«Зэкъошныгъ» Мыекъуапэ — «Форте» Таганрог — 1:2 (1:1). ШышъхьэIум и 21-м Мыекъуапэ щызэдешIагъэх.

«Зэкъошныгъ»: Хьачыр, Кириленко, Т. ХъуакIо (Байрамян, 81), Гусенгаджиев, Лысенко, Датхъужъ, Къонэ (Хьасанэкъу, 86), Крылов (Антоненко, 86), Макоев (Малкандоев, 62), Васильев (Пекъу, 62), Оразай.

Къэлапчъэм Iэгуаор дэзыдза­гъэхэр: Магомедов – 16, 71, «Фор­те». Къонэ – 41, «Зэкъошныгъ».

Таганрог икомандэ апэрэ чIыпIэхэм якъыдэхын фэбанэ. Арэу щытми, «Зэкъошныгъэм» текIоныгъэр ешIэгъум къыщихьын ылъэ­кIыщтыгъэ. ЗэIукIэгъум иапэрэ едзыгъом «Зэкъошныгъэр» бэрэ ыпэкIэ илъыщтыгъ. УхъумакIохэм къадзыхьагъэу Къонэ Амир щытэу Iэгуаор къызыIэ­кIахьэм метрэ заулэкIэ къэлап­чъэм пэчыжьагъ. ТиешIакIо псынкIэу хэкIыпIэ къыгъоти, хъа­гъэм Iэгуаор ридзагъ, пчъагъэр 1:1 хъугъэ.

Д. Крыловым ыпэкIэ ытыгъэ Iэгуаом Т. ХъуакIор лъычъи, хьа­кIэхэм якъэлэпчъэIутэу Д. Полянскэм изакъоу екIугъ, ау хъагъэм Iэгуаор ридзэн ылъэкIыгъэп – къэлэпчъэIутым ар къызэкIидзэ­жьыгъ.

ТиухъумакIохэр пхъашэу Рашид Магомедовым пэуцугъэхэп. Ар «Форте» иешIакIо ыгъэфеди, «Зэ­къошныгъэм» икъэлапчъэ Iэгуаор къыдидзагъ – 1:2. Я 89-рэ такъикъым А. Датхъу­жъыр изакъоу къэлэпчъэIутэу Д. Полянскэм екIугъ. Метри 3 фэдизкIэ зыпэчыжьэ къэлапчъэм зыдэом, тигъэгушIуагъэп — блэугъ. Пчъагъэр 1:2-у зэIукIэгъур «Зэ­къош­ныгъэм» шIуахьыгъэми, ешIакIэу къыгъэлъэгъуагъэм тегъэгугъэ.

Пресс-зэIукIэр

«Зэкъошныгъэм» итренер шъхьа­Iэу ШэкIо Ащэмэз изэфэхьысыжьхэр къэкIощт уахътэм епхыгъэх. — ТиешIакIохэм къэлапчъэм Iэгуаор дадзэнэу амалышIухэр яIагъэх, ау агъэфедагъэхэп. ЩыкIагъэу тиIэхэр зыдэтэшIэжьых. ТиIофшIэн нахьышIоу зэрэзэхэтщэщтым тыпылъыщт. Рашид Магомедовым фэдэу къэлапчъэм Iэгуаор дэзыдзэн зылъэкIыщтхэр тэри дгъасэхэ тшIоигъу.

Быракъхэр агъэбыбатэх

Адыгэ республикэ стадионым футболым еплъынэу къакIохэрэм япчъагъэ хэпшIыкIэу хэхъуагъ. Урысыем, Адыгеим якъэралыгъо быракъхэр стадионым щагъэбыбэтагъэх. АдыгабзэкIэ «Зэкъошныгъ» Мыекъуапэ» ыIоу зытетхэгъэ шарф­хэр нэбгырабэмэ аIы­гъыгъ, тиешIакIохэм Iэгу афытеуагъэх.

ЗэIукIэгъур заухым, футболыр зыгу рихьыхэу стадионым къэкIуа­гъэхэмрэ «Зэкъошныгъэм» хэтхэм­рэ ешIапIэм щызэIукIагъэх, зэгъу­сэхэу нэпэеплъ сурэтхэр атырахыгъэх, гущыIэгъу зэфэхъу­гъэх.

ЕшIэгъухэр

Урысыем футболымкIэ ия 2-рэ куп я 5-рэ ешIэгъухэр зэрэщыкIуагъэхэм шъущытэгъэгъуазэ. «Алания-2» — «Спартак» — 0:4, «Легион» — «Ессентуки» — 3:1, «Мэщыкъу» — «Биолог» — 1:2, «Кубань-Холдинг» — «Ротор» — 1:5, «Динамо» Ст — СКА – 0:0, «Черноморец» — «Чайка» — 0:2.

ЧIыпIэхэр зэтэгъапшэх

1. «Ротор» — 15 2. «Чайка» — 12 3. «Биолог» — 10 4. «Кубань-Х» — 9 5. СКА — 8 6. «Спартак» — 7 7. «Форте» — 7 8. «Черноморец» — 7 9. «Динамо» Ст – 6 10. «Зэкъошныгъ» — 4 11. «Легион» — 4 12. «Ессентуки» — 4 13. «Мэщыкъу» — 2 14. «Алания-2» — 1.

Я 6-рэ зэIукIэгъухэр

26.08 «Ессентуки» — «Черноморец» 27.08 «Спартак» — «Зэкъошныгъ» «Биолог» — «Кубань-Х» «Мэщыкъу» — СКА «Форте» — «Легион» «Чайка» — «Динамо» Ст «Ротор» — «Алания-2».

«Зэкъошныгъэм» изичэзыу ешIэгъухэр псынкIэ къыфэхъущтхэп. «Спартак» Налщык ыуж «Ротор» Волгоград Мыекъуапэ щыдешIэщт, Урысыем и Кубок икъыдэхын хэлэжьэным фэшI апэрэ пэшIорыгъэшъ ешIэгъур иIэщт. «Зэкъошныгъэр» зэхъокIыныгъэхэм, къиныгъохэм ахэтми, гугъэр чIинэрэп.