Дунэе телевизионнэ фестиваль-зэнэкъокъоу «Песенка года» зыфиIорэр хэгъэгум щызэлъашIэрэ кIэлэцIыкIу гупчэу «Орленкэм» щыкIуагъ.

Москва, Адыгэ Республикэм, Къырым, Татарстан, Тюмень, Краснодар, Архангельскэ, Ульяновскэ, Белгород, нэмыкIхэм къарыкIыгъэ кIэлэцIыкIуи 130-рэ зэнэкъокъум хэлэ­жьагъэх. Мыекъуапэ икIэлэцIыкIу орэдыIо-эст­раднэ зыгъэсапIэу «Радугэм» иеджакIохэм ясэнаущыгъэ зэхахьэм къыщагъэлъэгъуагъ.

Урысыем культурэмрэ искусствэмрэкIэ и Фонд проектым икIэщакIу, хэгъэгум икIэлэцIыкIу гупчэу «Орленкэр» ащ IэпыIэгъу къы­фэхъугъ. Телевидением илъэсыбэрэ Iоф щы­зышIагъэу, Урысыем инароднэ артисткэу Ангелина Вовк фестиваль-зэнэкъокъум ипрезидент, зэхэщэн Iофхэр зэрихьагъэх.

ОсэшI купым хэтыгъэх ВДЦ «Орленкэм» музыкэмкIэ ипащэу Игорь Киреевыр, культурэм щызэлъашIэхэрэ Павел Пушкиныр, ­ Мари Карне, Михаил Кунициныр, Елена Морозовар. осэшIхэм IэпэIасэм иегъэджэнхэр зэхащагъэх, зэнэкъокъум хэлажьэхэрэм ягъу­сэхэу сценэм къытехьагъэх, кIэлэцIыкIухэм щысэ афэхъугъэх.

— Фестиваль-зэнэкъокъур мэфи 6 кIуагъэ, — къытиIуагъ кIэлэцIыкIу зыгъэсапIэу «Ра­дугэм» ихудожественнэ пащэу Елена Щербак, — Москва, Новосибирскэ, Архангельскэ, Челябинскэ, фэшъхьафхэм ащыщхэм нэIуасэ тафэхъугъ, тызэнэкъокъугъ. Адыгеим икIэлэеджакIохэр яплIэнэрэу зэнэкъокъум хэлэжьагъэх, текIоныгъэр къыдахыгъ.

ЩытхъуцIэхэр

Лауреат хъугъэх ыкIи апэрэ чIыпIэхэр къыдахыгъэх ансамблэхэу «Выше радуги», «12 квадратов» зыфиIохэрэм, орэдыIохэу Яна Щербак, Арина Акопян, Юлиана Гордиенкэм, зэгъусэхэу орэд къэзыIуагъэхэ Юлиана Гордиенкэмрэ Арина Акопянрэ.

Татьяна Тарохинамрэ Даниил Теницкэмрэ ятIонэрэ чIыпIэхэр къахьыгъэх. Камилла Князевар ящэнэрэ хъугъэ.

Ансамблэу «12 квадратов», орэдыIоу Яна Щербак «Гала-концерт» зыфаIорэм хэлэжьагъэх. «Беловежская пуща» зыфиIорэ орэдыр артист, музыкант цIэрыIоу Павел Пушкиным игъусэхэу Адыгеим икIэлэцIыкIухэм къызэраIуагъэм тигъэгушIуагъ.

Хэгъэгу проектэу «Песенка года» зыфиIорэр кIэлэеджакIохэм зыгъэсапIэ афэхъугъ, мэфэ 21-м къыкIоцI шъолъырхэм къарыкIыгъэхэм къэбархэр къызэфаIотагъэх, ныбджэгъуны­гъэу зэдыряIэр нахь пытэ хъугъэ.

ЗыгъэсапIэу «Радугэм» «Орленкэм» гъэ­хъагъэу щишIыгъэр къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фегъэхьы.