Игупшысэ исэнаущыгъэ къыщеIуатэ
Археолог, искусствовед цIэрыIоу ЛэупэкIэ Нурбый иIофшIагъэхэм якъэгъэлъэгъон Мыекъуапэ зэрэщыкIуагъэр шIукIэ тыгу къэтэгъэкIыжьы.
КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр Кавказ къутамэ ЛэупэкIэ Нурбый исурэтхэм якъэгъэлъэгъон фэгъэхьыгъэ зэхахьэр игъэкIотыгъэу къыщызэIуахыгъ. Ыныбжь илъэс 85-рэ зэрэхъугъэр зэхэщакIохэм къыдалъыти, къэгъэлъэгъоныр гъэшIэгъонэу агъэпсыгъ.
Адыгэ Республикэм ихэбзэ къулыкъушIэхэр, тарихъымрэ культурэмрэ апылъхэр, ныбджэгъухэр, Iахьылхэр, нэмыкIхэри къыфэгушIуагъэх. Мэфэ заулэ зытешIэм, Н. ЛэупакIэр музеим иIофышIэхэм къырагъэблагъи, исурэтхэм къатегущыIэнэу, ищыIэныгъэ гъогу нахьышIоу щигъэгъозэнхэу къелъэIугъэх.
Лъэпкъхэр зэфещэх
Абхъазым, Адыгеим яархеологхэм ясурэтхэмкIэ къэгъэлъэгъоныр Н. ЛэупакIэм къызэIуихыгъ. Археологхэм къагъотыгъэ тарихъ пкъыгъохэр щыIэныгъэм иIотакIох. Гурыт Азием, Кавказ ащашIыщтыгъэхэр, мыотIхэм якерамикэ, къошынхэр ятеплъэкIэ гъэшIэгъоных.
ЛIэшIэгъу пчъагъэкIэ узэкIэIэбэжьмэ, IэпэIасэхэр ягупшысэкIэ зылъыIэсыщтыгъэхэм унаIэ атеодзэ.
ЧIыопсым идэхагъэ, изэхъокIыныгъэхэм сурэтышIыр гукIэ алъэIэсы. Ошъутенэ къушъхьэ лъагэу зэрэщытым дакIоу, кIымафэм теплъэу иIэр Н. ЛэупакIэм къегъэлъагъо. МыотIхэм якультурэ къыхигъэщырэр IэшIагъэхэм къапкъырэкIы. Бжъакъом хэшIыкIыгъэ бжъэр, къопситIу зиIэ къошын цIыкIур, джэрз тандж паIор, абдзэхэ унэмрэ щагумрэ ятеплъэ, нэмыкIхэри Н. ЛэупакIэм итворчествэ пытэу хэуцуагъэх.
Унэр чIым теIэтыкIыгъэу, лъагэу, мыжъом хэшIыкIыгъэу зэрэщытым бэмэ уарегъэгупшысэ. Адыгэмэ щыIэкIэ-псэукIэу яIагъэр сурэтышI цIэрыIом зэрегъапшэ, нахь дахэу ылъытэрэр къахегъэщы.
Бжъэдыгъу шъолъырым унэр зэрэщашIыщтыгъэри Н. ЛэупакIэм ыгъэунэфыгъ. Щагу дэхьапIэр зэкIужьэу къэлъагъо, чыкIэ къэшIыхьагъ. Унэм икIэсэнхэр пытэх, унашъхьэр дахэу бгъагъэ. Хъызмэт Iофыгъохэр бзылъфыгъэм пчъэIупэм щегъэцакIэх, кIэлэцIыкIухэр щагум щэджэгух. Сурэтыр шъо зэфэшъхьафхэмкIэ гъэкIэрэкIагъэшъ, идэхагъэ узыIэпещэ. Огу къаргъори, къушъхьэхэри нэплъэгъум итых.
Сурэтыр «къегъэгущыIэ»
Испунэхэм яхьылIэгъэ сурэтхэр тарихъым иIотакIох. Искусствэм щыщ нэкIубгъохэр сурэтхэмкIэ зэтэгъапшэх. Шыухэр, тхыпхъэхэр, хьакIэ-къуакIэхэр, фэшъхьафхэри Н. ЛэупакIэм гощыгъэхэу къегъэлъагъох. ЦIыфым щыIэныгъэм чIыпIэу щыриIэм уасэ фешIы.
Адыгэ Iанэр, гъомылапхъэр ащ зытырагъэуцокIэ итеплъэ нэмыкI шъыпкъэ зэрэхъурэр сурэтышI цIэрыIом иIофшIагъэхэм къащыхегъэщы. Лъэпкъ шэн-хабзэхэм язехьан тарихъым, искусствэм къащежьэу Н. ЛэупакIэм елъытэ.
Культурэм, искусствэм ащызэлъашIэрэ цIыфхэм ясурэтхэр псынкIэу къыбгурэIох. Тхьабысымэ Умарэ, Сэмэгу Гощнагъо, Шэуджэн Бэлэ, ГъукIэ Замудин, фэшъхьафхэм атыришIыкIыгъэ сурэтхэр философиеу ахэлъым къегъэдахэх.
