Физкультурникым и Мафэ фэгъэхьыгъэ зэхахьэ Адыгэ Республикэм испорт Унэшхоу «Ошъутенэм» щыкIуагъ.

— Урысыем щыхагъэу­нэфыкIырэ мэфэкIым тигуапэу тыхэлажьэ, — къыщи­Iуагъ зэхахьэм Адыгэ Респуб­ликэм физкультурэмкIэ ыкIи спортымкIэ и Комитет итхьаматэу Дэгужъые Мурат. — Ти ЛIышъхьэу КъумпIыл Мурат, Правительствэм, Парламентым ацIэкIэ сышъуфэгушIо, шъуигъэхъагъэ­хэм ахэжъугъэ­хъонэу шъуфэтэIо.

Самбэ бэнэнымкIэ дунаим щызэлъашIэу, Урысыем и Къэралыгъо Думэ идепутатэу Хьасанэкъо Мурат, Адыгэ Республикэм и Парламент и Тхьаматэ игуадзэу, Урысыем и ЛIыхъу­жъэу Цэй Эдуард, Мыекъуапэ иадминистрацие ипащэу Геннадий Митрофановыр зэхахьэм хэлажьэхэрэм, тренерхэм, спорт­сменхэм афэгъэхьыгъэ гу­щыIэ фабэхэр зэIукIэгъум къыщаIуагъэх. Физкультурэмрэ спортымрэ псауныгъэр зэрагъэпытэрэм дакIоу, цIыфыр зэрапIурэр, щыIэныгъэм зэрэфагъасэрэр хагъэунэфыкIыгъ. Тренерхэм, спортсменхэм афаусыгъэ щытхъуцIэхэр къэзыушыхьатырэ бгъэхалъхьэхэр, рэзэныгъэ ыкIи щытхъу тхылъхэр аратыжьыгъэх.

«Адыгэ Республикэм изаслуженнэ тренер» зыфиIорэ цIэ лъапIэр Василий Есиным, Сихъу Аслъан, Татьяна Тарасенкэм афаусыгъэх.

«Адыгэ Республикэм физкультурэмкIэ изаслуженнэ IофышI» зыфиIорэ щытхъуцIэр Къадэ Руслъан, Людмила Поповам, Ирина Сорочинскаям къафагъэшъошагъ.

Адыгэ Республикэм и ЛIышъхьэ и Рэзэныгъэ тхылъ зыфигъэ­шъошагъэхэм ацIэхэр зэхахьэм къыщыраIуагъэх. Беданэкъо Байзэт, Алевтина Бербетовам, Елена Демченкэм, Осмэн Руслъан, Псэунэ Назир, Анатолий Федоровым, Шъаукъо Заремэ афэгушIуагъэх.

Урысыем спортымкIэ и Министерствэ иунашъокIэ «Физическэ культурэм ыкIи спортым яотличник» зыфиIорэ щытхъуцIэхэр Насифэ Аскэрбыйрэ Ольга Рюхинамрэ афаусыгъ.

Министерствэм ирэзэныгъэ тхылъ Дэхъужъ Сэфэрбый, Мэрэтыкъо Щамсэт, Николай Аркатовым, Сергей Кузнецовым аратыжьыгъэх.

Министерствэм ищытхъу тхылъхэр Хьамдэхъу Жанетэрэ Делэкъо Адамрэ афагъэшъошагъэх.

Адыгэ Республикэм физкультурэмкIэ ыкIи спортымкIэ и Комитет ишIухьафтынхэри тренерхэм, спортсменхэм аратыжьыгъэх.

Рэзэныгъэ тхылъ

Адыгэ Республикэм и Къэралыгъо Совет — Хасэм ирэзэныгъэ тхылъ тренерхэу ЛIэ­хъусэжъ Къэплъан, пауэрлифтингыр, Чэмбэхъу Анзор, атлетикэ онтэгъур, афагъэшъошагъ.

Щытхъу тхылъхэр

Адыгэ Республикэм физкультурэмкIэ ыкIи спортымкIэ и Ко­­митет ищытхъу тхылъхэр тренерхэм, фэIо-фашIэхэр зыгъэцакIэхэрэм, IэнэтIэ зэфэ­шъхьафхэм аIутхэм афагъэшъо­шагъэх.

Комитетым итхьаматэу Дэгужъые Мурат зыфэгушIуагъэ­хэм ащыщых гандбол клубэу «Адыифым» итренерэу Светлана Кожубековар, атлетикэ онтэ­гъумкIэ тренерэу Владимир Драневыр, спорт еджапIэхэм яIофышIэхэу Татьяна Олейниковар, Карлен Восканян, Артем Гапошиныр, Светлана Парфеновар, ХъутIыжъ Юрэ, Нэгъый Азэмат, Марина Савельевар, Бгъуашэ Сулиет, Юрий Курочкиныр, Светлана Гончар, Олег Тыщенкэр.

Урысые Федерацием и Къэралыгъо Думэ физкультурэмкIэ, спортымкIэ, зекIонымкIэ ыкIи ныбжьыкIэ IофхэмкIэ и Комитет и Щытхъу тхылъ къыфагъэшъошагъ Олимпиадэхэм ахэлэжьэщтхэр зыщагъэхьазырхэрэ рес­публикэ спорт еджапIэу N 2-м ипащэ игуадзэу Тыгъужъ Алый.

Зэнэкъокъухэр

Физкультурникым и Мафэ фэгъэхьыгъэ зэнэкъокъухэр футболымкIэ, баскетболымкIэ, нэмыкIхэмкIэ щыIагъэх. Адыгэ Республикэм испорт еджапIэу N 2-м, пащэр Хъот Юныс, къэ­гъэлъэгъон спорт зэIукIэгъухэр каратэмкIэ, ушумкIэ, тхэквондомкIэ, кикбоксингымкIэ Мые­къуапэ икъэлэ парк щызэхищагъэх. «Ракушкэм» щыкIогъэ зэхахьэмэ ашIогъэшIэгъонэу спортым пыщагъэхэр яплъы­гъэх.

Тренерхэм, спортсменхэм, IофшIапIэхэм япащэхэм ацIэкIэ АР-м ихэшыпыкIыгъэ командэхэр зыгъэхьазырырэ Гупчэм идиректорэу Сергей Кузнецовыр зэхахьэм къыщыгущыIагъ. ЯIоф­шIагъэ осэ ин къызэрэфашIыгъэм фэшI «тхьашъуегъэпсэу» къариIожьыгъ.

ЕмтIылъ Нурбый.