Илъэсишъэ гъогур
МэфэкI инэу – Адыгеим къэралыгъо гъэпсыкIэ иIэ зыхъугъэр илъэси 100 зэрэхъугъэм фэгъэхьыгъэу АР-м и Лъэпкъ тхылъеджапIэ тхылъ экспозициеу «Путь государственности» зыфиIорэр къыщызэIуахыгъ.
Ащ адыгэ лъэпкъым ишъхьафитныгъэ гъогу къызыщежьагъэр ыкIи ар зэрэкIищыгъэр, игугъэ ин зэрекIугъэр къизыIотыкIырэ тарихъ тхылъ зэфэшъхьафыбэ хэлъ. Ахэр мэкIай зэгот лъагэхэм ащызэгъэзэфагъ.
Адыгеир загъэпсыгъэр илъэси 100 зэрэхъугъэр, мы гъогу иныр адыгэ лъэпкъым дахэу къызэрикIугъэр – тарихъ мэхьанэшхо зиIэ хъугъэ-шIагъ.
Октябрэ революциешхоу 1917-рэ илъэсым щыIагъэм политическэ зэхъокIыныгъэшхохэу фызэшIокIыгъэхэм яхьатыркIэ, къэралыгъо гъэпсыкIэр цIыф лъэпкъ цIыкIухэм агъотыгъ.
Бэдзэогъум и 27-м, 1922-рэ илъэсым РСФСР-м и ВЦИК и Президиум иунашъокIэ, Черкес (Адыгэ) автоном хэкур зэхащэгъагъ; (шышъхьэIум и 24-м, 1922-рэ илъэсым ащ ыцIэ Адыгэ (Черкес) автоном хэкукIэ зэблахъугъ.
Автономиер щыIэ зэрэхъугъэм хэбзэ къулыкъухэр гъэпытэгъэнхэмкIэ лъэшэу ишIогъэшхо къэкIуагъ, адыгэхэм щыIэныгъэм илъэныкъуабэкIэ зэфэдэныгъэр, анахьэу къэралыгъо гъэпсынымкIэ агъотыгъ. Автономием экономическэ ыкIи культурнэ хэхъоныгъэхэр ышIынхэмкIэ ащ лъэшэу ишIуагъэ къэкIуагъ, адыгэхэм ялъэпкъ шъхьалъытэжь, яшэн-хабзэхэр къаухъумэн-къагъэгъунэн амал къаритыгъ; тхыбзэр, литературэр, профессиональнэ культурэр зэрагъэгъотыгъэх. Къэралыго шэпхъэ щыIакIэм икъежьапIэ щытыгъэх Шэуджэн Мосэ, Хьахъурэтэ Шыхьанчэрые, ГукIэкъулэ Даут, Дмитрий Швец, Казимир Голодович, Мишурые Казбек, Петр Заема, мыхэм анэмыкIхэри.
Адыгэ лъэпкъым зиушхунымкIэ, щыIэкIакIэу зыкIэхъопсыхэу зыщыгугъыхэрэр пхырыщыгъэнымкIэ, лъэпкъ культурэм ыкIи наукэм лъагъо афыхэхыгъэнымкIэ Iофышхо алэжьыгъ апэрэ шIэныгъэлэжь-лингвистэу Iэшъхьэмэфэ Даутэ, лъэпкъ гъэсэныгъэм иапэрэ зэхэщэкIуагъэу Сихъу Сэфэрбый, нэмыкIхэми.
Къэгъэлъэгъоным хэлъ сборникхэм, тхылъхэм, журналхэм, альбомхэм тарихъ хъугъэ-шIэгъэ инэу, адыгэ лъэпкъым автономиер зэригъотыгъэр, лъэныкIуабэкIэ ащ зызэриушхугъэр къащиIотыкIыгъ.
«Адыгейская автономная область» зыфиIорэ тхылъэу уахътэм зитеплъэ ыгъэушъокугъэр ащ ишыхьат. Экспозицием хэлъых тарихъыр куоу, документ гъэнэфагъэхэр лъэбэкъоу адзырэм пэпчъкIэ зыщыгъэунэфыгъэ тхылъхэр.
ОхътакIэм диштэу, адыгэ литературэми зэрэхэхъуагъэр, ащ иублэпIэ-къежьапIэ лъэпкъ усакIоу Теуцожь Цыгъо, тхакIохэу, лъэпкъ литературэм илъэпсэхэщхэу КIэрэщэ Тембот, Хьаткъо Ахьмэд, Цэй Ибрахьимэ зэрэщытыгъэхэр щыкIэгъэтхъыгъ. Апэрэ гъэзетхэр къыдагъэкIыхэ хъугъэ — чъэпыогъум, 1922-рэ илъэсым — «Черкесская правда», гъэтхапэм, 1923-рэ илъэсым — «Адыгэ макъ» зыфиIорэ гъэзетыр.
Ау тикъэралыгъошхоу СССР-м нэмыц-техакIохэр гухэлъыжъ бзаджэ яIэу зэрапхъонэу къытебэнагъэх ыкIи Хэгъэгушхом, ащ щыпсэурэ цIыф лъэпкъхэм тхьамыкIэгъошхор ошъопщэ шIуцIэ гуихэу къашъхьащыуцогъагъ. Советскэ цIыфхэр, хэгъэгум ипащэхэр зыч-зыпчэгъоу зэкъоуцуагъэх, зэо жъалым илъэсхэр къызэранэкIыхи, ТекIоныгъэм къыфэкIуагъэх, мамырныгъэ щыIакIэм изэтегъэпсыхьажьынкIэ гъэзагъэу, промышленностымкIэ, мэкъу-мэщымкIэ, гъэсэныгъэмкIэ, шIэныгъэмкIэ, культурэмкIэ пытэгъэ-теубытагъэ хэлъэу Iофышхо ашIагъ, лъэныкъуабэкIэ хэхъоныгъэхэр ашIыгъэх. ЗэкIэ хъурэ-шIэрэм ялъытыгъэу, тихэку дышъэу, тигупсэ Адыгеими хэхъуагъ, зиIэтыгъ, къэралыгъо статусыр – автономием къыщежьэу, республикэм нэсыжьэу ыгъотыгъ. Адыгеир – Адыгэ Республикэ хъугъэ. Апэрэ Президентэу хадзыгъэр А. А. Джарымэр ары.
Непэ Адыгеир хэхъоныгъэ инхэр зышIырэ республик. Экономикэм, гъэсэныгъэм, культурэм, искусствэм, спортым ыкIи зекIоным лъэшэу заштагъ. Мы зэкIэмкIэ узгъэгъуазэу щыт адыгэ лъэпкъым къэралыгъо гъэпсыкIэр зигъотыгъэ илъэси 100-р къэзыупкIэпкIэу, къэзыIотэрэ къэгъэлъэгъоныр.
Мэхьанэ зиIэ Iофтхьабзэм изэшIохын АР-м и Лъэпкъ тхылъеджапIэ краеведениемрэ литературэмрэкIэ иотдел иIофышIэхэр чанэу хэлэжьагъэх. Щэч хэлъэп, къэгъэлъэгъоныр адыгэ лъэпкъым игъогу зыфэдагъэр къизыIотыкIэу зэрэщытым.
Мамырыкъо Нуриет.
Сурэтым итыр: мэфэкI къэгъэлъэгъонэу, «Путь государственности» зыфиIорэм итеплъ.