Зэзэгъыныгъэу зэдашIыгъагъэхэм атегъэпсыхьагъэу лъэныкъо пстэури къызэ­лъызыубытырэ зэдэлэжьэныгъэм зегъэушъомбгъугъэным пае Республикэу Беларусь ихэбзэ къулыкъухэм ыкIи ипредприятие заулэмэ ялIыкIохэр зыхэт купыр Адыгеим къэкIуагъ.

ЛIыкIохэм япащэр концернэу «Белгоспищепром» зыфиIорэм итхьаматэ игуадзэу Александр Яковчиц. А купым хэтых Рес­публикэу Беларусь промышленностымкIэ и Министерствэ, мэкъу-мэщымкIэ ыкIи гъомылапхъэхэмкIэ и Министерствэ ялIыкIохэр, къэралыгъо учреждениеу «Инвестициехэмрэ приватизациемрэкIэ Лъэпкъ агентствэм», пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Торговый дом МТЗ-Северо-Запад», холдингэу «БЕЛАВТОМАЗ», «Амкодор-Юг», «ТД Палессе-Юг», «Витебский маслоэкстракционный завод», «Коммунарка», «Агроимпэкс» зыфи­Iо­хэрэм яIофышIэхэр.

Iофтхьабзэр рамыгъа­жьэзэ, пстэуми апэу къа­лэу Мыекъуапэ дэт мемориалэу заом хэкIодагъэ­хэм ацIэкIэ агъэпсыгъэм къэгъэгъэ блэрхэр кIэ­лъы­ралъхьагъэх. Хэгъэгу зэ­ошхом илъэхъан лIыхъужъныгъэ зэрахьэзэ хэкIо­дагъэхэм ямемориал зы такъикърэ щышъыгъуагъэх. Нафэу зэрэщытымкIэ, Те­мыр Кавказым иухъумакIохэм ахэтыгъэх Беларусь щыщ зэолIхэри. Адыге­им щыщхэри мыма­кIэу Белоруссием ичIыгу щыфэхыгъэх. ТичIыпIэгъу нэбгырэ 13-мэ лIыгъэу зэрахьагъэм пае Советскэ Союзым и ЛIыхъужъыцIэ, нэбгыри 8-мэ Щытхъум иорден къафагъэшъошэ­гъагъ.

Адыгэ Республикэм и ЛIышъхьэу КъумпIыл Муратрэ Республикэу Беларусь къикIыгъэ купым иIэ­шъхьэтетэу Александр Яковчицрэ зэдэлэжьэныгъэм илъэныкъо шъхьа­Iэхэм атегущыIэщтых. Ащ нэужым предпринима­тельствэм IэпыIэгъу етыгъэнымкIэ республикэм Iофтхьабзэу щызэрахьэ­хэрэм хьакIэхэр нэIуасэ афашIыщтых, бизнес­-гупчэм иIофшIакIи ща­гъэгъозэщтых. А чIыпIэм купэу къэкIуагъэм хэтхэмрэ Адыгэ Республикэм иминистрэхэм я Кабинетрэ зыхэлэжьэщтхэ зэIукIэ щыкIощт.

Шъугу къэтэгъэкIы­жьы: Урысыем ыкIи Беларусь яшъолъырхэм яя IХ-рэ форумэу мы илъэсым бэ­дзэогъум щыIагъэм Уры­сыем и Президентэу Владимир Путиным къыщиIогъагъ Урысые Федера­циемрэ Республикэу Беларусьрэ яшъолъырхэм язэдэлэжьэныгъэ тихэ­гъэгухэм азыфагу илъ гъунэгъушIу зэфыщытыкIэхэм алъапсэу зэрэ­щытыр, лъэныкъуитIуми яфедэ зыхэлъ экономикэ кооперацием хэ­хъо­ныгъэ ышIынымкIи ащ мэхьэнэ гъэнэфагъэ иIэу щыт.

Къэралыгъохэм язэдэлэжьэныгъэ ыкIи экономикэмкIэ язэпхыныгъэхэм зягъэушъомбгъугъэным пае 2021-рэ илъэсым Республикэу Беларусьрэ Адыгэ Республикэм иминистрэхэм я Каби­нетрэ зэзэгъыныгъэ зэ­дашIы­гъагъ сатыу-эко­номикэ, научнэ-техническэ ыкIи социальнэ-культурнэ зэ­дэлэжьэныгъэм ылъэныкъокIэ. Джащ фэ­дэу Iоф зэрэзэдашIэщтым иплан зэхагъэуцуагъ, лъэ­ныкъо зэфэшъхьафхэм-кIэ къэ­ралыгъуитIуми язэ­дэлэ­жьэныгъэ яфедэ ащ хэлъ.

Адыгэ Республикэм экономикэ хэхъоныгъэмкIэ ыкIи сатыумкIэ и Министерствэ къызэрэщаIуа­гъэмкIэ, Адыгеимрэ Бе­ларусьрэ яшъолъырхэм сатыу-экономикэ зэфы­щытыкIэ пытэхэр азыфагу илъ хъугъэх. Ахэм джыри нахь зягъэушъомбгъугъэным пае Адыгэ Респуб­ликэм экспортым IэпыIэгъу етыгъэнымкIэ и Гупчэ Iофтхьэбзэ гъэнэфагъэхэр рихъухьагъэх, ахэм ахэлэжьагъэх Адыгеимрэ Беларусьрэ япредпринимательхэр.

ЛъэныкъуитIуми язэдэлэжьэныгъэ тапэкIи нахь зегъэушъомбгъугъэным къыдилъытэрэ Iофыгъохэм нахь игъэкIотыгъэу атегущыIэщтых. Ащ пае предприятие заулэхэм ащыIэщтых, республикэм экономикэмкIэ ыкIи ин­вес­тициехэмкIэ амалэу иIэ­хэм защагъэгъозэщт, биз­несым епхыгъэ зэIу­кIэгъухэри зэхащэщтых. ГущыIэм пае, пшъэдэ-кIы­жьэу ыхьырэмкIэ гъу­нэпкъэ гъэнэфагъэ зиIэ обществэу «Мирный-­Адыгея», «Щэ заводэу «Джаджэм», «Мамырыкъо», «Зарем», «Мыекъо­пэ машинэшI заводым», «МПК-м», пивэшI заводэу «Майкопскэм» ащы­Iэщтых, зекIоным епхыгъэ псэуа­лъэхэр, Адыгеим икультурнэ-тарихъ ыкIи ичIыопс чIыпIэ анахь гъэ­шIэгъонхэр зэрагъэлъэ­гъущтых.

Адыгэ Республикэм и ЛIышъхьэ ипресс-къулыкъу