ШIулъэгъум щызэпэуцух, сурэтым…
Тыгъужъ Руслъан Урысыем исурэтышIхэм я Союз 2000-рэ илъэсым къыщегъэжьагъэу хэт. Ащ иIофшIагъэхэм якъэгъэлъэгъон фэгъэхьыгъэ зэхахьэ Мыекъуапэ щыкIуагъ.
Адыгэ Республикэм культурэмкIэ и Министерствэ исурэт къэгъэлъэгъуапIэ щыкIогъэ зэхахьэр республикэм исурэтышIхэм я Союз итхьаматэу Елена Абакумовам зэрищагъ. Пэублэ гущыIэм ыуж Тыгъужъ Руслъан иIофшIагъэ къыщытхъугъ.
Республикэм культурэмкIэ и Министерствэ испециалист шъхьаIэу Теуцожь Нуриет искусствэм щылэжьэрэ Тыгъужъ Руслъан ыныбжь илъэс 50 хъугъэу итворчествэ зэрэлъигъэкIуатэрэм фэшI фэгушIуагъ. Министерствэм и Рэзэныгъэ тхылъ ритыжьыгъ, игъэхъагъэхэм ахигъэхъонэу фиIуагъ.
КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутамэ ипащэу ШъэуапцIэкъо Аминэт, искусствоведениемкIэ кандидатэу Къуекъо Мариет, Адыгэ Республикэм инароднэ сурэтышIэу Хъуажъ Рэмэзан зэIукIэгъум къыщыгущыIагъэх.
ЦIыфым игупшысэхэр къызэIухыгъэнхэм, сурэтышIыр иIофшIагъэхэмкIэ искусствэм пыщагъэхэм зэралъыIэсырэм, гъашIэм щагъэфедэрэ темэхэм къапкъырыкIызэ сурэтхэр Р. Тыгъужъым зэришIыхэрэм, фэшъхьафхэм яеплъыкIэхэр къараIолIагъэх.
Искусствоведэу Сулейманова Фатимэ зэрилъытэрэмкIэ, Р. Тыгъужъыр лъэхъанхэм язэхъокIыныгъэхэм алъэплъэ, зэфэхьысыжьхэр ешIых. БлэкIыгъэ уахътэм непэрэ псэукIэр регъапшэ. Пцэжъыехэм, хым итеплъэ, цIыфым ишъхьафитыныгъэ, фэшъхьафхэм яхьылIэгъэ сурэтхэр гъэпсыкIэу яIэмкIэ зэтекIых. Псым хэс блэхэм ясурэтхэри «къыгъэгущыIэхэу» къыпщегъэхъу. Ятэрэ ыкъорэ афэгъэхьыгъэ IофшIагъэр къыбгурыIоным фэшI бэрэ уеплъын фае. Тыгъэм инэбзыйхэм апэшIэтырэ пцэжъыехэр псым зэрэщесыхэрэм нэбгыра-бэ ашIогъэшIэгъонэу еплъыгъ. Хъуажъ Рэмэзан, ГъукIэлI Зухра, Елена Абакумовам, ХъокIо Ларисэ къызэрэхагъэщыгъэу, сурэт пэпчъ къепIолIэн плъэкIыщтыр макIэп. ФэбапIэм лъыхъурэ пцэжъыер дахэу псым къыщэлъагъо. Пчэдыжь нэфылъым щагубзыухэм рэхьатныгъэ зэрахэлъыр угукIэ огъэшIагъо.
Хъулъфыгъэхэр, Iашэр
Сурэтыр гурыIогъошIоп. Пшъашъэр хъулъфыгъитIумэ азыфагу зэритым унаIэ теодзэ. ЩэбзащэхэмкIэ хъулъфыгъэхэр зэпэуцугъэх. Хэта текIощтыр? ШIулъэгъу къабзэр нэбгыритIуми къаухъумэ ашIоигъу, ау зэдэгущыIэхэрэп, IашэкIэ зэпэуцугъэх…
— Сурэтыр сшIызэ бэмэ сягупшысагъ, — къытиIуагъ Тыгъужъ Руслъан. — Пшъашъэр шIу зылъэгъурэ хъулъфыгъэхэм Iашэр къаштэныр къедгъэкIурэп, ау тIумэ язи зэкIэкIонэу зэрэфэмыер къыхэсэгъэщы… Тыгъужъ Руслъан иIофшIагъэхэр Краснодар, Шъачэ, фэшъхьафхэм къащагъэлъэгъуагъэх. IэкIыб къэралхэм, Урысыем ямузейхэм, унэе къэгъэлъэгъуапIэхэм ачIэлъых. Iоныгъом и 11-м нэс Р. Тыгъужъым исурэтхэр Мыекъуапэ къыщагъэлъэгъощтых.