Къэорэ пкъыгъор къагъотыгъэп
Хьыкумым иунэхэу Адыгеим итхэм къэорэ пкъыгъохэр ачIэлъхэу къэбар нэпцIыр ятIонэрэу зыгъэIугъэр Адыгеим ихэбзэухъумэкIо къулыкъухэм агъэунэфы.
— 2022-рэ илъэсым шышъхьэIум и 8-м Адыгеим ихэбзэухъумэкIо къулыкъухэм къэбар къаIэкIэхьагъ Адыгэ Республикэм и Апшъэрэ хьыкум ыкIи Мыекъопэ къэлэ хьыкумым яунэхэм ащ фэдэ пкъыгъохэр ачIэлъхэу. Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм мы хъугъэ- шIагъэмкIэ псынкIэу уплъэкIун Iофтхьабзэхэр зэхищагъэх, — къеты АР-м хэгъэгу кIоцI IофхэмкIэ и Министерствэ.
КъулыкъушIэхэм хьыкумым унэхэр къызалъыхъухэм, къэорэ пкъыгъо ачIэмылъэу къычIэкIыгъ. Тыгъуаси, шышъхьэIум и 9-м, полицием икъулыкъушIэхэм оперативнэ ыкIи хэушъхьафыкIыгъэ лъыхъун Iофтхьэбзэ тедзэхэр мы IофымкIэ зэрахьагъэх, арэу щытми, зыпари къагъотыгъэп.
Адыгеим иполицие шъугу къегъэкIыжьы, УФ-м и Уголовнэ кодекс истатьяу 207-м «Терроризмэ нэшанэ зиIэ къэбар нэпцIыр зыгъэIурэм ехьылIагъ» зыфиIорэм къызэригъэнафэу, мыщ фэдэ бзэджэшIагъэ зезыхьагъэм илъэси 10-м нэс хьапс тыралъхьан алъэкIыщт.
Шъугу къэдгъэкIыжьын, шышъхьэIум и 2-м ыкIи и 3-м мыщ фэдэ къэбар нэпцIхэм къахэкIэу уплъэкIун Iофтхьабзэхэр ащыкIуагъэх.