Иадыгэ лъэпкъ илъэпIагъ, ыIэтыгъ
КъызхэкIыгъэ адыгэм идахэ зыIотагъэу, емызэщыжьэу ащ фэлэжьагъэхэм Цуекъо Юныс ащыщ. Ипроизведение пэпчъкIэ адыгэм ыгу, ышъо зыфэдэр, акъыл-къулаеу хэлъыр ащыгъэунэфыгъ. ЦIыф къызэрыкIо жъугъэхэр Дунэешхом зэрэщыгугъхэу, зэрэхэзагъэхэрэр кIэзыгъэнчъэу узIэпищэу къащиIотыкIыгъ. Илъэпкъ игутео зэхишIапэу, ащкIэ илыуз-гууз итхыгъэ зэфэшъхьафхэм (рассказхэм, повестьхэм, романхэм) Юныс къащыригъэлъэгъукIыгъ. Иобразхэр гъунэм нигъэсынхэр, ыгъэцэкIэнхэр, шъыпкъэр купкI афишIыныр тхэкIошхом фызэшIокIыщтыгъ. Юныс тхэщтыгъэ къодыеп, къыIонэу къырищэжьэгъэ гупшысэр, мэстэнэ цIыкIужъыем риужьыныр фызэшIокIыщтыгъ. ИгупыкI ин а зэкIэмкIэ къетэжьи, зэлъашIэрэ тхакIо хъугъэ.
Цуекъо Юныс Хьарунэ ыкъор Теуцожь районым ит къуаджэу Хьалъэкъуае бэдзэогъум и 27-м, 1940-рэ илъэсым къыщыхъугъ. Классиблыр къызеухым, Адыгэ кIэлэегъэджэ училищым чIэхьагъ, щеджагъ, 1962-рэ илъэсым ар къыухыгъ. Зы заулэрэ кIэлэпIоу, еджапIэм кIэлэегъаджэу Iоф ащишIагъ. 1963 – 1966-рэ илъэсхэм дзэ къулыкъур ыхьыгъ. Ащ къызекIыжьым, техническэ еджапIэм икомсомол организацие исекретарыгъ. Ащ пыдзагъэу игъэсэныгъэ-шIэныгъэ Ростов дэт къэралыгъо университетым журналистикэмкIэ ифакультет щылъигъэкIотагъ. Хэку гъэзетэу «Социалистическэ Адыгеим» (ыужыкIэ «Адыгэ макъэм») Iоф ащишIагъ. Адыгэ хэку радиовещанием и Комитет иредакторыгъ. 1980 – 1990-рэ илъэсхэм журналэу «Зэкъошныгъэм», ащ ыужкIэ «Жъогъобыным» яредактор шъхьэIагъ.
Юныс ытхыхэрэр 1961-рэ илъэсым щыублагъэу къыхиутыщтыгъэх. 1980-рэ илъэсым Ю. Цуекъор Урысые Федерацием итхакIохэм я Союз хэхьагъ. ТхакIом ирассказхэр, ироманхэм ащыщ пычыгъохэр журналхэу «Смена», «Крестьянка», альманахэу «Истоки», гъэзетхэу «Литературная Россия», «Сельская жизнь» зыфиIохэрэм къарыхьэщтыгъэх. 1985-рэ илъэсым тхылъ тедзапIэу «Современникым» итхыгъэхэр зыдэт сборникэу «Чужая боль» къыщыхаутыгъ.
Юныс итхылъхэр адыгабзэкIи урысыбзэкIи къыдэкIыгъэх. Повестьхэу «Хымэ лыуз» (1978), «Къэзыгъэзэжьыгъэ ижъырэ шыухэр», «Iэлъыныр Iэм пызырэп е Зы шIулъэгъу ихъишъ», «Шэфлъагъу», романхэу «Унэ плъыжь», «ГъучI Тыгъужъым итаурыхъ», «Тыгъэр лъагэу къыдэкIоягъ», «ЛIакIом итамыгъ» (2015), «Хъуапсэрэм ыпсэ кIодырэп» (2019) къыдигъэкIыгъэх.
