ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Ханскэ чэтэхъо фабрикэр» мы уахътэм зыпкъ итэу мэлажьэ.

— Фабрикэр къызытэщэфыжьым зыпари дэтыжьыгъэп, — къеIуатэ предприятием ипащэу Бырдж Хьаджымусэ. — Апэ корпуси 7-р зэтедгъэпсыхьи, 2021-рэ илъэсым чэтыл тонн (чэт псаум къыщэчырэмкIэ къа­лъытэ) 2250-рэ къыдэдгъэкIыгъ. Мы илъэсым джыри корпуси 2-у ттIупщыгъэм яшIуагъэкIэ лэу къыдэдгъэкIырэм хэдгъэхъон тлъэкIыгъ. Джыри зы мазэкIэ псэолъи 2 хьазыр хъущт ыкIи мы илъэсым чэтылыр тонн мини 3,5-м нэдгъэсынэу итэхъухьэ. Пшъэрылъэу зыфэдгъэуцужьырэр 2023-рэ илъэсым ехъулIэу зэтедгъэпсыхьажьырэ корпусхэм япчъагъэ 16-м нэдгъэсынышъ, ащ ишIуагъэкIэ лы тонн мини 4,5-рэ къыдэдгъэкIынэу ары. Чэт шъхьэ пчъагъэмкIэ къэплъытэмэ, зы корпусым чэтыжъые мин 24-рэ чIафэмэ, 9-м — шъхьэ мин 216-рэ чIэс. ЗэрэдгъэнафэрэмкIэ, къэкIощт илъэсым зэ игъэтIысхьэгъур чэтыжъые мин 384-м нэсыщт.

IофшIэныр езыгъэжьэжьыгъэ­кIэ предприятием лъэбэкъушIухэр ышIыгъэх. Джырэ нэс Iусхэр Брюховецкэ ыкIи Новоалександровскэ комбикормышI заводхэм къащащэфыщтыгъ. Ахэм къагъэхьазыррэ комбикормэм изытет дэгъу, щэфакIохэр егъэразэх. Ау джыри санкциехэр къемыжьэхэзэ, бжыхьэм Iусхэм ауасэхэр процент 30-м нэсэу къаIэтыгъэх. Джащ фэдэу чэтхэм аратырэ Iэзэгъу уцхэр IэкIыб къэралыгъохэм къаращыщтыгъэх. Санкциехэм ялъэхъан ар зэ­пагъэугъ ыкIи чIыпIэ къыдэгъэ­кIакIохэм ахэр нахьыбэ къашIэу фежьагъэх. Мы Iофым тапэкIэ зыпкъитыныгъэ хэлъыным тигущыIэгъу щэгугъы.

Ханскэ чэтэхъо фабрикэм чэт IусхэмкIи, инкубационнэ кIэн­кIэхэмкIи ежь-ежьырэу зиIыгъы­жьыным зэрэфэкIощтым дакIоу, пшъэрылъ шъхьаIэу пащэм къыхигъэщыгъэр къыдагъэкIырэ продукцием изытет шэпхъэшIухэм адиштэу, иIэшIугъэкIэ агу рихьэу цIыфхэм зэращэфырэм къыщымыкIэу ыпэкIэ лъыкIо­тэнхэр ары.