Хэгъэгум щыхагъэунэфыкIыгъ
1885-рэ илъэсым, шышъхьэIу мазэм Петербург щыпсэурэ Владислав Краевскэм иунэ кружок къыщызэIуихи, атлетикэ онтэгъум фигъасэхэу ыублагъ.
Медицинэм пылъ докторым ригъэжьэгъэ Iофым хэгъэгум зыщиушъомбгъугъ. Адыгеим атлетикэ онтэгъум нахь игъэкIотыгъэу зыщыфагъасэу заублагъэр Хэгъэгу зэошхом ыуж.
Олимпиадэ джэгунхэм атлетикэ онтэгъумкIэ дышъэ медалыр апэу къыщыдэзыхыгъэр Кощхьаблэ щапIугъэ нарт батырэу Чыржьын Мухьарбый. 1972-рэ илъэсым Мюнхен апэрэ чIыпIэр къыщихьыгъ. 1973 — 1974-рэ илъэсхэм дунаим, Европэм дышъэ медальхэр къащыдихыгъ.
Валерий Талаевым дунаим иныбжьыкIэхэм язэнэкъокъу апэрэ чIыпIэр къыщихьыгъ. Вартан Кукасян Европэм иныбжьыкIэхэм язэIукIэгъухэм апэрэ чIыпIэр ащиубытыгъ.
РСФСР-м изаслуженнэ тренерэу Хъуажъ Мэджыдэ ыгъэсагъэхэу Сихъу Аслъан, Валерий Талаевыр, Гъубжьэкъо Арсен, Чэтэо Адам, Сихъу Рэмэзан, нэмыкIхэри Урысыем спортымкIэ дунэе класс зиIэ мастер хъугъэх.
Адыгэ Республикэм изаслуженнэ тренерэу Виктор Вороновым ыгъэсэгъэхэ Алексей Красновым, Вартан Кукасян ыкIи АР-м изаслуженнэ тренерэу Iэшъынэ Налбый ыгъэсэгъэ ЛIэхъусэжъ Нурбый спортымкIэ дунэе класс зиIэ мастерых.
ШышъхьэIум и 10-м атлетикэ онтэгъум и Мафэ Урысыем щыхагъэунэфыкIыгъ. Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан къытиIуагъ тиныбжьыкIэ батырхэр шышъхьэIу мазэм хэгъэгум изэнэкъокъу зэфэшъхьафхэм зэрахэлэжьэщтхэр.
Батырхэм гъэхъагъэхэр ашIынхэу, тагъэгушIонэу афэтэIо.
Сурэтым итыр: Чыржьын Мухьарбый.