УрысыбзэкIэ къыхаутыгъэхэр: «Чужая боль», роман «Сказание о Железном Волке», 1994-рэ илъэсым мыр «Роман-газета» зыфиIорэм къыдигъэкIыгъ, «Милосердие черных гор или Смерть за черной речкой», «Кинжал танцора». ТхакIом ипроизведениехэм купкI ушъагъэ яI, адыгэ лъэпкъ литературэмкIэ ахэр хъугъэ-шIэгъэ инхэу, мэхьанэ зиIэх.
Цуекъо Юныс Адыгэ Республикэм литературэмкIэ и Къэралыгъо премие тIогъогогъо илауреат. Урысыем итхакIохэм я Союз ыкIи «Роман-газетым» яшIухьафтын лъапIэу «Образ» зыфиIорэм ялауреат. Урысые Федерацием культурэмкIэ изаслуженнэ IофышI, Адыгэ Республикэм инароднэ тхакIу. АМАН-м — шIэныгъэхэмкIэ Адыгэ (Щэрджэс) Дунэе Академием иакадемик гъэшIогъагъ. Илитературнэ творчествэ инэу щэIэфэ илъэпкъ филэжьыгъэр, Юныс нэпэеплъ шIагъоу къытфигъэнагъ, тхылъеджэ чанхэм ахэр ашIэх ыкIи зэхафых.
***
Унэй шIыхьафыр
Цуекъо Юныс ироманыкIэу «Хъуапсэрэм ыпсэ кIодырэп» зыфиIоу, иапэрэ повестэу «Хымэ лыузыр» тхакIом лъапсэ зыфишIыгъэм мы пычыгъор къыхэхыгъ.
ХьатыякIом зегъэхьазырыфэкIэ Тыркухъан зи ымыIоу щытыгъ, етIанэ кIашъомкIэ зигъэзагъ:
— Кулсом, а Кулсом! ЗэкIэхэми марышъ тишIэн тшIэгъахэ. Оры джы къэнэжьыгъэр зыIэ илъыр.
Зэхихыгъи фэд, зэхимыхыгъи фэд. Жьы къещи фэд, жьы къымыщэжьи фэд. Къолэн-сэлэн пкIыжьыгъэу ныор кIэшъо къуапэм пыт. Къулэджэныбэ етIапцIэм кIэлэцIыкIумэ хаупIэпIыкIыгъэ нысхъапэу, бгъэ пIокIэ пчэнэ псыгъо цIыкIу. ЫчIэгъ чIэтмэ нэбзэ-губзэ бзэмыIоу джыри къахэплъэ, къахэплъэ. Ары шъыу, унашъхьэм щыгъэIэгъэ быракъ жъугъэмэ къахэщ-къахэмыщышъоу, ежьри быракъ пкIырапкIынэ пкIыжьыгъэм фэдэу.
ГъэшIэным хэбзэшIоу къырэкIо: унакIэр зышIырэм къуаджэм дэсхэр гупыкIышхокIэ етэхэу. Теубытагъэ иIэп, егъэзыгъи хэлъэп — шъхьаджи амалэу иIэр, зыфэкъулаир ары...
ЫчIэгъ чIэтхэр, хъулъфыгъи бзылъфыгъи — цIыкIуи ини — шъыпкъэмэ, щыгъухьэ ежьагъ, хьау, ажэ псы дагъэхъуагъ: макъи-лъакъи къызхагъэIукIырэп. Такъикъа, тIуа, ща, хьаумэ лIэшIэгъуа арэущтэу зежагъэхэр. Бзылъфыгъэ жэбыхъужъ горэм нахьыбэ фэщыIагъэп, гукIэе лъэшкIэ къахэджыкIыгъ:
— А Кулсом, Тхьэ къыуати, шъыдэу гу шIагъо уиI?! Мы гопэгъушхор зэхапшIэрэпщтын! КъэпIощтыр къаIуи, унэм зэ тижъугъэхьажьба...
Нахьыбэр игуапэу зэрэгъэщхыгъэ.
