Щысэ зытырахырэ кIэлэцIыкIу адыгэ къэшъокIо ансамблэу «Мые­къуа­пэ инэфылъэхэр» я ХVIII-рэ Дунэе фестивалэу Тыркуем щыкIуагъэм хэлэжьагъ.

Кавказыр ыкIи дунаир мамырэу псэунхэм афэгъэхьыгъэ Дунэе фестивалэу Тыркуем икъалэу Ялово щызэхащагъэм кавказ икъашъохэр къыщашIыгъэх, орэдхэр къыщаIуагъэх.

«Мыекъуапэ инэфылъэхэр», Къэбэртэе-Бэлъкъарым къи­кIыгъэ «Щагъдыир», Дагъыстан иансамблэхэу «Кавказ икъушъхьэчIэсхэр» ыкIи «Хасавюрт» зыфиIохэрэр, Темыр Осетием — Аланием иансамблэу «БАРС» зыцIэр Урысыем икIыгъагъэх.

Фестивалым иапэрэ мафэ, бэдзэогъум и 26-м, ансамблэхэр, орэдыIохэр нэIуасэ зэфэхъугъэх. КъыкIэлъыкIогъэ мафэм Ялово изэIухыгъэ чIыпIэхэм концертхэр къащатыг­ъэх. «Мыекъуапэ инэфылъэхэр», пащэхэр къалэу Ялово имэрэу Мустафа Тутук IукIагъэх.

Илъэсыбэ хъугъэу адыгэ къуаджэу Сауджакърэ «Мые­къуапэ инэфылъэхэмрэ» ныб­джэгъуныгъэ зэдыряI. Адыгеим иансамблэ цIэрыIо къуаджэм дэсхэм аIукIагъ. ХьакIэхэмрэ бысымхэмрэ зэдэуджыгъэх. Фе­стивалыр бэдзэогъум и 30-м зэфашIыжьыгъ. «Гала-концерт» зыфаIорэ пчыхьэзэхахьэм тиныбжьыкIэхэр къыщышъуагъэх.

Ансамблэу «Мыекъуапэ инэфылъэхэм» ихудожественнэ пащэу, Урысыем культурэмкIэ изаслуженнэ IофышIэу, Къэ­бэр­тэе-Бэлъкъарым изаслуженнэ артистэу, Адыгеим инароднэ артистэу Нэныжъ Айдэмыр «Шъолъырэу Ялово изаслуженнэ артист» зыфиIорэ щытхъуцIэр къыфаусыгъ, зэхахьэм къы­щыфэгушIуагъэх.

Адыгэ Республикэм культу­рэмкIэ и Министерствэ лъэшэу афэраз Урысыем и МИД, Краснодар краим, Владикавказ якъулыкъушIэхэм, Швейцарием илIыкIохэу Грузием щыIэхэм, Урысыем и Генеральнэ консульствэу Истамбул щыла­жьэ­рэм зэхэщэн IофхэмкIэ IэпыIэгъу къазэрафэхъугъэхэм фэшI.

— Фестивалым лъэпкъхэр зэфищагъэх, зэIукIэгъухэр шIукIэ тыгу къэкIыжьыщтых, зэхэ­ща­кIохэм яшIушIагъэ тщыгъуп­шэщтэп, — къытиIуагъ Нэныжъ Айдэмыр.

ЕмтIылъ Нурбый.