Орэдыр игупшыс
Адыгэ Республикэм изаслуженнэ артисткэу Даутэ Сусанэ иконцерт бэдзэогъум и 28-м Мыекъуапэ щыкIуагъ.
КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутамэ щызэхащэгъэ пчыхьэзэхахьэм нэбгырабэ хэлэжьагъ. Урысыем культурэмкIэ изаслуженнэ IофышIэу, Адыгэ Республикэм искусствэхэмкIэ изаслуженнэ IофышIэшхоу Хъот Заур игупшысэхэм къащыхигъэщыгъ концертым хэгъэгум ишъолъырхэм ащыпсэурэ лъэпкъ зэфэшъхьафхэр зэреплъыгъэхэр. Даутэ Сусанэ Урысыем ифестиваль-зэнэкъокъухэм щытхъуцIэхэр къащыдихыгъэх. Ымакъэ уедэIу зыхъукIэ, орэдэу къыIорэм нахь куоу ухещэ.
Даутэ Сусанэ ирепертуар бай дэдэу щыт. Адыгэ орэдэу къыIуагъэхэм композитор цIэрыIоу Тхьабысымэ Умарэ ыусыгъэу ансамблэу «Налмэсым» фэгъэхьыгъэр нахь къахэтэгъэщы.
Адыгэ Республикэм и Къэралыгъо ансамблэу «Налмэсым» къашъор къышIы зыхъукIэ артистхэр пчэгум къызэрихьэхэрэр, къашъом псэ къыпагъакIэзэ тамэ зэрэратырэр нэплъэгъум къеуцо. Тыгъэр, мазэр, жъуагъохэр, лIыбланэхэр, нарт гуащэр къызэрэшъохэрэр орэдым хэлъ гущыIэхэмкIэ артисткэм къытлъегъэIэсы. «Налмэсыр» къызэрэшъорэр, лъэпкъым зэрэфэуджырэр гум «щэчэрэгъу», уегъэгушхо.
РСФСР-м изаслуженнэ артисткэу КIыкI Зулхьаджэ ижъырэ адыгэ орэдэу «Гощэгъэгъым игъыбзэ» 1957-рэ илъэсым Москва къызэрэщиIогъагъэр искусствэр зышIогъэшIэгъонхэм ащыгъупшэрэп. Адыгеим культурэмкIэ и Мафэхэр Москва щыкIохэзэ орэдым едэIугъэхэм лъэпкъ искусствэм итарихъ осэ ин фашIыгъагъ.
Даутэ Сусанэ «Гощэгъэгъым игъыбзэ» къызыхедзэм, орэдым къэIуакIэу къыфигъотыгъэм зыкъигъэшъыпкъэжьыгъ. Орэдым гумэкI-гупшысэу хэлъым уедэIузэ, артисткэм сэнаущыгъэу хэлъыр къыхэогъэщы.
УрысыбзэкIэ къыIорэ орэдхэм ядэIугъошIу. Тызыщыпсэурэ чIыгум, хэгъэгум, цIыфхэм афэгъэхьыгъэхэм щыIэныгъэр къаIуатэ. Артисткэм къыдежъыугъэх Урысыем икомпозиторхэм я Союз хэтэу Артем Пысь — ащ фортепианэмкIэ произведениехэр къыригъэIуагъэх.
Адыгэ Республикэм и Къэралыгъо филармоние исимфоническэ оркестрэ хэтэу, музыкант IэпэIасэу СтIашъу Мэдин шыкIэпщынэмкIэ лъэпкъ мэкъамэхэм таригъэдэIугъ.
Къэбэртэе-Бэлъкъарым изаслуженнэ артистэу, хэгъэгум ифестиваль-зэнэкъокъухэм хагъэунэфыкIырэ чIыпIэхэр къащыдэзыхыгъэ орэдыIо ныбжьыкIэу Бэрбэч Аскэр бзэ зэфэшъхьафхэмкIэ къыхидзэгъэ орэдхэр гум рихьыгъэх. Ижъырэ адыгэ орэдхэр къызэриIохэрэм уегъэгушIо. Дунаим щыцIэрыIо орэдыIоу Адыгэ Республикэм, Къэбэртэе-Бэлъкъарым янароднэ артистэу Нэфышъэ Чэрим искусствэм чIыпIэу щыриIэм тытегущыIэзэ, Бэрбэч Аскэри гъэхъагъэхэр ышIынхэу фэтэIо.
