«Художественнэ гущыIэм фэIэпэIас»
Джары зэреджагъэхэр Адыгэ Республикэм и Лъэпкъ тхылъеджапIэ зэлъашIэрэ тхакIоу, адыгэ литературэм илъэпсэгъэуцоу, СССР-м ыкIи Адыгэ Республикэм я Къэралыгъо премиехэм ялауреатэу Т. М. КIэращэр къызыхъугъэр илъэси 120-рэ зэрэхъугъэм фэгъэхьыгъэ къэгъэлъэгъоным. Ар краеведениемрэ литературэмрэкIэ отделым къыщагъэхьазырыгъ.
Экспозицием тхакIом икъэлэмыпэ къыпыкIыгъэ тхылъхэр адыгабзэкIэ ыкIи урысыбзэкIэ щыолъэгъух. Иапэрэ рассказхэмкIэ къикIыхэзэ, иповестьхэр ыкIи романхэр, ежь тхакIом фэтхагъэхэм ятхылъхэр, Тембот исурэтхэр, шIэныгъэлэжь-литературоведхэу Пэнэшъу Уцужьыкъо, ХьакIэмыз Мирэ, Щыкъ Николай атхыгъэхэр, гъэзет ыкIи журнал зэфэшъхьафхэм къащыхаутыгъэхэр щыгъэфедагъэх.
ЛIэшIэгъуныкъом шIокIэу Тембот адыгэ литературэм зэрэщылэжьагъэр, зынэмысыгъэ къэмынэу, адыгэ фольклорым къыщыригъажьи адыгэ художественнэ прозэр пытэу зэрэзэтыригъэуцуагъэр мы мэфэкI къэгъэлъэгъоным щыкIэгъэтхъыгъ. Краеведениемрэ литературэмрэкIэ отделым ипащэу Мэрэтыкъо Заремэ къызэрэхигъэщыгъэмкIэ, «Адыгеим итхылъеджэхэм анахь якIасэу, ягуапэу заджэхэрэм апэрэр КIэрэщэ Тембот ихудожественнэ тхыгъэхэр ары. Къэгъэлъэгъон иным ихьатыркIэ, тхылъеджэхэм япчъагъи нахь къыхэхъонэу тэгугъэ».
Дзэукъожь Нуриет.