Хэгъэгум футболымкIэ иапшъэрэ куп хэт футбол клубхэм шышъхьэIум и 6 — 7-м я 4-рэ ешIэгъухэр яIагъэх.

КIэуххэр

«Урал» — «Спартак» — 0:2, ЦСКА – «Факел» — 4:1, »Краснодар» — «Локомотитв» — 3:0, «Ахмат» — «Зенит» — 0:0, «Торпедо» — «Химки» — 1:3, «Крылья Советов» — «Динамо» — 0:2, «Ростов» — «Оренбург» — 2:1, «Шъачэ» — «Пари НН» — 2:1.

Яплъыгъэхэр

«Краснодар» ыкIи «Локомотив» язэнэкъокъу нэбгырэ мин 25-м нахьыбэ еплъыгъ. ЦСКА — «Факел» мин 14-м нахьыб, «Ахмат» — «Зенит» мини 10 фэдиз. Анахь макIэу зэплъыгъэхэр «Торпедо» — «Химки» мини 3-м къехъу, «Шъачэ» — «Пари НН» мини 3-м нахьыб.

«Урал» я 4-рэ ешIэгъури шIуа­хьыгъ. Тренер шъхьаIэу И. Шалимовым къызэриIуагъэу, «Урал» нахь дэгъоу ешIэнэу зегъэхьазыры.

Клубым гугъэр зэрэчIимынэрэр дэгъу, ау хэта зытекIыщтыр? «Урал» изичэзыу ешIэгъу Воронеж щыкIощт.

«Спартак» хэпшIыкIэу иешIакIэ хигъэхъуагъ, медальхэм афэбэнэн имурад.

Мырзэ Резыуан къахэщы

«Химки» 3:1-у «Торпедэм» текIуагъ. Долговыр ешIэгъум иятIонэрэ едзыгъо ешIапIэм къи­хьи, гъогогъуи 2 хъагъэм Iэгуаор ридзагъ. ЗэIукIэгъум иешIэкIо анахь дэгъоу къыхахыгъэр Мырзэ Резыуан.

Къэлапчъэм Iэгуаор димыдзагъэми, Р. Мырзэм зэхэщэн Iофыгъохэр дэгъоу ыгъэцэкIагъэх.

— Мырзэ Резыуан профессионал, ыгъэцэкIэн фаер дэгъоу ешIэ, — къы­Iуагъ Урысыем гъогогъуи 8 ичемпион хъугъэу Андрей Тихоновым.

«Краснодар» иегъэжьапIэхэр

«Краснодар» Урысыем иклуб анахь лъэшхэм ащыщэу «Локомотив» Москва 3:0-у зэрэтекIуагъэр футболым хэшIыкI фызиIэхэм агъэшIагъо. Шэпхъэ лъагэм кIэ­хьэрэ ешIакIэу къагъэлъэгъуагъэм уегъэгушIо. «Краснодар» иухъумакIоу Рамирес сэмэгубгъумкIэ ыпэкIэ илъи, «Локомотив» икъэлапчъэ пэчыжьэу дауи, Iэгуаор чэрэгъузэ хъагъэм дидзагъ.

Я 85-рэ ыкIи я 90+ 5-м Олусегун ешIапIэм игупчэ итэу ухъумакIохэм аIэкIэкIызэ тIогъогогъо «Локомотив» икъэлапчъэ Iэгуаор дидзагъ. Ащ фэдэ футбол дахэм уемызэщэу уеплъыщт.

Ижъырэ адыгэ къалэу Шъачэ иклуб апэ итхэм къахэхьажьы. «Зенит» чIэнагъэхэр ешIых, ЦСКА-р «Факел» дэгъоу дешIагъ. Хэта апэ ишъы­щтыр? Зичэзыу зэIукIэгъухэр гъэшIэгъонэу кIощтых.

Апэ ишъыгъэхэр е апэ ишъынхэу мурад зышIыгъэхэр зичэзыу зэIукIэгъухэм ащызэнэкъокъущтых.

ЧIыпIэхэр

1. ЦСКА — 10 2. «Спартак» — 10 3. «Шъачэ» — 9 4. «Динамо» — 8 5. «Ростов» — 8 6. «Зенит» — 8 7. «Химки» — 7 8. «Краснодар» — 7 9. «Ахмат» — 5 10. «Кр. Советов» — 4 11. «Оренбург» — 3 12. «Пари НН» — 2 13. «Локомотив» — 2 14. «Факел» — 2 15. «Торпедо» — 1 16. «Урал» — 0.

Я 5-рэ ешIэгъухэр

19:30 12.08. «Факел» — «Урал» 13.08. 15.00 «Локомотив» — «Кр. Советов» 13.08. 17:00 «Зенит» — ЦСКА 13.08. 20:00 «Динамо» — «Краснодар» 14.08. 15.00 «Химки» — «Ахмат» 14.08. 17:30 «Оренбург» — «Торпедо» 14.08. 17:30 «Пари НН» — «Ростов» 14.08. 20.00 «Спартак» — «Шъачэ».