ДжэгупIэхэр афагъэпсых
Адыгеим щыщ псэолъэшIхэр Геническ икIэлэцIыкIу джэгупIэхэм язэтегъэпсыхьан фежьагъэх. АР-м и ЛIышъхьэу КъумпIыл Мурат шышъхьэIум иублэгъу Геническэ районым зэкIом, щагухэмрэ кIэлэцIыкIу джэгупIэхэмрэ мыщ щызэтырагъэпсыхьанхэу пшъэрылъ афишIыгъагъ.
Курасовым иурамрэ ТекIоныгъэр къызыдахыгъэр илъэс 40 зэрэхъугъэм ыцIэкIэ агъэпсыгъэ урамымрэ къахиубытэрэ щагухэу фэтэрыбэу зэхэт унэхэр зыдэтхэм джыдэдэм IофшIэнхэр ащыжъот. Геническ ирайонэу цIыфыбэ зыщыпсэурэм кIэлэцIыкIу джэгупIи 6 щагъэпсы.
ПэшIорыгъэшъ Iофтхьабзэхэр зызэрахьэхэ, чIыпIэхэм алъэгу алырэгъу папкIэхэр зырабзэхэ нэуж Адыгеим ипсэолъэшIхэр Мыекъуапэ къыращыгъэ пкъыгъохэм язэхэгъэуцон ыуж ихьагъэх. ГъучIхэм, пхъэм ахэшIыкIыгъэ пкъыгъо зэфэшъхьафхэр къызфагъэфедэхэзэ, ахэм унэ кIэракIэхэр, лъэойхэр, хъэренэхэр, пхъэнтIэкIухэр ыкIи нэмыкIхэр сабыйхэм афагъэпсых. КIэлэцIыкIухэри, зыныбжь икъугъэу къапэгъунэгъу унэхэм ащыпсэухэрэри ахэм Iоф зэрашIэрэм къылъэплъэх. ЦIыфхэр типсэолъэшIхэм яIофшIакIэ егъэразэх, ашIуабэ дашIэу IофшIэнхэр заухыщтхэм ежэх.
— Апэрэ кIэлэцIыкIу джэгупIэм игъэпсын непэ тыухы тшIоигъу, — къыIуагъ Геническэ районым и ВГА ЖКХ-мкIэ и ГъэIорышIапIэ ипащэу Олег Кульчицкэм. — Мы мэфэ благъэхэм адрэхэри дгъэпсыщтых, ыужкIэ кIэлэцIыкIу джэгупIи 4-мэ яшIын районым ипсэупIэхэм тащыфежьэщт.
Пащэм игущыIэ ыгъэцэкIэжьыгъ, шышъхьэIум и 24-р имыкIызэ, Геническ ищагу горэм джэгупIэ зэрэщагъэпсыгъэм кIэлэцIыкIухэр лъэшэу ыгъэгушIуагъэх. Адыгэ Республикэм ифирмэу «Дортранссервисым» иIофышIэхэр ары ащкIэ зишIуагъэ къэзыгъэкIуагъэхэр.
Людмила Погасеева.