Адыгэ бэнакIэмкIэ Адыгэ Республикэм изэIухыгъэ зэнэкъокъу шышъхьэIум и 6-м Мыекъуапэ щыкIощт.

Къэбэртэе-Бэлъкъарым, Къэрэщэе-Щэрджэсым, Краснодар краим, Адыгеим ябэ­накIохэр зэIукIэгъухэм ахэлэжьэщтых.

— Бгым ишIэгъэ бгырыпххэр аIыгъэу бэнакIохэр алырэгъум щызэнэкъокъущтых, — къытиIуагъ зэнэ­къокъур зыгъэзекIощт купым ипащэу, Дунэе Адыгэ Хасэм зекIонымкIэ, ныбжьыкIэ Iоф­хэмкIэ, физкультурэмкIэ ыкIи спортымкIэ и Комитет ипащэу, Урысыем, Адыгэ Рес­публикэм язаслуженнэ тренерэу Хъот Юныс.

Республикэ общественнэ движениеу «Адыгэ Хасэм», Адыгэ Республикэм физ­культурэмкIэ ыкIи спортымкIэ и Комитет ятIонэрэу зэхащэрэ зэнэкъокъур гъэшIэгъонэу ра­гъэкIокIыщт. БэнакIохэр орэдышъом дырагъаштэзэ зэIукIэгъум къыщышъощтых, яIэпэIэсэныгъэ алырэгъум къыщагъэлъэгъощт.

Адыгэ къэралыгъо уни­верситетым физкультурэмрэ дзю­домрэкIэ и Институт зэ­нэкъокъур щыкIощт. Шэмбэт пчэдыжьым сыхьатыр 10-м рагъэжьэщт.

ЗэхэщакIохэм спортыр зыгу рихьыхэрэр, лъэпкъ Iофхэм агъэгумэкIыхэрэр зэнэкъо­къум еплъынхэу рагъэблагъэх.