ИтеплъэкIэ джыри зэрэнэдыигъэ-бзэмыIу ныо усэрэжъыр, ау, Iоф къызэрыкIоп джы мы фиты зыфашIыгъэр — ыгукIэ ежь зэригъафэрэр гъунэнчъ! УмышIэмэ, мы ылъэ чIэгъ чырбыщ унэ хъоо-пщэожъым инеущи, иегъэшIэ лъэтIани ыIэ ралъхьагъэм фэд: насыпэу, мамырэу, гъэбэжъоу, байныгъэу илъыщтыр ежь, Кулсомэ, зыфиIорэм сыдигъокIи шъхьэщымыкIымэ къыщымыкIэ зэпытынэу фэхъохъущт. Къихъощт сабыим ипчъагъэ багъоу, къургъокъуаемэ къэлъытэгъуае афэхъунэуи ары. Къихъорэ пэпчъ ирызыкъ къыдакIоу, псэпытэ-лъэпытэ хъарзынэнхэуи ары...
Джыдэдэм, мы жъоркъышхо-гопэгъушхом, игъо фимыфэжьми гунахьы хъунэпщтын, арау — тфэгъогогъурэ, нэмазшIыгъор къэсэу, ыпашъхьэ зихьэкIэ, Алахь закъом Кулсомэ елъэIущт: чIышъхьэм, дунэе нэфышхом мамырыр телъынэу; шIулъэгъурэ гукIэгъурэ цIыфмэ азыфагу дэлъынэу; цIыфмэ, ащ нахь лъапIэ хъужьырэп, зэхэдз амышIэу гууз-лыузыр зэфыряIэнэу...
АкIэ-мыкIэм, пшъэшъэжъые кIыилэу зызышIытэжьрэм фэд, Мэздэгукъомэ яныо тэмашъхьэр къызэпигъэджэжьыгъ:
Ордэ унэжъэу, Иджэхашъо гъуаплъэу, Ипчъаблэ тыжьынэу, Идэпкъ дышъэу, ИкIашъо налмэс-налкъутэу...
Мыщ дэжьым Кулсомэ ычыи зыгорэ ихъырцагъэу тIэкIу къызэшIонагъ, псынкIэ-псынкIэу ылъэкIыхьажьи, еужьырэу къылъыпидзэжьыгъ:
Цужъы укIыпIэу, ИкIырэм къырихьэу, Къихьэрэм къыринэу...
Изакъу джы. Псыгъо IэпIокIэ-лъэпIокIэ гъукIэгъэ цIыкIу. ГъэшIэрэ тыгъэм джаущтэу ыстыжьыгъ-ыжъэжьыгъ. Ежьым шъхьае, емзэщ ишъыпкъэ дэд — джаущтэу кIегъэпцIыикIы. Aнахьыбэмэ илъэс зыбгъу-зыпшIыр зыныбжь пшъэшъэжъыем ымакъэр ымакъ. Ары шъхьакIэ, моу хьалэмэтэу, етIани макъэр кIыилэ-щхэны дэдэу шIохъу:
— Мардж, о мардж! Шъуекуу, шъори шъуекуу! ЛIыпцIэкъомэ ячырбыщ унэ гъэшъэлыр изы зэпытынэу шъуфэлъаly! — ежь игущыIэхэмкIэ Кулсомэ джы къылъыпедзэжьы. — Уз горэ къихьагъэмэ щызэкIэкIонэу шъуIо! Насып къэкIопIэ зэпытынэу шъуелъэIу!..
— Тхъэжьыгъэ джы Кулсомэ! Тхъэжьыгъэ! Тхьэм зыфигъалIэрэр къыдэхъугъ, — Сэтэнаекъо Шъэуае зегъэсэмэркъэуи фэд, тIэкIуи ныом кIэнакIи фэд.
— ПсэкIоды, ащ фэдэхэр ныом емыIуалIэх,— игъуаджэ щыхъоу Хъаные, ымакъэ ымыIэтэу IушкIэшкIагъэ.
— Сабыир жъугъэу щыбагъоу, цIыфэу щыIэмэ аIэхъуамбэ пэпчъэу ар имыкъурэмэ, уашъом ит жъуагъом фэдизи орэхъу...
— У-у-у... Кул-со-о-м-м!..— зырагъэукIыхьэзэ, пшъашъэхэр гырзыгъэх.
— Ары, Шъэуай, сыдрэ Iофтхьабзи бзыпхъэ иI, — ныори гушIуагъэ.
НэкIубгъор зыгъэхьазырыгъэр Мамырыкъо Нуриет.