Адыгэ Республикэм ифестивалэу «Адыгэ къуай» зыфиIорэр шышъхьэIум и 27 — 28-м Мыекъопэ районым ипсэупIэу Дахъо щыкIощт.

Адыгэ къуаем итарихъ, къуаер изыхыхэрэм яшэн-хабзэхэм, адыгэ къуаер республикэм ихэ­ушъхьафыкIыгъэ гъомылапхъэхэм зэращыщым, нэмыкIхэм афэгъэ­хьыгъэ къэбархэр фестивалым къыщаIотэщтых.

Адыгэ Республикэм мэкъу-мэщымкIэ и Министерствэ къызэрэщытаIуагъэу, Дахъо игъэхъунэ щызэхащэщт фестивалым лъэпкъ IэшIагъэхэр къыщагъэлъэгъощтых, сатыушIыпIэхэр, зыгъэпсэфыпIэхэр зэтырагъэпсыхьащтых.

Лъэпкъ IэшIагъэхэр

КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутамэ иIофышIэу, дунаим щызэлъашIэрэ сурэтышI-модельерэу СтIашъу Юрэ исэнаущыгъэ гъунапкъэ имыIэу тэлъытэ.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ лъэпкъ IэшIэгъи 100 ыгъэхьазырыгъ. Iэпэ­Iасэм иIофшIагъэхэр куп-купэу гощыгъэх. Искусствэм, лъэпкъ шIэжьым, ТекIоныгъэм и Мафэ, спортым илIыхъужъхэм, фэ­шъхьаф­­хэм яхьылIагъэх. Адыгэмэ зэраIоу, зигъор дахэ. Адыгэ къуа­ем ирес­публикэ фестиваль фэгъэ­хьыгъэу СтIашъу Юрэ ышIыгъэ тхыпхъэр гум къегущыIыкIы. Ана­хьэу ащ ынаIэ зытыридзагъэр лъэпкъ IэпэIасэхэм яшэн-хабзэхэр щыIэныгъэм зэрэщытлъэгъухэрэр ары.

Къуаер, пчъэр, шъхьаныгъуп­чъэр, адыгэ саем щыщ пычыгъо­хэр сурэтышI-модельерым къегъэ­лъагъох.

— Шъукъеблагъэх Адыгэ Рес­публикэм, Кавказ шъо­лъырым, — еIо сурэтышIым.

Лъэпкъ шэн-хабзэхэм адиштэу хьакIэхэр Ю. СтIашъум къырегъэб­лагъэх. Мамыр гъогум тет цIыфхэр зэфищэхэ шIоигъу.

— ШIэныгъэм уегъэгъуазэ, цIыф лъэпкъхэр нахь баи ешIых. Лъэпкъым икультурэ гур къызэIуехы, — зэдэгущыIэгъур лъегъэкIуа­тэ СтIашъу Юрэ. — Ады­- гэ­хэр къэралыгъо 50-м ехъумэ ащэпсэух. Тыдэ щыIэхэми, яшэн-хабзэхэр къаухъумэх.

Тыркуем, Сирием, США-м, Иорданием, Москва, Къыблэ шъо­лъырым, Темыр Кавказым, нэмыкIхэм Ю. СтIашъум иIофшIагъэхэм афэгъэхьыгъэ къэгъэлъэгъонхэр ащызэхищагъэх.

Санкт-Петербург къыщиIотэщт

Адыгэ къуаер, хьалыжъор тыди щагъэлъапIэх, гъомылэпхъэ шъхьа­Iэхэм ахалъытэх. Санкт-Петербург щыпсэурэ КIыкI Софие лъэпкъ искусствэм щашIэ. Адыгэ Республикэм изаслуженнэ артистк. Зигъэпсэфынэу Мыекъуапэ къызэкIом, музеим щыIагъ, СтIа­шъу Юрэ итворчествэ зыщигъэгъозагъ.

— Санкт-Петербург згъэзэжьмэ, СтIашъу Юрэ иIэпэIэсэныгъэ фэгъэхьыгъэ къэбархэр си­Iоф­шIэгъухэм, Санкт-Петербург и Адыгэ Хасэ хэтхэм, искусствэр зышIогъэшIэгъонхэм къа­фэсIотэщтых. Адыгэ къуаем фэгъэхьыгъэ фестивалыр зэзгъэпшэщтыр сшIэрэп. Ащ фэдэ зэхахьэм сегъэгушхо, — къытиIуагъ КIыкI Софие.

АР-м и Правительствэ зычIэт унэм адыгэ къуаем фэгъэхьыгъэ зэхахьэу щыкIуагъэм ти ЛIышъхьэу КъумпIыл Мурат къыщи­- Iуагъ Адыгеим ия 100-рэ илъэс фэгъэ­хьыгъэ фестивалыр шэпхъэ лъагэхэм адиштэу зэрэзэхащэщтыр.

Шэпхъэ лъагэм дештэ

Культурэм, искусствэм, спортым апыщагъэхэри Iофтхьабзэм хэлэжьэнхэм фэхьазырых.

СтIашъу Юрэ итворчествэ фэгъэхьыгъэ буклетхэр инджылызыбзэкIэ, урысыбзэкIэ, адыгабзэкIэ тхыгъэх, сурэтхэр шъо зэфэ­шъхьафхэмкIэ гъэкIэрэкIагъэх.

КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутамэ ипащэу, Урысыем, Адыгеим, Ингушетием куль­турэмкIэ яза­служеннэ IофышIэу ШъэуапцIэкъо Аминэт изэфэхьысыжьхэм къащыхигъэ­щыгъ буклетхэм якъыдэгъэкIын мэхьэнэ хэхыгъэ зэриIэр. Зе­кIонымкIэ рес­публикэм щызэхащэхэрэ Iоф­тхьабзэхэм ар ащыщ. Адыгэхэм ятарихъ, искусствэм, шэн-хабзэхэм татегущыIэ зыхъукIэ, Адыгэ Респуб­ликэм лъэпкъыбэ зэ­рэщыпсэурэр, искусствэм лъэпкъхэр зэрэзэфищэхэрэр, мамыр щыIакIэр зэригъэпытэрэр къыдэтэлъытэх.

ЗекIоным, сатыум апылъхэу Адыгеим къакIохэрэм, хьакIэхэм республикэр нахьышIоу зэрагъа­шIэ тшIоигъу. Дунаим щыпсэурэ лъэпкъ анахьыжъхэм адыгэхэр ащыщых. Тифольклор, тиадыгабзэ — ахэри анахьыжъхэм ахалъы­тэх. СурэтышIхэм, лъэпкъ Iэпэ­Iасэхэм, тхакIохэм, композитор­хэм яIоф­шIагъэхэмкIэ Адыгеим ибаиныгъэ дунэе искусствэм къыщытэIуатэ.

Шъукъеблагъэх адыгэ къуаем ифестиваль. Ащ щышъулъэгъу­рэр, зэхэшъухырэр гум шIукIэ къинэ­жьыщтых, гъашIэм хэкIокIэщтхэп.