Нахь гъэлъэшыгъэу, псынкIэу социальнэ проектхэр зэрэзэ­хэб­гъэуцощтхэм зыщыфагъэсэщтхэ егъэджэныр Адыгэ къэралыгъо университетым игъэпсэфыпIэ базэу «Горная легенда» зыфиIорэм щырагъэжьагъ. Ар шышъхьэIум и 20-м къыщыублагъэу и 26-м нэс кIощт.

Егъэджэным изэхэщакIох студентхэм япрофсоюз ор­ганизациерэ студентхэм янаучнэ общест­вэрэ. Iоф­тхьабзэр зэхэ­щэгъэнымкIэ яшIуагъэ къэ­кIуагъ президент грантхэм я Фондрэ АР-м IофшIэ­нымкIэ ыкIи социальнэ хэ­хъоныгъэмкIэ и Минис­терствэрэ.

Зэнэкъокъу шIыкIэм тетэу къыхахыгъэ студент 50 егъэджэным хэлажьэ. Ахэр рагъэджэщтых Москва дэт университетэу Ломоносовым ыцIэ зыхьырэм, Адыгэ къэралыгъо уни­верситетым, Тюмень ыкIи Къэбэртэе-Бэлъкъар къэ­ралыгъо университетхэм яшIэныгъэлэжьхэм. ГъэIорышIэнымкIэ Мос­ковскэ еджапIэу СКОЛКОВО зыфиIорэм илIыкIохэри Iоф­тхьабзэм хэлажьэх.

Егъэ­джэным къыделъы­тэх лекциехэр, практикум­хэр, ма­с­тер-классхэр, нэмыкI егъэджэн амалхэр.

Куп-купэу гощыгъэхэу студентхэр рагъэджэщтых. Куп пэпчъ нэбгыри 5 — 6 хэт. Мэфиблым къыкIоцI студентхэм проект зэха­гъэуцон фае.

Адыгэ къэралыгъо университетым ипресс-къулыкъу къызэритырэмкIэ, егъэ­джэным дакIоу творческэ пчыхьэзэхэхьэ гъэшIэгъонхэр, экскурсиехэр ыкIи Iофтхьабзэхэр студентхэм афызэхащэщтых.

Сихъу Гощнагъу.