Урысыем орэд къыфаIощт
Адыгэ Республикэм и Къэралыгъо филармоние изэхэхьэпIэ цIыкIу шышъхьэIум и 17-м концерт гъэшIэгъон щыкIощт.
«Си Урысый, орэд къыпфэсэIо!» зыфиIорэ пчыхьэзэхахьэр Урысые Федерацием и Къэралыгъо быракъ и Мафэ фэгъэхьыгъ.
Урысыер къэралыгъошху. ЛIэшIэгъу пчъагъэхэм тарихъ гъогоу къащикIугъэм зэо-банэхэр, къиныгъохэр къащызэринэкIыгъэх. Лъэпкъыбэ зыщыпсэурэ хэгъэгум имамыр щыIакIэ хэхъоныгъэхэр фэхъух. ЦIыфхэм ягушъхьэ кIуачIэ зыкъызэриIэтырэр тхакIохэм, композиторхэм, сурэтышIхэм, нэмыкIхэм яIофшIагъэхэм къащаIуатэ.
Филармонием щыкIощт концертым Урысыем ехьылIэгъэ орэдхэр артистхэм щагъэжъынчыщтых. А. Пахмутовам иорэдэу «Зачарованная даль», «Русский вальс» зыфиIохэрэр, И. Якушенкэм мамыр щыIакIэм фэгъэхьыгъэу ыусыгъэр, нэмыкIхэри зэхахьэм щыIущтых.
Адыгэ Республикэм икомпозиторхэм яорэдхэри пчыхьэзэхахьэм щызэхэтхыщтых. В. Анзэрэкъом иорэдэу «Къэбар дахэр» Адыгэ Республикэм инароднэ артисткэу Нэгъой Маринэ къыIощт. Дунэе фестивальхэм ялауреатхэу Сергей Трутневым, Теуцожь Бэлэ, Сергей Пособиловым Урысыем, Адыгеим якомпозиторхэм яорэдхэр агъэжъынчыщтых. Дунэе фестиваль-зэнэкъокъум ишIухьафтын шъхьаIэ къызыфагъэшъошэгъэ Набэкъо Бэлэ фортепианэмкIэ къадежъыущт.
Пчыхьэзэхахьэр зезыщэщт лектор-искусствоведэу Татьяна Резниченкэм Урысыем и Къэралыгъо быракъ итарихъ, орэдхэм яхьылIэгъэ гупшысэхэр къыIотэщтых. Концертым «Пушкинскэ картэкIэ» искусствэр зышIогъэшIэгъонхэр чIэхьанхэ алъэкIыщт, филармонием билетхэр щащэх.