Сурэттехым уегъэгъуазэ
Адыгэкъалэ имодельнэ тхылъеджапIэ щызэхащэгъэ зэхахьэр фэгъэхьыгъ сурэтэу тырахыгъэм щыIэкIэ-псэукIэр къызэригъэлъагъорэм.
Урысыем игеографическэ обществэ хэтэу, сурэттехэу Хьакъуй Аленэ (Иванова) иегъэджэн зэхахьэ гъэшIэгъонэу кIуагъэ. Сурэтхэр зэрэтырихыхэрэм, темэр ыкIи сурэтым гупшысэу хилъхьащтыр къызэрэхихырэм, нэмыкIхэм къатегущыIагъ.
Сурэтрепортажыр зэрэбгъэпсыщтым, орэдыIохэм, театрэм иартистхэм, фэшъхьафхэм сурэт атепхы зыхъукIэ хэушъхьафыкIыгъэу IофшIэныр зэхэпщэн зэрэфаем, нэмыкIхэм А. Хьакъуир къатегущыIагъ.
Тыкъэзыуцухьэрэ дунаим еплъыкIэу фыуиIэр сурэтымкIэ къэбгъэлъэгъоным фэшI пэшIорыгъэшъэу зыбгъэхьазырыным, чIыпIацIэхэр, тарихъыр зэбгъэшIэнхэм ямэхьанэ, фэшъхьафхэм яхьылIэгъэ къэбархэр зэхахьэм къыщаIотагъэх.
— Сурэтыр зэрэтепхыщт шIыкIэм, сурэт пэпчъ гупшысэу хаплъхьэ пшIоигъом, нэмыкIхэм Аленэ гъэшIэгъонэу къатегущыIагъ, — къыIуагъ зэхахьэм хэлэжьэгъэ Ф. ТхьалIым.
Узыгъэгъозэрэ сурэттехым нахьыбэрэ уIукIэ зэрэпшIоигъом тхылъеджакIохэр къытегущыIагъэх. Модельнэ тхылъеджапIэр IофшIэкIэшIум зэрэфытегъэпсыхьагъэр яеплъыкIэхэм къащыхагъэщыгъ.