Тамбый
Сурэтхэм арышъулъэгъорэ адыгэ кIалэм лъэпкъ тарихъри, адыгэхэм яхьылIэгъэ пстэури лъэшэу егъэлъапIэх. Джымыкъо Тамбый Шам (Сирием) къыщыхъугъ ыкIи щапIугъ. Джыдэдэм Тыркуем щэпсэу, адыгабзэр дэгъоу егъэфедэ.
— Дунаим сыкъызытехъуагъэм къыщыублагъэу адыгабзэр зэхэсхызэ сыкъэтэджыгъ, тиунэгъо кIоцI ренэу ныдэлъфыбзэкIэ щызэдэгущыIэщтыгъэх. УблэпIэ классхэм ателъытэгъэ тхылъымкIэ адыгабзэр зэзгъэшIагъ. Джыри сышъэожъыезэ, сятэрэ сшырэ сырягъусэу тятэжъ пIашъэхэм ячIыгужъ —Адыгеим сыкъэкIонэу хъугъагъэ. Адыгэ мэкъэмэ Iэмэ-псымэхэр зышIырэ ГъукIэ Замудин сызэрэIукIагъэр гукъэкIыжь дахэу егъашIэм къысфэнагъ. Адыгеим, музыкэм, мэкъэмэ Iэмэ-псымэхэм афэгъэхьыгъэу ащ гъэшIэгъоныбэ къытфиIотэгъагъ. Адыгэ пщынэ шъыпкъэм сеонэу синасып къыхьыгъагъ, — къеIуатэ Тамбый.
Тамбый ицIыкIугъом ягъунэгъухэм япщынэ къаIихыти, Интернетыр къызфигъэфедэзэ, адыгэ орэдхэр къызэрэхыригъэдзэщт шIыкIэм зыфигъасэщтыгъ. Адыгэ кIэлэ хъупхъэм къызыхэкIыгъэ лъэпкъыр егъэлъапIэ, зэрэадыгэм рэгушхо, лъэпкъ хабзэхэм арэгъуазэ. Ащ дахэу орэд къеIо, къэшъо, аккордеонымрэ фортепианэмрэ къарегъаIо. Билькент университетэу Ихьсан Догърамадж ыцIэкIэ щытыр гъэхъагъэ хэлъэу бэмышIэу къыухыгъ. Адыгэ кIэлэ IэпэIасэм Моцарт, Бетховен, Бах, Чайковскэм япроизведениехэр дэгъоу къырегъаIох, урыс композиторхэм аусыгъэхэм осэшхо афешIы. Фредерик Шопен и «Полонез» бэрэ къыригъаIохэрэм ащыщ.
Джымыкъо Тамбый музыкэм идунай чIыпIэ гъэнэфагъэ щиубытынэу тэгугъэ. Музыкант сэнаущым адыгэ лъэпкъ орэдхэр икIэсэ дэдэх. Адыгэ тхыдэжъхэри, таурыхъхэри, орэдхэри, гущыIэжъхэри игуапэу еугъоих. Адыгэхэм агъэлъэпIэрэ мэфэкIхэр зэкIэ ащи хегъэунэфыкIых, дахэу орэд къеIо, дэгъоу къешIэ.
Тамбый Америкэм зыкIокIэ, Нью-Йорк ипчэгухэм пщынэ къащео, ыш пхъэкIычаоу игъус. Зэшхэм лъэпэчIаси, зэфакIуи, нэмыкI адыгэ къашъохэри фэIэпэIасэу къашIых. Америкэм щыщхэу Кавказым имэкъэмэ псынкIэ ыумэхъыхэрэр пчэгум къытехьэхэшъ, зэрафэгъэхъоу къэшъох. Къэшъоныр зикIэсэ негрэхэри ахэм ахэплъэгъощтых.
Адыгэгу шъыпкъэ зиIэ кIэлэ нэшIо-гушIом лъэпкъым ыIэпэ-цыпэ зыхэщэгъэ пстэури шIогъэшIэгъон. Адыгэхэм я Дунэе форумэу бэмышIэу Тыркуем щыкIуагъэм зэрэхэлэжьагъэр ищыIэныгъэкIэ хъугъэшIэгъэшхо хъугъэ. Аферым, Тамбый, уапэкIэ ренэу егъэхъу! Адыгеир къыожэ!
Бэгъушъэ Мариет.