Къалэу Анапэ испорт Унэшхоу «Легионыр» къызызэIуахыгъэр илъэс 30 зэрэхъурэм фэгъэхьыгъэ зэIукIэгъухэр гъэшIэгъонэу зэхащагъэх.

ММА-у «Шапхъэ зыхэмылъ зэ­нэкъокъу» зыфиIорэм IапшъэкIэ щызэбэныгъэх (рукопашный бой).

Профессиональнэ зэнэкъокъум Урысыем ыкIи IэкIыб хэгъэгухэм яспортсмен анахь лъэшхэм яIэпэIэсэныгъэ къыщагъэлъэгъуагъ. ЗэIукIэгъу 11 зэнэкъокъум щызэхащагъ.

Адыгэ Республикэм испорт еджапIэу N 2-м зыщызыгъэсэрэ Кристина Морозовар зэнэкъо­къум рагъэблэгъагъ, кг 67-м нэс къэзыщэчыхэрэм якуп хагъэхьагъ.

Дагъыстан щыщэу Краснодар краим ихэшыпыкIыгъэ командэ фэбэнэрэ спортсменкэм К. Моро­зовар алырэгъум щыIукIагъ. Зэнэкъокъур едзыгъуи 3 мэхъу.

Кристина Морозовам IэпэIэсэныгъэ ин зэIукIэгъум къыщигъэлъэгъуагъ. Апэрэ едзыгъор амы­ухы­зэ текIоныгъэр къыдихыгъ. ЗэхэщакIохэр, спортым хэшIыкI фызиIэхэр К. Морозовам къыщытхъугъэх.

— Адыгеим испортсмен анахь дэгъухэу илъэс къэс къыхахырэмэ Кристина Морозовар ащыщ, — къытиIуагъ пшъэшъэжъыер зы­-гъа­сэу, Адыгэ Республикэм изаслуженнэ тренерэу НэмытIэкъо Аскэрбый. — Гуетыныгъэ ин хэлъэу Кристинэ зэнэкъокъухэм зафегъэхьазыры, ымышIэрэм е икъоу къыгурымыIорэм кIэупчIэ. ГукIэгъу хэлъ, еджапIэм иныбжьыкIэхэм яIэпэIэсэныгъэ хагъэ­хъонымкIэ ишIуагъэ арегъэкIы, Iоф дэпшIэныр IэшIэх.

— Урысыем и Кубок ушу саньдамкIэ гъогогъуи 9 Кристина Морозовам къыдихыгъ, Урысыем изэнэкъокъу гъогогъуи 9 апэрэ чIыпIэр къыщихьыгъ, — къеIуатэ Адыгэ Республикэм испорт еджа­пIэу N 2-м идиректорэу, Урысы­ем, Адыгеим язаслуженнэ тренерэу Хъот Юныс. — Урысыем испортсменкэ цIэрыIо зэнэкъокъу зэфэшъхьафхэм ахэлэжьэнэу зегъэхьазыры.

Бжыхьэм Урысыем и Кубок ушу саньдамкIэ фэбэнэщт, Урысыем IапшъэкIэ щызэбэны— щтых.

Адыгэ къэралыгъо университетым физкультурэмрэ дзюдомрэкIэ и Институт К. Морозовам къыухыгъ, магистратурэм ия 2-рэ курс щеджэ. Спорт­сменкэ цIэрыIом ифэIо-фа­шIэхэр нахьышIоу фагъэцакIэхэ зыхъукIэ, иIэпэIэсэныгъэ, имедальхэм тапэкIи ахигъэхъощт.

— Спортышхом гъэхъагъу щыт­шIырэр къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэтэгъэхьы, — къытаIуагъ НэмытIэкъо Аскэрбыйрэ Кристина Морозовамрэ. Шъуимурадхэр къыжъудэхъунхэу тышъуфэлъаIо, шъопсэу!