Нарт эпосым гукIэ ухещэ, Лъэпшъ кIыщым зэрэщыгъукIэрэм уегъэгупшысэ. ИлъэсыбэкIэ узэкIэIэбэжьмэ, адыгэхэм кIыщыр ящыкIагъэу зэрэщытыгъэр Н. ЛэупакIэм къегъэлъагъо.
Пэсэрэ лъэхъанымрэ непэрэ щыIакIэмрэ сурэтышIым зэрепхых. Зэфэхьысыжьхэм къахэтэгъэщы адыгэхэм тарихъ гъогоу къакIугъэр зыми зэрэхэмыкIуакIэрэр.
Iоф умышIэу зыбгъэпсэфын умылъэкIыщтэу Н. ЛэупакIэм къытиIуагъ. Къыхэпхыгъэ сэнэхьатыр щыIэныгъэм къыщыотэжьыным фэшI уимурадхэм уафэкIон фаеу елъытэ.
Дахъо дэжь джэгупIэ гъэхъунэхэр къыщыхигъэщыгъэх. СурэтышIыр зэрэлъыхъорэр, шIыкIэшIухэр къызэригъотыхэрэр исурэтхэм ахэолъагъо. ЛэупэкIэ Нурбый ыныбжь илъэс 85-рэ хъугъэми, зигъэпсэфынэу уахътэ имыIэу къыщэхъу. IофшIэным зыфищэизэ, исэнэхьат ишъэфхэм мэкъэ шъабэкIэ адэгущыIэ.
ЕплъыкIэхэр
ЗэлъашIэрэ сурэтышI-модельерэу СтIашъу Юр, сурэтышIэу, кIэлэегъаджэу ГъукIэ Замудин, Дунэе Адыгэ Хасэм хэтхэу МэщфэшIу Нэдждэт, ЦIыкIушъо Аслъан, зэлъашIэрэ археологэу Тэу Аслъан, музеим икъулыкъушIэхэу Сулейманова Фатимэ, ХъокIо Ларисэ, нэмыкIхэри къэгъэлъэгъоным еплъыгъэх.
Музеим ипащэу, Урысыем, Адыгеим, Ингушетием культурэмкIэ язаслуженнэ IофышIэу ШъэуапцIэкъо Аминэт къызэриIуагъэу, къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэр игъэкIотыгъэу хэтэгъэунэфыкIы. 2022-рэ илъэсыр Урысыем щыпсэурэ лъэпкъхэм яискусствэрэ якультурнэ кIэнрэ я Илъэсэу щыт. Зэхащэрэ Iофтхьабзэхэр тарихъым ихъугъэ-шIагъэхэм япхыгъэх.
— Сурэтхэм сигуапэу сяплъыгъ, — къытиIуагъ Дунэе Адыгэ Хасэм ипрезидент иупчIэжьэгъоу МэщфэшIу Нэдждэт. — ЛэупэкIэ Нурбый лIэшIэгъухэм яхьылIэгъэ сурэтхэр гурыIогъошIоу, лъэпкъ гупшысэр ахэлъэу ешIых.
Адыгэ Республикэм исурэтышIхэм я Союз итхьаматэу Елена Абакумовар Н. ЛэупакIэм къыщытхъугъ, щыIэныгъэр исурэтхэмкIэ къызэриIуатэрэм мэхьэнэ ин иIэу ылъытагъ.
АР-м культурэмкIэ и Министерствэ иотдел ипащэу, Адыгеим культурэмкIэ изаслуженнэ IофышIэу Шэуджэн Бэлэ искусствэм ицIыф цIэрыIоу ЛэупэкIэ Нурбый сурэт пэпчъ гупшысэ хэхыгъэ хилъхьан зэрилъэкIырэр, итворчествэкIэ Адыгэ Республикэм щытхъу къызэрэфихьырэр хигъэунэфыкIыгъэх, игъэхъагъэхэм ахигъэхъонэу фэлъэIуагъ.
Н. ЛэупакIэм иIахьылхэр, искусствэр зыгъэлъапIэхэрэр зэхахьэм къыщыгущыIагъэх. ЛэупэкIэ Нурбый Адыгэ Республикэм и ЛIышъхьэу КъумпIыл Мурат, Правительствэм, АР-м культурэмкэ и Министерствэ, музеим икъулыкъушIэхэм, итворчествэ ехьылIэгъэ къэгъэлъэгъонхэм яплъыгъэхэм «тхьашъуегъэпсэу» къариIожьыгъ.
ИIофшIагъэкIэ щыIэныгъэр къэзыгъэлъэгъорэ ЛэупэкIэ Нурбый сэнаущыгъэу хэлъымкIэ дунаим щыцIэрыIу, IэкIыб къэралхэм иIэпэIэсэныгъэкIэ алъыIэсыгъ. Нарт бэгъашIэхэм ащыщ хъунэу, исурэтхэмкIэ тапэкIи тигъэгушIонэу фэтэIо. Опсэу, Нурбый!
ЕмтIылъ Нурбый.