэм, шъом, фэшъхьафхэм ахэшIыкIыгъэ пкъыгъохэр къыщагъэлъэгъощтых.

Журналистхэм апае зэхахьэу зэхащагъэм Р. Серебрянэр IупкIэу къыщыгущыIагъ. Район гъэзетхэм ясайтхэр гъэпсыгъэн­хэм ыкIи IофшIэныр зэхэщэгъэ­ным афэгъэхьыгъэ къэбарэу къыIотагъэхэм уагъэгъуазэ.

Джырэ уахътэ къэбарыкIэхэр цIыфхэм алъыгъэIэсыгъэнхэм фэшI журналистхэр шIыкIабэмэ алъыхъунхэ фае. ГущыIэм пае, район гъэзетыр тхьамафэм къыкIоцI гъогогъуитIо е гъого­гъуи­щэ къыдэкIы. ЦIыфхэм ящыкIэгъэ къэбархэр псынкIэу алъыгъэIэсыгъэнхэм пае район гъэзетым исайт гъэпсыкIэу иIэр къыдэлъытэгъэн фае. Электрон шIыкIэм тетэу зэлъыIэсыкIэ амалхэр зэрагъэфедэщтхэм ямэхьанэ зыкъеIэты.

Телевидениер, радиор, гъэ­зет­хэр цIыфхэм афэлажьэх. Гъэзетхэм къыхаутырэ тхыгъэ­хэр цIыфхэм зэралъыIэсыхэрэр, гъэзетеджэхэм яеплъыкIэхэр гъэзетым иредакцие къызэрэлъыIэсырэр — ахэр щыIэныгъэм епхыгъэ Iофых. ЗэгурыIоныгъэ ахэлъын фаеу Р. Серебрянэм ылъытагъ.

Район администрациехэмрэ гъэзетхэм яредакциехэмрэ Iоф зэрэзэдашIэрэ шIыкIэм зэха­хьэм щытегущыIагъэх.

Телевидением ижурналистхэм яIофшIэн нахь зиушъомбгъугъ. Телеканалхэр бэ хъугъэх. Хэта ащыщэу узэдэIумэ нахьышIур?

Шъыпкъэр цIыфхэм алъыб­гъэIэсыныр, щыIэныгъэм изэ­хъокIыныгъэхэм ащыбгъэгъо­зэнхэр Iофыгъо шъхьаIэхэм ахалъытэх. Ащ дакIоу упчIэ къэуцу: хэта анахь псынкIэу къэбархэр цIыф­хэм къафэзы­Iуатэрэр? Джэуапым улъыхъузэ, унаIэ зытеудзэрэр апэу къэбарыр къэзыIопщыгъэр къыхэмыгъэщэу шъыпкъэр къэзыIуагъэм уегупшысэ.

Техникэм зеушъомбгъу

Телевидением, радиом, гъэзетхэм яамалхэм яхэхъоныгъэ­хэр Р. Серебрянэм къыхигъэщыгъэх. Ащ дакIоу нэрылъэгъу IэпыIэгъухэр, рекламэр, хэ­ушъхьа­фыкIыгъэ зэлъыIэсыкIэ амалхэр журналистхэм зэрагъэ­федэхэрэм ынаIэ тыридзагъ.

Къалэу Воронеж, район зэфэшъхьафхэм опытэу яIэр Р. Се­ребрянэм зэфихьысыжьыгъэх, рекламэм ишIуагъэ къыхигъэщыгъ. Журналистыр Iофым ишъыпкъапIэ зэрэлъыхъурэр, темэу ыштагъэр щыIэныгъэм зэрэщыпхырищырэр зэхахьэм хэлэжьагъэхэм ашIогъэшIэгъоныгъ, упчIэхэр къатыгъэх.

Гъэзетэу «Советскэ Адыгеим» иредактор шъхьаIэу Цундышк Зарэ зэгъэпшэнхэр ышIы­хэзэ журналистым щыIэныгъэм чIыпIэу щыриIэр къыхигъэщыгъ.

Тызхэт лъэхъаным зэхъокIыныгъэу щыкIохэрэм еплъыкIэу афыряIэр журналистхэм къаIотагъ.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковыр, республикэ гъэзетэу «Адыгэ макъэм» иредактор шъхьаIэ игуадзэу МэщлIэкъо Саидэ, Адыгеим шъолъыр гъэIорышIэнымкIэ и Гупчэ ипащэу Къоджэшъэо Казбек, фэшъхьафхэри зэхахьэм хэлэжьагъэх, упчIэхэр къаты­гъэх, яепъыкIэхэр къаIотагъэх. Журналистхэм нэмыкI Iофыгъо­хэми атегущыIагъэх.

Адыгэ къуаем и Маф

Тиреспубликэ, адыгэ лъэп­къым ягъомылэпхъэ шъхьаIэхэм адыгэ къуаер ащыщ. Къуаем ифестиваль шышъхьэIум и 27 – 28-м Мыекъопэ районым зэрэщыкIощтым фэгъэхьыгъэ къэбархэр зэIукIэм къыщаIотагъэх. Къэгъэлъэгъон гъэшIэгъон­хэр зэхащэщтых. МэфэкI зэхахьэр, хъугъэ-шIагъэу ащ епхыгъэхэр журналистхэм игъэ­кIотыгъэу къагъэлъэгъощтых.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэу Адыгэ къуаем ифестиваль зэхащэ. Къуаер зэрэрахыщтым, гъомылапхъэм идэгъугъэ уасэ зэрэратыщтым дакIоу Адыгеим ихэхъоныгъэхэр къаIотэщтых. Республикэм иансамблэ цIэ­рыIохэм, артистхэм концерты­шхо къатыщт. Лъэпкъ зэфэшъхьафхэр къэшъощтых, уджыщтых. Адыгеим щыпсэурэ лъэпкъ­хэм зэгурыIоныгъэ ахэлъэу зэрэщыIэхэр къаIотэщт. Шъу­къеблагъэх Дахъо игъэхъунэ.

ЕмтIылъ Нурбый.