Даутэ Сусанэрэ Бэрбэч Аскэррэ зэгъусэхэу къаIогъэ орэдхэри гум екIух. Артистхэм искусствэм щыпхыращырэ лъагъом зиушъомбгъунымкIэ ащ фэдэ егъэжьапIэхэр ящыкIагъэх.
Зэфэхьысыжьхэр
Пчыхьэзэхахьэр зезыщэгъэ Ахэджэго Рузанэ изэфэхьысыжьхэм тядэIузэ, артистхэр искусствэм илъэгапIэхэм афэкIонхэм зэрэфэхьазырхэм мэхьанэ етэты. Музеим ипащэу, Урысыем, Адыгеим, Ингушетием культурэмкIэ язаслуженнэ IофышIэу ШъэуапцIэкъо Аминэт зэхахьэм къыщиIуагъ орэдыIохэм, музыкантхэм IэпэIэсэныгъэ ин къызэрагъэлъэгъуагъэр.
Къэралыгъо гъэпсыкIэ яIэу зыпсэухэрэр илъэси 100 зэрэхъурэр Адыгеим, Къэбэртэе- Бэлъкъарым, Къэрэщэе-Щэрджэсым мыгъэ хагъэунэфыкIы. Ащ фэгъэхьыгъэ сурэт къэгъэлъэгъоныр музеим къызэрэщызэIуахыгъэр, зэкъош республикэхэм язэпхыныгъэхэр искусствэм зэрэщыпытэхэрэр, Адыгэ Республикэм и ЛIышъхьэу КъумпIыл Мурат, Адыгеим и Парламент и Тхьаматэу Владимир Нарожнэр, АР-м культурэмкIэ иминистрэу Аулъэ Юрэ, нэмыкI хэбзэкъулыкъушIэхэр сурэтхэм якъэгъэлъэгъон зэреплъыгъэхэр ШъэуапцIэкъо Аминэт хигъэунэфыкIыгъэх.
Концертым Адыгеим культурэмкIэ иминистрэ игуадзэу, Адыгеим изаслуженнэ журналистэу Кушъу Светланэ, культурэмкIэ министерствэм иотдел ипащэу, АР-м культурэмкIэ изаслуженнэ IофышIэу Шэуджэн Бэлэ еплъыгъэх, артистхэм зэрафэразэхэм тыщагъэгъозагъ.
ЕплъыкIэхэр
Урысыем, Абхъазым язаслуженнэ артисткэу, Адыгеим инароднэ артисткэу Нэхэе Тэмарэ ригъэджагъэхэм ащыщ Даутэ Сусанэ.
— Акъыл, гупшысэ хэлъэу Сусанэ орэд къеIо. Ымакъэ дахэ, уедэIузэ искусствэм гукIэ нахь куоу ухэуцо, — къытиIуагъ Нэхэе Тэмарэ. — Силъагъо зэрэрыкIорэм сегъэгушхо.
— Пчыхьэзэхахьэр гъэшIэгъонэу кIуагъэ, искусствэр лъызыгъэкIотэн зылъэкIыщтхэр тиIэх. Художественнэ, зэхэщэн Iофыгъохэр нахьышIоу агъэпсызэ бэрэ тагъэгушIонэу афэтэIо, — игупшысэхэм тащигъэгъозагъ Урысыем, Адыгеим янароднэ артистэу, Абхъазым, Пшызэ язаслуженнэ артистэу Кукэнэ Мурат.
ШIэныгъэлэжьэу Беданэкъо Мурат, республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан, культурэм, искусствэм яIофышIэхэу Тыгъужъ Фатимэ, ХъокIо Ларисэ, Сулейманова Фатимэ, Дэбэгъо Фатимэ, хэкум къэзыгъэзэжьыгъэ тилъэпкъэгъухэм, нэмыкIхэм къытаIуагъ лъэпкъхэр зэфэзыщэрэ концертхэм нахьыбэрэ яплъыхэ зэрашIоигъор.
Тэхъутэмыкъое районым иадминистрацие культурэмкIэ игъэIорышIапIэ ипащэу, АР-м искусствэхэмкIэ изаслуженнэ IофышIэшхоу Ацумыжъ Рустам, Адыгеим инароднэ артистэу Мышъэ Андзаур пчыхьэзэхахьэм щыIугъэ орэдхэр артистхэм дахэу къызэраIуагъэхэр хэушъхьафыкIыгъэу яеплъыкIэхэм къащыхагъэщыгъэх.
Даутэ Сусанэ концертым изэхэщакIохэм, артистхэм, IэпыIэгъу къафэхъугъэхэм «тхьашъуегъэпсэу» къариIожьыгъ.
ЕмтIылъ Нурбый.